¿Chajariik iruq’or i Santo Laj Huuj chi riij i k’axkilal ruuk’ i ha’ chi jun suut i ak’al?
Chi qunchelaal aajwaal wach chi qeh i ha’ reh chi ne inwih’ik qak’achariik. «Xa re’ la’, ruum chi k’ahchi’ ruchiqiik i ha’, chalik reh chi qanaah jenaj nimlaj k’axkilal ruum i wilih» (António Guterres, ajtzʼihbʼaneel reh i molaabʼ Naciones Unidas). Kʼih taqeh kʼachareel jun suut i akʼal kʼaxik chi keh rureqariik i kihaaʼ.
Strdel/AFP via Getty Images
¿Mi ne ta woʼ imponik i qʼiij chi chi qunchelaal ne inwihʼik qahaaʼ? ¿Oon xa na woʼ ruwihʼiik qakʼaxkilal ruukʼ i haʼ? ¿Chajariik iruqʼor i Santo Laj Huuj?
Reʼ iruqʼor i Santo Laj Huuj chi riij i haʼ
Reʼ Santo Laj Huuj iruqʼor chi naruponiik i qʼiij chi maʼ na ta chik ruwihʼiik qakʼaxkilal ruukʼ i haʼ. Iruqʼor laʼ qeh chi naruwihʼiik qahaaʼ, i xa saq chik wach.
«Eh chupaam i ye’aab’ chiq yuuq’ naa raasjiik chaloq i ma’ k’isa ha’. Eh chupaam i ye’aab’ chiq yuuq’ naa rukahniik chi ye’aab’ ha’, xa aha’ chik naa raasjiik chaloq i ha’» (Isaías 35:6, 7).
¿Chaaj woʼ reet ne irubʼan chi ne inqakoj qakʼux ruukʼ i irubʼehsaj i Santo Laj Huuj? Chakapaaj chi riij iruqʼor i Santo Laj Huuj chi riij nikʼwach korsamaj i wach akʼal.
Reʼ iruqʼor i Santo Laj Huuj chi riij i wach akʼal eh chi riij nikʼwach inkamanik i haʼ
«Reʼ Dios, ma’ xuyejaa’ ta chee wach ak’al chi xama’ xta naa rukamaniik wii’. Xuyejaa’ la’ chi naa rub’aan i patinik chupaam» (Isaías 45:18).
Reʼ Dios xutzʼuhkrisaj juʼjun taqeh i chibʼih jariik wach akʼal reh chi ne inkiyeew i haʼ .
«Re’ Dios ruuk’ i rajaawriik rumol wach i ha’ pan jinaj ye’aab’, chi riij i re’ rusutej chi jab’. Re’ reh i rusutej chi jab’ i suutz’. Re’ jab’ i ruyeew cho chikinaah chu’nchel i k’achareel wilkeeb’ wach ak’al» (Job 36:27, 28).
Reʼ texto wilih irukʼuhtaaj nikʼwach irubʼan i Dios reh chi ne inwihʼik qahaaʼ. Reʼ haʼ wilik wach akʼal eh pan palaw injohtik, irumol riibʼ pan taxaaj eh inqajik chi haʼ. Chi jeʼreʼ reʼ taqeh kʼachareel eh taqeh chikop ne inwihʼik kihaaʼ (Eclesiastés 1:7; Amós 5:8).
«Re’ hin naa nuye’em taq cho cha naah i jab’ xti manlik paruq’ijil, eh re’ taqe i tik mu’uun, re’ taqe i chee’ naa kiwachiniik chi korik» (Levítico 26:4).
Reʼ Dios xuqʼor keh taqeh Israelita reh i najtir cho qʼiij chi na naq rukuxisam taqeh. Xuqʼor keh taqeh ajtikool chi na naq rubʼanam chi ne inelik cho wach i kitiik ruum chi xa na woʼ naq ruwihʼiik kihaaʼ. Reʼ reh rehtʼal chi, reh chi ne inwachinik i tik ko ruman chi ne inwihʼik haʼ.
Reʼ xubʼan i Dios kuukʼ taqeh Israelita reh i najtir cho qʼiij, na woʼ rubʼanam chi naah chuʼnchel i akʼal chupaam taqeh qʼiij chalik reh (Isaías 30:23). Xa reʼ laʼ, chi jun suut i akʼal, chupaam juʼjun taqeh yeʼaabʼ kʼih taqeh kʼachareel kʼahchiʼ kikahnik chi maʼxta chik kihaaʼ. Jenaj keh irubʼan chi ne inwihʼik i kʼaxkilal wilih reʼ chi maʼ irubʼan ta chik i jabʼ. ¿Chajariik iruqʼor i Santo Laj Huuj chi riij taqeh kʼaxkilal inqakʼul ruukʼ i haʼ?
Nikʼwach narukuxiik wach i kʼaxkilal ruukʼ i haʼ
Reʼ Santo Laj Huuj iruqʼor chi reʼ Runimaal Rajaawriik i Dios, narusacham wach taqeh kʼaxkilal inkijotʼ i wach akʼal, eh chi kixilak taqeh kʼaxkilal wilih, wilik i kʼaxkilal ruukʼ i haʼ (Mateo 6:9, 10). Reʼ Rajaawriik i Dios wilik pan taxaaj eh narutaqʼaniik chi naah i akʼal (Daniel 2:44; Apocalipsis 11:15). Ruum ajreʼ, reʼ i Runimaal Rajaawriik i Dios narubʼanam i maʼ inkibʼan ta rubʼaan taqeh ajtaqʼanel winaq, narusacham wach chuʼnchel taqeh kʼaxkilal inkibʼan chi maʼ ne ta inwihʼik i haʼ.
Reʼ kʼaxkilal: Reʼ rutzʼaʼiil i qʼiij eh reʼ i kowlaj jabʼ kʼahchiʼ rubʼanam chi reʼ i rubʼanam i Dios reh chi ne inwihʼik qahaaʼ maʼ ne ta chik inkamanik chi korik. Reʼ wilih irubʼan chi ne inchiqik i haʼ, chi ne inwihʼik i elel haʼ ruum i kowlaj jabʼ oon ruum i haʼ inelik cho pan palaw noq reʼ wilih inelik.
Nikʼwach narukorsjiik i wilih: Reʼ Rajaawriik i Dios narubʼanam chi chuʼnchel i wilik naah akʼal ne woʼ chik inkamanik chi korik, reh chi reʼ wach akʼal ne woʼ chik inkorjik. Reʼ Dios iruqʼor qeh: «Chab’iraj re’ hin inu-aak’b’isaj chu’nchel i xa chib’ih jariik» (Apocalipsis 21:5). Chupaam taqeh i chiq yuuqʼ narasjiik i haʼ, eh naruwihʼiik kʼacharik chupaam taqeh yeʼaabʼ i maʼ qakapaam ta naq. (Isaías 41:17-20). Reʼ Rajaawriik i Dios pan qʼabʼ i Jesucristo na woʼ rubʼanam chi maʼ ne ta chik inwihʼik i kaq teew.
Noq reʼ Jesús xwihʼik wach akʼal xupahbʼaaʼ i kowlaj teew, chi jeʼreʼ xukʼuhtaaj i rajawriik i yeʼooj reh ruum i Dios (Marcos 4:39, 41). Riʼsil Rajaawriik i Dios pan qʼabʼ i Jesucristo, reʼ taqeh kʼaxkilal ruukʼ i wach akʼal narusachariik kiwach. Reʼ taqeh kʼachareel nakiwihʼiik pan tuqkilal, eh maʼ na ta chik kiyoʼjiik chi ne inwihʼik jenoʼ kʼaxkilal ruukʼ i wach akʼal.
Reʼ kʼaxkilal: Reʼ taqeh kʼachareel maʼ inkikoj ta rehtaal i kʼaxkilal inkibʼan reh i wach akʼal. Eh reʼ taqeh molaabʼ i xa chi riij i tumiin inkikapaaj inkichʼuwaʼrisaj wach i palaw, taqeh roq haʼ eh i haʼ wilik riʼsil i akʼal.
Nikʼwach narukorsjiik i wilih: Reʼ Dios narusaqbʼisam wach i akʼal, i palaw eh taqeh roq haʼ. Reʼ wach akʼal narukahniik chi jenaj holohik laj yeʼaabʼ.Reʼ Santo Laj Huuj iruqʼor taqeh i holohik laj qʼorik wilih: «Re’ i xkahnik chi chiq yuuq’ naa wo’ chik rusuuqb’iik ruk’ux. Re’ chiq ak’al naa chik reliik i uhtz’ub’ chuwach» (Isaías 35:1).
¿Chajariik narukʼulariik kuukʼ taqeh i maʼ looqʼ ta chi keh i wach akʼal eh taqeh i tokoom kʼachareel? Reʼ Dios iruqʼor chi naruponiik i «riqʼijil chi narisachariik kiwach taqeh i kisachwik reh i wach akʼal» (Apocalipsis 11:18, RLLH; Proverbios 2:21, 22).
Reʼ kʼaxkilal: Reʼ taqeh kʼachareel maʼ inkikoj ta chi korik i haʼ wilik naah akʼal. Reʼ haʼ xa reʼ yuʼ insacharik wach ruum nikʼwach inkojarik.
Nikʼwach narukorsjiik i wilih: Intyoox reh i Runimaal Rajaawriik i Dios, narubʼaan ayuʼ wach akʼal chajariik iraaj i reh, eh maʼ reʼ ta i inkaaj i kʼachareel i xa chi kiij i keh inkikapaaj (Mateo 6:9, 10). Reʼ Rajaawriik i Dios naruyeʼem i tijinik chi manlik keh taqeh kʼachareel nakiwihʼiik riʼsil i taqʼanik wilih, «ruum naa runujiik chinaah i wach ak’al i runa’ojb’al i Dios», iruqʼor pan Isaías 11:9. a Reʼ taqeh kʼachareel nakichaʼjeem chi korik i akʼal eh jeʼ woʼ chuʼnchel i wilik chi naah, ruum chi naruwihiik kinaʼojbʼal, ruum i kikʼaxooj chi riij i Dios eh chi riij i xutzʼuhkrisaj.
Reh chi ne inatijej ruman chi riij chajariik narubʼanam i Rajaawriik i Dios, chawil i naʼojbʼal «¿Qué cosas logrará el Reino de Dios?»
Chawil i capítulo 35 reh Isaías, reh runabʼjiik nikʼwach i akʼal narukorjiik chi xa holohik chik.
Chawil i video ¿Chaaj wo’ reet i Dios xutz’uhkrisaj i ak’al? reh runabʼjiik chajariik iraaj i Dios reh i wach akʼal eh keh i kʼachareel.
a Reʼ rubʼihnaal i Dios, Jehová. (Salmo 83:18, TNM) Chawil i naʼojbʼal «¿Ajwach i Jehová?»