¡NAʼLIK OQ AWACH!
Reʼ taqeh elel haʼ inkiyoj wach chuʼnchel—¿Chajariik iruqʼor i Santo Laj Huuj?
Chi naah i akʼal, kʼih taqeh kʼachareel kiʼikʼik pan tiʼ kʼaxik ruum i elel haʼ. Chakoj rehtaal i kʼahchiʼ rukʼulariik:
«Chuwach i 140 haabʼ ikʼinaq, ar pan tinamit Pekín, ar China kiqʼorom chi wihʼinaq kʼih i kowlaj jabʼ. Reʼ sábado ko pan miércoles xqajik i 744.8 milímetros (29.3 pulgadas) chi jabʼ» (Noticias AP, 2 reh agosto reh 2023).
«Reʼ jueves, reʼ kowlaj teew Khanun xubʼan i kʼaxkilal ruukʼ i kowlaj jabʼ eh teew pan sur reh Japon. Xikimik kiʼibʼ chi kʼachareel ruum i wilih. . . . Inkuyʼeej chi reʼ i kowlaj teew wilih, ne irukʼam cho 0.6 metros (2 pies) chi jabʼ pan taqeh yuuqʼ reh Taiwán» (Deutsche Welle, 3 reh agosto reh 2023).
«Ruum taqeh kowlaj jabʼ xwihʼik chuwach i 50 haabʼ xiʼikʼik, xbʼan i elel haʼ ar Nueva Escocia, pan región Canadá reh Atlántico pan rukuxiik i xamaano» (Noticias BBC, 24 reh julio reh 2023).
¿Chajariik iruqʼor i Santo Laj Huuj chi riij i wilih?
Jenaj ehtalil chi riij «i kuxesbʼal wach taqeh qʼiij»
Reʼ Santo Laj Huuj iruqʼor chi kʼacharik inqabʼan pan «kuxesbʼal wach taqeh qʼiij» (2 Timoteo 3:1, Reʼ Loqʼ Laj Huuj). Reʼ Jesús xuqʼor cho rubʼiral chi chupaam i qaqʼijil «maʼ kʼisiin i xa chibʼih jariik inaakikʼuhtaam cho kiibʼ ti yoʼjoq kuum» (Lucas 21:11). Reʼ taqeh jalooj ruukʼ i qʼiij eh i jabʼ rubʼanam chi reʼ taqeh kʼaxkilal irukʼam taqeh kowlaj teew eh jabʼ kʼaxik runabʼjiik jaruuj narukʼulariik, xa kok xilak inkʼularik i wilih eh qʼeʼ kow taqeh.
Wilik uyʼinik
Reʼ Santo Laj Huuj iruqʼor chi chuʼnchel taqeh kʼaxkilal inilarik yuʼnaak irukʼuhtaaj qeh chi wilik jenaj uyʼinik. ¿Chaaj woʼ reet? Reʼ Jesús xuqʼor: «Noq naa taq awilom chi kʼahchiʼ chik rukʼulariik taqe i tiʼ kʼaxik reʼ reʼ, ar taq naa akojom rehtaal chi nyejik chik chaloq i runimaal i rajaawriik i Dios» (Lucas 21:31; Mateo 24:3).
Chuʼnchel i kʼahchiʼ qilom irukʼuhtaaj chi reʼ runimaal i rajaawriik i Dios maʼ najt ta chik iraaj chi ne irukorsaj taqeh kʼaxkilal ruum i qʼiij eh i jabʼ (Job 36:27, 28; Salmo 107:29).
Reh chi inatijej ruman chi riij nikʼwach i runimaal rajaawriik i Dios narubʼanam chi holohik chik i wach akʼal, chawil i naʼojbʼal reh jw.org «¿Quién salvará el planeta?»
Puede que también le interese
CHI QIIJ I HOJ
Chapahqaaj chi ne kiponik awuukʼ taqeh testigo reh Jehová
Chanabʼeej chajarik iruqʼor i Santo Laj Huuj eh jeʼ woʼ chi kiij taqeh testigo reh Jehová.
