¡NAʼLIK OQ AWACH!
Reʼ taqeh testigo reh Jehová eh reʼ nimlaj kansanik Holocausto i rubʼihnaal—¿Chajariik iruqʼor i Santo Laj Huuj?
Reʼ 27 reh enero reh 2023, kʼih taqeh kʼachareel nakininqʼijem (narukʼulik pan kikʼux) i nimlaj kansanik Holocausto i rubʼihnaal. Mareh noq inakapaaj chi riij taqeh kʼaxkilal xkʼularik 75 haabʼ chik rubʼanam yuʼnaak, mareh inakapaaj ¿chaaj woʼ reet noq reʼ Dios xukanaaʼ chi ne inkʼularik i nimlaj kansanik wilih?
Reh runabʼjiik chajariik iruqʼor i Santo Laj Huuj, chawil i naʼojbʼal pan jw.org «¿Por qué sucedió el Holocausto judío? ¿Por qué Dios no lo impidió?».
Reʼ taqeh judío xkikʼul i kʼaxkilal ruum i Holocausto. Xisikʼarik taqeh eh kʼih i xikantesjik taqeh. Xa maʼ reʼ ta woʼ taqeh judío i xikantesjik pan Holocausto. Xikantesjik woʼ tokoom kʼachareel, jeʼ rukabʼ taqeh testigo reh Jehová. Xikantesjik ruum chi inkinimaj naq iruqʼor i Santo Laj Huuj.
Reh runabʼjiik ruman, chawil i naʼojbʼal pan jw.org «¿Qué les ocurrió a los testigos de Jehová durante el Holocausto?».
«Re’ k’ahchi’ quy’eem»
Kʼih taqeh kʼachareel kiyoʼjik chi ne woʼ chik inkʼularik i nimlaj kansanik wilih. Xa reʼ laʼ, iruyeew rutuqkiil qakʼux runabʼjik chi reʼ Santo Laj Huuj iruqʼor qeh chi chupaam taqeh qʼiij chalik reh maʼ na ta chik rukʼulariik jenaj kʼaxkilal jeʼ rukabʼ i wilih.
«Ruum reʼ hin wehtʼal chibʼih jariik i nuyejaam wach cha weh taq i hat reh chi suq taq naa awihiik, jeʼ rukabʼ i kʼahchiʼ awuy-eem taq i hat, maʼ reʼ ta yiibʼ wach i kʼahchiʼ nukapaam taq chawiij, inki i Dios» (Jeremías 29:11).
Reʼ uyʼinik wilih narojiik eloq wach noq reʼ Jehová a narusacham i yiibʼ wach eh narukorsam taqeh kʼaxkilal. Na chik ruponiik i qʼiij chi reʼ Dios narubʼanam i wilih:
Reʼ taqeh i yiibʼ wach kinaʼojbʼal, reʼ inkibʼan i tiʼ keh i tokoom narusachariik kiwach (Proverbios 2:22).
Nareqʼomam taqeh i tiʼ wilkeebʼ, eh nakiwihʼiik pan suqkiil kʼuxliis (Apocalipsis 21:4).
Na woʼ chik ruyeʼem kikʼachariik ayuʼ wach akʼal taqeh i xikimik chik (Juan 5:28, 29).
Ne irubʼan chi ne inakoj akʼux ruukʼ i holohik laj uyʼinik wilih iruyeew i Santo Laj Huuj. Mi inawaaj awehtʼaliim chaaj woʼ reet ne irubʼan chi ne inakoj akʼux ruukʼ i Santo Laj Huuj, chakʼul jenoʼ tijinik chi riij i Santo Laj Huuj.
a Jehová i rubʼihnaal i Dios (Salmo 83:18).