Inkuyeej chi 5.000 millones chi kʼachareel ne inkil i Copa Mundial reh i FIFA, reʼ narutoqʼaam pan 20 reh noviembre eh narukohlaam pan 18 reh diciembre reh 2022. Kʼih inkikapaaj chi reʼ taqeh kʼoʼnik jeʼ rukabʼ i wilih xa maʼ reʼ ta rumolariik wach taqeh kʼachareel inkibʼan.

•   «Reʼ kʼoʼnik ne irujal taqeh kʼachareel, ne irubʼan chi holohik i kinaʼojbʼal eh ne irumol kiwach, eh maʼ chuʼnchel taj inkibʼan i wilih» (Nelson Mandela, reʼ xwihʼik chi ajtaqʼaneel ar Sudáfrica).

•   «Reʼ kʼoʼnik pelota irumol wach i uyʼinik, eh jeʼ woʼ i suqkiil kʼuxliis, noq inooj kikʼux chi riij, pan kʼaxooj eh noq inkikoj kikʼux chi riij» (Gianni Infantino, reʼ ajkʼamal bʼeeh pan FIFA). a

 ¿Ne na irubʼan i kʼoʼnik pelota jun suut i nah akʼal oon tokoom chik moloh iibʼ rureqariik i wilih? ¿Wilik na jenoʼ uyʼinik ne irureq i tuqkiil kʼuxliis eh i wihʼik pan jenaj wach kʼuxliis?

 Reʼ nimlaj kʼoʼnik wilih xa maʼ reʼ ta chik kʼoʼnik pelota. Xubʼan laʼ chi ne inwihʼik kʼaxkilal ruukʼ taqeh kamanik, tumiin eh ruukʼ taqeh ajqʼatal qʼorik, jeʼ rukabʼ taqeh derechos humanos, inkikʼuhtaaj i kikaʼybʼal taqeh kʼachareel eh i maʼxta kitumiin.

 Eh kʼih inkikapaaj chi reʼ nimlaj kʼoʼnik chi jun suut i nah akʼal, jeʼ rukabʼ i mundial reh fútbol irubʼan chi reʼ taqeh kʼachareel ne inkikʼsaj junkʼaam oq kiqʼiij. Xa reʼ laʼ, atoobʼ ta reʼ taqeh kʼachareel ne inkaaj, reʼ taqeh moloj iibʼ wilih maʼ irumol ta wach taqeh kʼachareel chi junelik. Irujal laʼ i kikapebʼaal taqeh kʼachareel eh irubʼan chi ne inkichʼaq kiibʼ. Reʼ Santo Laj Huuj inqʼorik chi riij nikʼwach i kibʼanooj taqeh kʼachareel eh ruqʼorom woʼ naq chik chi nakibʼanam i juʼjun chi naʼojbʼal wilih «pantzʼapaabʼ taqe» qʼiij (2 Timoteo 3:1-5).

 Reʼ Santo Laj Huuj inqʼorik chi riij jenaj uyʼinik korik. Reʼ irubʼan chi xa jenaj wach kʼuxliis ayuʼ nah akʼal. Iruqʼor chi chuʼnchel taqeh kʼachareel ayuʼ nah akʼal xa jenaj chik wach nakiwihʼik riʼsil i taqʼanik wilik pan taxaaj «reʼ Rajaawriik i Dios» (Lucas 4:43; Mateo 6:10).

 Reʼ Rey reh i Rajaawriik i Dios, reʼ Jesús, narubʼanam chi ne inwihʼik tuqkiil kʼuxliis chi jun suut i nah akʼal. Reʼ Santo Laj Huuj iruqʼor:

•   «Inwihik i suq kiil kʼuxliis, rukorkiil wach kʼuxliis nikʼ najtiil neerubʼan i rusaqumaal i poh ayuʼ wach akʼal» (Salmo 72:7).

•   «Reʼ reh naa rukoʼliniik reh i tiʼ wilik reʼ i rupahqaaj chi naa rutoobʼjiik [...]. Naa woʼ rukoʼleem taqe chuwach i yiibʼ wach minooj taqe wiiʼ» (Salmo 72:12, 14).

 Yuʼnaak, reʼ irukʼuhtaaj i Jesús keh taqeh kʼachareel rubʼanam chik chi kʼih taqeh kʼachareel reh 239 chi tinamit ne kiwihʼik pan jenaj wach kʼuxliis, eh rutobʼeem taqeh reh chi maʼ ne ta chik inkixowaaj kiibʼ. Reh runabʼjiik ruman, chawil taqeh naʼojbʼal «Rompamos el ciclo del odio».