•   «Reʼ tinamit China irikʼraaj i rutzʼaʼiil i qʼiij eh inkiqʼor woʼ hoq chi reʼ wilih reʼ roox haabʼ chi reʼ siqʼjil qʼeʼ kow»—The Guardian, 7 reh septiembre reh 2022.

•   «Chuwach i hoʼoobʼ haabʼ wilih, chupaam Gran Cuerno de África, reʼ wilih jenaj nimlaj yeʼaabʼ ar África, kʼahchiʼ kikojom rehtʼaal chi qʼeʼ narutzʼabʼiik i qʼiij»—Noticias ONU, 26 reh agosto reh 2022.

•   «Xikʼik chi yeʼjaal reh i tinamit Europa kʼahchiʼ kiyoʼjiik ruum chi inchalik jenaj siqʼjil. Reʼ siqʼjil chalik reh qʼeʼ kow wach, chuwach irubʼanam i 500 haabʼ»—BBC News, 23 reh agosto reh 2022.

 Reʼ inkitzir riij i wilih inkiqʼor chi reʼ siqʼjil wilih maʼ na ta rukuxik wach, na laʼ rukowbʼiik wach. ¿Mi ne inquyeej chi maʼ ne ta chik rilariik i wilih? ¿Chajariik iruqʼor i Santo Laj Huuj?

 Reʼ xuqʼor i Santo Laj Huuj chi riij i qaqʼijiil:

•   «Eh naa ruwihiik i maʼ kʼisa wiʼjaleel […] xa ahaʼ yuuqʼ» (Lucas 21:11).

 Reʼ siqʼjil irubʼan chi inwihʼik i wiʼjalel. Reʼ Santo Laj Huuj ruqʼorom naq chik chi maʼ na ta ruwihʼiik wiʼk eh ruqʼorom naq chik i kʼaxkilal narukʼulariik ruum i wilih, reʼ tiʼ kʼaxik eh reʼ kimik (Apocalipsis 6:6, 8).

 Reʼ Santo Laj Huuj iruqʼor chaaj woʼ reet kʼahchiʼ rukʼulariik i wilih. Ar iruqʼor:

•   «Reʼ winaq maʼ ehchan ta reh i rukʼachariik chi ribʼil riibʼ. Eh maʼ reʼ tee reh naa ruqʼoriik chibʼih jariik i naa ruchaliik chinaah» (Jeremías 10:23).

 Reʼ wilih iraaj ruqʼorom chi reʼ winaq maʼ ne ta irubʼan chi ne iruchaʼjeej i rukʼachariik «chi ribʼil riibʼ» oon ne irubʼan i taqʼanik chi kinaah taqeh tokoom. Eh wilik pech reʼ irubʼan, irubʼan chi ne inchiqik i haʼ eh ne injohtik wach i rutzʼaʼiil i qʼiij.

•   Reʼ taqeh científico inkiqʼor chi reʼ i rubʼanooj i winaq irubʼan chi ne intzʼaʼbʼiik i wach akʼal. Reʼ wilih irubʼan chi maʼxta haʼ chi naah chuʼnchel i akʼal.

•   Reʼ taqeh rasbʼal haʼ wilkeebʼ pan kʼaxkilal. ¿Chaaj woʼ reet? Reʼ rukʼaxariik wach i bʼehomaal eh reʼ inkaaj wihʼik chi ajabʼees inkikʼam cho kʼaxkilal jeʼ rukabʼ i qʼebʼej cheeʼ, inchuwareh wach i teew eh maʼ inkikoj ta chi korik chuʼnchel i wilik wach akʼal.

 Xa reʼ laʼ, reʼ Santo Laj Huuj iruyeew qeh jenaj uʼyinik.

 Reʼ Santo Laj Huuj iruqʼor chi reʼ Dios narukorsam i kʼaxkilal chi riij i haʼ. ¿Nikʼwach narubʼanam i wilih?

1.  1. Reʼ Dios «narusacham kiwach taqeh i kʼahchiʼ kiyojom i akʼal» (Apocalipsis 11:18, TNM). Reʼ Dios narusacham kiwach i kijotʼwik reh i wach akʼal eh inkibʼan chi maʼxta haʼ (2 Timoteo 3:1, 2).

2.  2. «Chupaam i yeʼaabʼ chiq yuuqʼ naa rukahniik chi yeʼaabʼ haʼ, xa ahaʼ chik naa raasjiik chaloq i haʼ» (Isaías 35:1, 6, 7). Reʼ Dios narukorsam wach taqeh kʼaxkilal rukanaam i siqʼjil eh narubʼanam chi reʼ wach akʼal ne inkahnik chi jenaj holohik laj yeʼaabʼ eh maʼ ne ta chik ruchiqiik i haʼ.

3.  3. «Reʼ woʼ hat tikʼuxlanik reh i wach akʼal, i nayeew i jabʼ chinaah […] ruukʼ i reʼ i naakʼisaj taqe johtoq i tik, eh kiwachinik» (Salmo 65:9). Reʼ Dios narukuxisam i wach akʼal, eh ruum i wilih naruwihʼiik wiʼk eh haʼ saq wach keh chuʼnchel.