¡NAʼLIK OQ AWACH!
¿Ne na irubʼan chi maʼ ne ta inwihʼik qʼaqinik chi jun suut i akʼal?—¿Chajariik iruqʼor i Santo Laj Huuj?
Chuwach taqeh treinta haabʼ ikʼinaq, kʼih taqeh kʼachareel xkikʼraaj chi reʼ kʼacharik wach akʼal kʼahchiʼ naq rukorjiik wach eh holohik naq kʼahchiʼ rojiik. Xa reʼ laʼ reʼ taqeh kʼahchiʼ rukʼulariik xujal wach i chajariik naq inkikapaaj.
«Reʼ tinamit Israel eh reʼ jun tzuhbʼ chi musulmán reh i Hezbolá kʼahchiʼ kipeleetohinem kiibʼ chi kʼulaʼt i Lʼibano. Reʼ wilih i rubʼan chi reʼ taqeh kʼachareel kiyoʼjik eh inkikapaaj chi ne inimbʼik wach i qʼaqʼinik ar Gaza eh pan tokoom chik tinamit» (Reuters, 6 reh enero reh 2024).
«Reʼ tinamit Irán kʼahchiʼ rukojom taqeh pan kʼaxkilal taqeh tinamit wilkeebʼ pan oeste. Reʼ taqeh kitoobʼinik reh, kʼahchiʼ kipuhbʼaam reh reh wach yeʼaabʼ eh kitoqʼaaʼ woʼ chik rukorsjiik taqeh bomba. Chuʼnchel i wilih kʼahchiʼ rubʼanam ruum i rutobʼaal i Rusia eh i China» (The New York Times, 7 reh enero reh 2024).
«Reʼ taqeh bomba kʼahchiʼ rukutum i Rusia kʼih i kʼaxkilal kʼahchiʼ rukanaam pan chuʼnchel i Ucrania» (Noticias del ONU, 11 reh enero reh 2024).
«Reʼ rubʼehomaal i China eh i rajaawriik chi qʼaqʼinik kʼahchiʼ rukʼihik wach. Eh reʼ taqeh aj Taiwan kʼahchiʼ kikojom kikʼux ruukʼ i kitaqʼaniik. Ruukʼ chuʼnchel i wilih,eh taqeh rukʼaxkilaal i Pekín eh i Washington irukʼuhtaaj chi naruchaliik jenaj nimlaj kʼaxkilal» (The Japan Times, 9 reh enero 2024).
¿Iruqʼor na i Santo Laj Huuj chi riij taqeh kʼaxkilal wilik chi jun suut i akʼal? ¿Ruum na i wilih ne inwihʼik qʼaqʼinik chi jun suut i akʼal?
Reʼ Santo Laj Huuj ruqʼorom naq chik taqeh kʼahchiʼ rukʼulariik yuʼnaak
Reʼ Santo Laj Huuj maʼ inqʼorik ta chi riij taqeh juʼjun chi qʼaqʼinik kʼahchiʼ rukʼulariik pan qaqʼijil. Xa reʼ laʼ reʼ xuqʼor, reʼ chi naruwihʼiik kʼih taqeh qʼaqʼinik eh chi naresjiik i «tuqkilal chiwach akʼal» (Apocalipsis 6:4, RLLH).
Reʼ ruhuuj i Daniel xuqʼor chi pan «kuxesbʼal wach taqeh qʼiij» Reʼ taqeh nimaq taq taqʼanik nakipeleetohinik reh chi wilik kajaawrik nah akʼal. Reʼ peleeto wilih narukʼuhtaam chi wilik kʼih kitzʼaʼambʼal «chi qʼaqʼinik» eh nakisacham i «kibʼehomal» chi riij i wilih (Daniel 11:40, 42, 43, RLLH).
Jenaj qʼaqʼinik reʼ kʼulik reh
Reʼ Santo Laj Huuj iruqʼor chi reʼ kʼacharik wach akʼal narukowjiik wach. Reʼ Jesús xuqʼor chi naruwihʼiik «jinaj i runimaal tiʼ kʼaxik naa rilariik maʼ jankʼal ta nilarik chaloq i rutzʼuhkriik chee wach akʼal» (Mateo 24:21). Reʼ i «runimaal tiʼ kʼaxik» narukuxiik pan nimlaj qʼaqʼinik rubʼihnaal Armagedón, oon reʼ «pletohinik chupaam i ru nimlaj Qʼiij i Dios xiikʼ naah nimaal rajaawriik» (Apocalipsis 16:14, 16).
Xa reʼ laʼ reʼ Armagedón narukoʼleem i tinamit maʼ na ta rusacham wach, ruukʼ i qʼaqʼinik wilih reʼ Dios narusacham wach i rutaqʼaniik i winaq maj rumahk chuʼnchel i qʼaqʼinik inwihʼik wach akʼal. Reh runabʼjiik nikʼwach i Armagedón narukʼamam cho i tuqkilal, chawil taqeh huuj: