Pan Julio reh 2022 xwih’ik taqeh kansanik ruuk’ puhb’ chi junsut i ak’al:

•   «Noq xkikansaj jenaj político eht’alimaj wach ar Japón [re’ ex ministro Shinzo Abe] xub’an chi xiyo’jik taqeh nimaq tinamit eh sut i wach ak’al, ruum chi ma’ q’e’ ta naq inilarik wach i kansanik ruuk’ puhb’ eh je’ wo’ naq chi wilik wo’ kik’uhb’aal chi riij i rukojariik i puhb’» (10 reh julio reh 2022, The Japan Times).

•   «Jenaj winaq wilik rupuhb’ iruyohb’isaj taqeh k’achareel wilkeeb’ Dinamarca noq irukansaj ixib’ chi k’achareel pan jenaj centro comercial reh i Copenhague» (4 reh julio reh 2022, Reuters).

•   «Ar Sudáfrica: Ju’jun taqeh winaq wilik kipuhb’ ki’ok chi puhb’anik pan jenaj bar reh i ye’aab’ Soweto eh inkikansaj 15 chi k’achareel» (10 reh julio reh 2022, The Guardian).

•   «Ik’inaq chi 220 chi k’achareel xikimik ruuk’ puhb’ ar Estados Unidos noq k’ahchi’ naq kininq’ijem wach i 4 reh julio» (5 reh julio reh 2022, CBS News).

 ¿Ne ta wo’ inqaq’or chi naruponiik i q’iij chi narukuxiik wach i kansanik?¿Chajariik iruq’or i Santo Laj Huuj?

 Re’ Santo Laj Huuj iruq’or chi k’acharik inqab’an pan tz’apaab’ taqeh q’iij, aha’ wii’ re’ taqeh k’achareel xiik’ naah i kijosq’iil, ruum ajre’ ma’xta kik’axooj eh ti’ inkib’an reh taqeh k’achareel (2 Timoteo 3:1, 3). Noq inkib’an i kansanik, inkiyohb’isaj taqeh k’achareel (Lucas 21:11). Xa re’ la’, re’ Santo Laj Huuj irub’ehsaj chi naruponiik i q’iij chi narukuxiik wach i kansanik, eh chi re’ taqeh tinamit «ma’ xta chik i peleto naa rub’aan chupaam i kiye’aab’, eh ma’ xta naa kuuchjiik pankipaat, xasuq chik naa kiwihiik» (Isaías 32:18). Je’re’ noq, ¿nik’wach narusachariik wach i kansanik?

 Re’ Dios narusacham wach i ma’ holohik ta kina’ojb’al eh je’ wo’ chu’nchel i puhb’.

•   «Re’ taqeh i ma’ holohik ta kina’ojb’al narusachariik kiwach chi naah i wach ak’al» (Proverbios 2:22, TNM).

•   «Re’ reh narusacham wach i q’aq’inik chi junsuut i wach ak’al. Irutoq i kutb’al flecha eh iruyoj i chee’ q’as ju’, iruk’at taqeh carreta reh q’aq’inik pan q’aaq’» (Salmo 46:9, TNM).

 Re’ i Dios naruk’uhtaam keh i k’achareel i k’acharik pan tuqkilal eh je’re’ narusacham chi juneliik i kansanik.

•   «Eh ma’ xta chik jot’ooj naa rub’aan. Ma’ xta chik ti’ k’axik chinaah i santo laj yuuq’ Sión, ruum naa runujiik chinaah i wach ak’al i runa’ojb’al i Dios je’ rukab’ noq i nujik i palaw chinaah i wach ak’al» (Isaías 11:9).

•   Je’ wo’ yu’naak, re’ Dios k’ahchi’ ruk’uhtaam keh i tinamit chi ma’ inkichop chik i kipuhb’ eh ma’ inkib’an chik i kansanik, ruum iruq’or chi «re’ kich’ihch’ k’ul q’as naakisutem chi reh arado, re’ i kich’ihch’ q’as ju’ macheet chik naakisutem wii’» (Miqueas 4:3).

 Mi inawaaj anab’eem chi riij irub’ehsaj i Dios, chi re’ wach ak’al ma’xta chik naruyohleem, chawil i huuj «¿Es posible librarse del miedo?».

 Reh chi ne inanab’eej k’isiin oq chik chi riij i rukuxiik wach i kansanik, chawil i huuj «¡Por fin paz en la tierra!».