¡NAʼLIK OQ AWACH!
Kʼaxkilal ruukʼ i wiʼk haʼ chi jun suut i akʼal ruum i qʼaqʼinik eh kowlaj teew eh jabʼ—¿Chajariik iruqʼor i Santo Laj Huuj?
Reʼ qʼaqʼinik ar Ucrania eh reʼ taqeh kʼaxkilal reh i kowlaj teew eh jabʼ kʼahchiʼ ruyeʼem kʼaxkilal reh chi ne inwihʼik wiʼk haʼ chi jun suut i akʼal. Reʼ inilarik pan taqeh tinamit nebʼaaʼ, reʼ ahaʼ wiiʼ kʼaxik chi keh rureqʼariik i aajwaal wach chi keh.
«Reʼ qʼaqʼinik, reʼ kowlaj teew eh jabʼ, chi kʼih tzʼaaq i gasolina eh luz eh tokoom chik kʼaxkilal irubʼan chi wilik taqeh kʼaxkilal ruukʼ taqeh tik eh jach. Irubʼan woʼ chi kʼaxik rutaqʼabjiik kʼuxbʼal pan tokoom tinamit». (António Guterres, jenaj reh i kikʼamwikʼ bʼeeh pan molaabʼ Naciones Unidas, 17 reh julio reh 2023).
«Reʼ taqeh wilik kinaʼojbʼal inkikapaaj chi kʼaxik chik rureqariik i kʼuxbʼal eh chi narujohtik tzʼaaq chi jun suut i akʼal ruum chi reʼ Russia maʼ iraaj ta chik rutaqʼaam i kʼuxbʼal. Chupaam taqeh i tinamit nebʼaaʼ pan norte reh Africa eh i Medio Oriente nakikʼraam i kʼaxkilal wilih». (Atalayar.com, 23 reh julio reh 2023).
Chawil chajariik iruqʼor i Santo Laj Huuj chi riij i kʼaxkilal ruukʼ wiʼk haʼ eh chi riij taqeh qʼiij chalik reh.
Reʼ Santo Laj Huuj xuqʼor cho rubʼiral chi riij i kʼaxkilal ruukʼ i wiʼk haʼ
Reʼ Jesús xuqʼor cho rubʼiral: «Reʼ taqe i nimaq taq tinamit kʼul naa kitoqʼaam peleto chikiwach, eh reʼ i juʼjun seht chi tinamit kʼul naa kitoqʼaam qʼaqʼinik chikiwach. Naa ruwihiik i wiʼjaleel» (Mateo 24:7).
Reʼ huuj Apocalipsis reh i Santo Laj Huuj inqʼorik chi riij kijibʼ chi winaq tzunlik pan kikawayo. Jenaj keh i winaq wilih irujalwacheej i qʼaqʼinik. Eh reʼ winaq xam chi riij irujalwacheej i wiʼjaleel, reʼ noq reʼ taqeh qʼiij wilih reʼ taqeh kʼachareel nakipajam i kikʼuxbʼal eh narujohtik tzʼaaq chuʼnchel.«Xwilow, eh wilik ar jinaj kaway qʼeq riij, eh reʼ tzunlik chiriij wilik jinaj peexo pan qʼabʼ. Eh xnibʼiraj jeʼ jinaj qʼorik […] «Jun paaj chi trigo oon ox paaj chi sebada nariyeʼariik chiriij i jinaj qʼiij chi kamanik»» (Apocalipsis 6:5, 6, Reʼ Loqʼ Laj Huuj).
Reʼ taqeh qʼorooj cho rubʼiral chi riij i kʼaxkilal ruukʼ wiʼk haʼ kʼahchiʼ rojiik eloq wach chupaam taqeh qʼiij, reʼ iruqʼor wiiʼ i Santo Laj Huuj «pantzʼapaabʼ taqe poo wach ree qʼiij» (2 Timoteo 3:1). Reh rureqariik ruman anaʼojbʼal chi riij i «pantzʼapaabʼ taqe poo wach ree qʼiij» eh chi riij taqeh kijibʼ chi winaq tzunlik pan kikwayo reh i Apocalipsis, chawil i video Pan 1914 reʼ kʼacharik wach akʼal xjaljik eh chawil wach i huuj «¿Qué representan los jinetes del Apocalipsis?»
Reʼ Santo Laj Huuj ne tirutobʼeej
Reʼ Santo Laj Huuj irukʼam cho taqeh naʼojbʼal, reʼ ne tirutobʼeej noq wilik kʼaxkilal jeʼ rukabʼ noq kʼih tzʼaaq i kʼuxbʼal oon wilik wiʼjaleel. Chawil juʼjun chi ehtalil pan naʼojbʼal reh jw.org «Cómo vivir con menos».
Reʼ Santo Laj Huuj iruyeew quyʼinik chi riij chi chuʼnchel narukorsjiik wach. Iruqʼor «wihʼoq rikʼihaal i trigo wach akʼal». Jeʼ reʼ noq chi qunchilaal naruwihʼiik qeh aajwaal wach chi qeh (Salmo 72:16, Reʼ Loqʼ Laj Huuj). Reh runabʼjiik kʼisinoq chik chi riij i quyʼinik eh chaaj woʼ reet ne irubʼan chi inqakoj qakʼux ruukʼ, chawil i naʼojbʼal reh jw.org «La esperanza real de un mañana mejor».