¡NAʼLIK OQ AWACH!
Xubʼan chik jenaj haabʼ chi xutikʼaa’ i qʼaqʼinik ar Ucrania—¿Chajariik i uyʼinik iruyeew i Santo Laj Huuj?
Reʼ viernes 24 reh febrero reh 2023 xubʼan jenaj haabʼ chi xutikʼaa’ i qʼaqʼinik ar Ucrania. Juʼjun taqeh inkitzʼir riij i wilih inkiqʼor chi 300 mil chi soldado aj Ucrania eh aj Rusia xikimik oon wilik i tiʼ wilkeebʼ. Jeʼ woʼ inkiqʼor chi xikimik chik 30 mil chi kʼachareel. Xa reʼ laʼ, mareh xikimik chik kʼih chuwach inkiqʼor i keh.
Jeʼ ncho re i qʼaqʼinik wilih maʼ kuxik ta reh.
«Kʼisiin naq maʼ irubʼan i haabʼ eh maʼ inkʼutinik ta naq chi reʼ i qʼaqʼinik wilih kuxik naq reh. Maʼ jenoʼ keh i tinamit wilih kʼahchiʼ relik korik chupaam i qʼaqʼinik wilih oon iraaj chi neʼ inkorjik wach i wilih» (NPR [radio pública nacional de Estados Unidos], 19 reh febrero reh 2023).
Ruum aj reʼ, kʼih tiʼ kikʼux ruum i tiʼ kʼahchiʼ rubʼaan keh i kʼachareel chi jun suut i naah akʼal ruum taqeh i qʼaqʼinik wilih. ¿Chajariik i uyʼinik iruyeew iSanto Laj Huuj? ¿Mi na ta woʼ rukuxiik wach taqeh i qʼaqʼinik?
Jenaj qʼaqʼinik narusacham wach chuʼnchel taqeh qʼaqʼinik
Reʼ Santo Laj Huuj inqʼorik chi riij jenaj qʼaqʼinik reʼ i maʼ na ta rubʼanam i tiʼ keh taqeh kaʼchareel, na laʼ ruko’leem taqeh. Reʼ rubʼihnaal i qʼaqʼinik wilih Armagedón. Reʼ huuj Apocalipsis iruqʼor chi reʼ qʼaqʼinik wilih reʼ «i ru nimlaj Qʼiij i Dios xiikʼ naah nimaal rajaawriik» (Apocalipsis 16:14, 16). Reʼ Dios narukojom i qʼaqʼinik wilih reʼ rusachariik kiwach chuʼnchel taqeh i kitaqʼanik ayuʼ naah akʼal, ruum chi reʼ keh wilik kimahk, ruum chuʼnchel i rubʼanaam i qʼaqʼinik. Reh runabʼjiik nikʼwach i Armagedón narukʼamam cho i tuqkilal, chawil taqeh naʼojbʼal wilih pan jw.org: