¡NAʼLIK OQ QAWACH!
Reʼ taqeh científico inkiqʼor chi ponik chik reh i qʼiij chi narusachariik wach i akʼal—¿Chajariik iruqʼor i Santo Laj Huuj?
Reʼ 24 reh enero reh 2023, reʼ taqeh científico xkiqʼor chi reʼ Reloj reh i Juicio Final maʼ najt ta chik wilik ruukʼ i yejaal aqʼabʼ, a iraaj ruqʼorom chi maʼ najt ta chik wilik chi ne insacharik wach i wach akʼal.
«Ruum i qʼaqʼinik ar Ucrania, eh taqeh amenazas nucleares eh ruum taqeh kʼaxkilal ruum i kowlaj jabʼ eh i kowlaj teew, reʼ taqeh científico xkiqʼor chi maʼ najt ta chik wilik chi ne insahchik wach i akʼal wilih. Reʼ keh inkijalwacheej wach i qʼiij wilih ruukʼ jenaj Reloj reh i Juicio Final, reʼ i maʼ najt ta wilik ruukʼ i yejaal aqʼabʼ» (Servicio internacional de noticias de la agencia AFP).
«Reʼ taqeh científico xkiqʼor chi reʼ martes xikʼik, reʼ Reloj reh i Juicio Final ach 90 segundo naq chik iraaj chi ne imponik i yejaal aqʼabʼ. Maʼ najt ta chik iraaj chi ne imponik i apocalipsis» (ABC News).
«Jenaj tzuhbʼ chi científico jun suut i akʼal xkiqʼor chi reʼ kikimiik taqeh kʼachareel maʼ najt ta chik wilik chaloq» (The Guardian).
¿Maʼ najt ta na chik iraaj chi ne kisacharik wach taqeh kʼachareel eh i akʼal wilih? ¿Mi naqayoʼjiik ruum i chalik reh? ¿Chajariik iruqʼor i Santo Laj Huuj?
Reʼ i chalik reh johtoq chi qawach
Reʼ Santo Laj Huuj iruqʼor chi «reʼ wach akʼal xamaʼ njaljik ta woʼ wach» eh chi chupaam, kʼih taqeh kʼachareel «naa kikʼachariik chi juneliik» (Eclesiastés 1:4; Salmo 37:29). Jeʼreʼ noq, reʼ taqeh kʼachareel maʼ na ta kisacham wach i akʼal, ni xata reʼ wilik chupaam.
Xa reʼ laʼ, reʼ Santo Laj Huuj inqʼorik chi riij i narukʼulariik. Iruqʼor chi reʼ wach akʼal narusachariik wach (1 Juan 2:17).
Mi inawaaj anabʼeem chajariik iraaj ruqʼorom i Santo Laj Huuj noq inqʼorik chi riij i rusachariik wach i akʼal, chawil i naʼojbʼal «¿Se acerca el fin del mundo? ¿Qué es el apocalipsis?».
Reh runabʼjik chajariik iruqʼor i Santo Laj Huuj chi riij i narukʼulariik chi jun suut i akʼal, chawil i naʼojbʼal, «¿Cuándo será el fin del mundo?».
Suq oq akʼux
Reʼ Santo Laj Huuj qojrutobʼeej reh chi suq qakʼux atoobʼ ta wilik kʼaxkilal. ¿Nikʼwach qojrutobʼeej?
Reʼ Santo Laj Huuj iruyeew qanaʼojbʼal reh chi ne inqakoj pan qakʼachariik (2 Timoteo 3:16, 17). Jenaj ehtalil: mi inawaaj anabʼeem nikʼwach ne tirutobʼeej i Santo Laj Huuj reh chi suq akʼux atoobʼ ta wilik kʼaxkilal, chawil i naʼojbʼal «Qué puedo hacer para no preocuparme tanto».
Reʼ Santo Laj Huuj qojrutobʼeej chi «ruyubʼjiik» chi suq qakʼux i chalik reh (Romanos 15:4). Inqʼorik chi riij i naqakʼulum yuʼnaak eh chupaam taqeh qʼiij chalik reh. Reʼ wilih qojrutobʼeej reh chi ne inqakuy chuʼnchel taqeh tiʼ kʼaxik.
Reh chi ne inabʼan rusuqkiil rilariik wach i Santo Laj Huuj, chakʼul jenaj tijinik chi riij i Santo Laj Huuj.
a «Reʼ Reloj reh i Juicio Final jenaj ehtalil irukʼuhtaaj chi ruukʼ i kʼaxkilal kʼahchiʼ kibʼanam taqeh kʼachareel, maʼ najt ta chik iraaj chi ne inkisach wach i akʼal. Reʼ wilih jenaj ehtalil irukʼuhtaaj qeh chajariik naqabʼanam mi inqaaj kʼacharik chupaam i akʼal wilih» (Bulletin of the Atomic Scientists [Boletín de Científicos Atómicos]).