Pan 2022 chi jun suut i akʼal xsacharik 2,24 billones chi dólares ruum taqeh qʼaqʼinik. Xkʼularik i wilih ruum chi reʼ tinamit Rusia xutikʼaaʼ qʼaqʼinik ruukʼ i tinamit Ucrania. Pan abril reh 2023, reʼ Stockholm International Peace Research Institute SIPRI, (Instituto Internacional de Estudios para la Paz de Estocolmo), inqʼorik chi riij i xkʼularik pan 2022.

•   Reʼ sachooj ruum taqeh qʼaqʼinik ar Europa «xjohtik 13 % chupaam i haabʼ 2022. Najtir cho qʼiij xwihʼik jenaj qʼaqʼinik, Guerra Fría i rubʼihnaal, eh chupaam i qʼaqʼinik reʼreʼ kʼih i tumiin xsacharik, eh maʼ jankʼal ta naq inilarik i sachooj wilih ko yuʼnaak».

•   «Inqʼorarik chi reʼ sachooj ruum taqeh qʼaqʼinik ar Rusia xkʼihik 9,2 %. Reʼ tinamit Rusia reʼ naq i rooh tinamit chi jun suut i akʼal reʼ i kʼih naq irusach ruum taqeh qʼaqʼinik, xa reʼ laʼ yuʼnaak inqʼorarik chi xkahnik pan roox».

•   «Maʼxta chik jenoʼ tinamit i kʼih i tumiin irusach reh rukoʼljiik i rutinamiit jeʼ rukabʼ i tinamit Estados Unidos. Reh chuʼnchel i tumiin insacharik chi jun suut i akʼal ruum taqeh qʼaqʼinik, reʼ tinamit Estados Unidos irusach i 39 %».

 «Reʼ sachooj inbʼaan chi jun suut i akʼal ruum taqeh qʼaqʼinik chupaam taqeh haabʼ xiʼikʼik, irukʼuhtaaj chi kʼacharik inqabʼan chupaam jenaj akʼal ahaʼ wiiʼ yohbʼaal eh kʼahchiʼ rukʼihiik i yoʼjik», iruqʼor i doctor Nan Tian, jenaj keh i xitzʼihbʼanik reh i bʼiral SIPRI.

 Reʼ Santo Laj Huuj ruqʼorom naq chik chi na naq ruwihʼiik kʼaxkilal chi kiwach taqeh i nimaq taq tinamit, xa reʼ laʼ iruqʼor woʼ qeh nikʼwach ne inqareq i manlik laj tuqkiil kʼuxliis.

•   Reʼ Santo Laj Huuj iruqʼor chi kʼacharik inqabʼan pan «pantzʼapaabʼ taqe ponoq wach reh i qʼiij»(Daniel 8:19).

•   Chupaam i huuj Daniel qʼorooj naq chik chi chupaam taqeh i qʼiij wilih , reʼ taqeh i nimaq taq tinamit i wilik kajaawriik chi jun suut i akʼal maʼ na ta naq kikʼamam kiibʼ pan otobʼil. Reʼ taqeh i nimaq taq tinamit wilih na naq kokiik chi «qʼaqʼinik» ruum chi na naq kajwaam taqʼanik. Eh reʼ qʼaqʼinik wilih na naq rubʼanam chi ne insacharik wach kʼih «i bʼehomal» oon kʼih i tumiin (Daniel 11:40, 42, 43).

 Mi inawaaj anabʼeem ruman chi riij i qʼorooj cho rubʼiral pan Santo Laj Huuj chi riij i wilih, chawil i video Xooj eloq wach i qʼorooj cho rubʼiral Daniel capítulo 11.

•   Reʼ Santo Laj Huuj iruqʼor chi reʼ Dios narisam i rutaqʼaniik taqeh winaq eh narupahbʼaam i rutaqʼaniik i reh. Reʼ reh «naa rupabʼaam jinaj naa ruwihiik rajaawriik. Maʼ awach ta naa ruqʼatwiik wach i rajaawriik, eh maʼ jaruuj naa rusachariik wach. Reʼ reh maʼ xta naa ruuchjiik ruum i tokoom tinamit naa laʼ rusacham kiwach, reʼ reh naa ruwihiik chi juneliik» (Daniel 2:44).

•   Reʼ Jehová a narubʼanam chi ne inwihʼik i manlik tuqkilal ayuʼ naah akʼal chi junelik. Reʼ taqeh i xa winaq maʼ ne ta inkibʼan rubʼaan i wilih. ¿Nikʼwach narubʼanam i wilih? Reʼ Rajaawriik, reʼ wilik pan taxaaj narusacham chuʼnchel i yiibʼ wach eh i puhbʼanik (Salmo 46:8, 9).

 Mi inawaaj anabʼeem ruman chi riij i narubʼanam i Rajaawriik i Dios, chawil wach i naʼojbʼal «El Reino de Dios traerá paz en abundancia».