Ruum chi reʼ Jesús manlik naq wach i rukʼachariik maʼ xrikʼraj ta taqeh kʼaxkilal reʼ inqikʼraj i hoj kʼachareel. Xa reʼ laʼ, xuyeew rukʼux chi kiij taqeh kʼachareel eh xraaj rutobʼeem taqeh. Maʼ xa ta reʼ wilik pan ruqʼabʼ xubʼan, xubʼan laʼ chuʼnchel i aajwaal wach chi keh taqeh kʼachareel. Qehtʼal chi ruum i ketelinik wachiis, reʼ Jesús xutoob’eej taqeh k’achareel. Ne irubʼan chi neʼ inqil juʼjun taqeh ehtalil chi riij i wilih pan taqeh capítulos 32, 37, 57, eh 99.

Atoob’ ta reh reh wach i kihabʼul, chuʼnchel taqeh kʼachareel, inkijil naq kiibʼ ruukʼ i Jesús, ruum chi reʼ reh xa irub’iraj wo’ naq taqeh eh maʼ irunimbʼisaj ta naq riibʼ. Noq inkil naq i chaqʼlamiil irukʼuhtaaj, chuʼnchel suq naq inkikʼraaj kiibʼ ruukʼ. Qakoj rehtaal nikʼwach xuk’uhtaaj i holohik laj na’ojb’al wilih, chupaam taqeh capítulo 25, 27 eh 95.

Reʼ Jesús xa eliik naq irubʼan rutiij ruukʼ chuʼnchel rukʼux, noq rutkeel naq eh jeʼ woʼ chi kixilak taqeh inkiloqʼej wach i Dios. Xa irubʼan wo’ naq rutiij, maʼ irub’an ta naq rutiij xa re’ wo’ noq irubʼan ruwaʼ. Pan rutiij, intyooxinik naq eh iruyeew naq ruloqʼil i Rajaaw, eh irupahqaaj woʼ naq i rutoobʼal noq wilik naq i chi naruchim pan rukʼachariik. Qatzʼir riij ju’jun taqeh ehtalil chi riij i wilih, chupaam taqeh capítulo 24, 34, 91, 122 eh 123.

Wilik pech, mareh re’ Jesús iraaj naq hiʼlik ruum chi qʼuhteel naq, xa reʼ laʼ, maʼ xubʼan ta ruum chi iraaj naq rutoobʼeem taqeh tokoom. Maʼ xa reʼ ta i reh xukapaaj riibʼ. Ruum aj reʼ, xukanaa’ jenaj ehtalil qeh reh chi ne inqayeew qakʼux chi rubʼanariik i xubʼan i reh. Naqilom nikʼwach xukʼuhtaaj taqeh i naʼojbʼal wilih, chupaam taqeh capítulo 19, 41 eh 52.

Reʼ Jesús xa maʼ xuq’or ta chi ko ruman chi ne inqabʼan i kuyuj mahk, xukʼuhtaaj laʼ ruuk’ i rehtalil, noq xukuy kimahk taqeh rajtahqaneel eh noq xukuy kimahk taqeh tokoom kʼachareel. Qil nikʼwach xubʼan i wilih, chupaam taqeh capítulo 26, 40, 64, 85 eh 131.

Reʼ taqeh qʼorooj cho rubʼiral inkiqʼor naq chi reʼ taqeh judío maʼ na ta naq kajwaam wach i Sikʼooj wach, eh chi reʼ taqeh kiʼixowanik reh na naq kikansam. Xa reʼ laʼ, atoob’ ta je’re’, reʼ reh xukowej rukʼux chi qʼorik chi riij i manlik wach nimanik. Jeʼreʼ xukoj chi qawach i hoj rajtahqaneel jenaj ehtalil chi riij i naqabʼanam noq maʼ inkaaj ta qojkibʼiram oon noq inkixowaaj qawach. Qakapaaj chi riij inkiqʼor taqeh capítulo 16, 72 eh 103.

Reʼ Jesús maʼ jeʼ ta naq rukabʼ taqeh k’achareel, reʼ reh kʼih naq reht’al eh wilik naq runa’ojb’al. Manlik naq wach i ruk’achariik, jeʼreʼ noq, maʼ ajwach ta naq ne irupaj i ransil eh i rukapebʼaal ruukʼ. Xa reʼ laʼ, maʼ xunimbʼisaj ta riibʼ eh xutoobʼeej taqeh kʼachareel. Ne inqatijej chi riij chi maʼ xunimbʼisaj ta riibʼ, chupaam taqeh capítulo 10, 62, 66, 94 eh 116.

Noq reʼ taqeh apóstol eh tokoom chik kʼachareel maʼ inkikʼam ta naq keh ruuk’ i rehtalil i Jesús, oon noq maʼ inkikoj ta naq pan kikʼachariik i runaʼojbʼal, reʼ reh xa wilik wo’ naq ruqʼuniil kuuk’. Kʼih pech, ruuk’ qʼuniil naq iruq’or keh chajariik naq ko ruman chi ne inkitijej reh chi ne naq inkijil kiibʼ ruukʼ i Jehová. Qil juʼjun taqeh ehtalil chi riij nik’wach xukʼuhtaaj i Jesús i qʼuniil, chupaam taqeh capítulo 74, 98, 118 eh 135.