CAPÍTULO 37

¿Mi ne chik irub’an chi ne inuqahsaj nuhaa’?

Chaq’or mi korik i wilih oon ma’ korik ta:

Chu’nchel taqeh ajnimaneel ko ruman chi ne inkiqahsaj kihaa’.

□ Korik

□ Ma’ korik ta

Re’ qahsanik ha’ irub’an chi ma’ ne ta chik qojmahkunik.

□ Korik

□ Ma’ korik ta

Re’ qahsanik ha’ re’ rutihk’iik i b’ehik pan b’eeh reh i ko’lembʼal iib’.

□ Korik

□ Ma’ korik ta

Mi ma’ qahsamaj nuhaa’, reʼ Dios ma’ ne ta iruq’at q’orik chi nunaah.

□ Korik

□ Ma’ korik ta

Re’ taqeh wamigo k’ahchi’ chik kiqahsam kihaa’, na wo’ nub’anam i hin.

□ Korik

□ Ma’ korik ta

¿Tik’acharik na je’ rukab’ iruq’or i Santo Laj Huuj? ¿Hat na ramigo i Dios? ¿Tiq’orik na chi riij inakoj wach kuuk’ taqeh tokoom? Mi k’ahchi’ chik ab’anam chu’nchel i wilih eh ko majaa’ inaqahsaj ahaa’, mareh k’ahchi’ akapaam rub’aan. Xa re’ la’, peet ko ruman chi ne inakoj rehtaal mi ne chik irub’an chi ne inaqahsaj ahaa’. Re’ i ne tirutob’eej reh runab’jiik i wilih, re’ rilariik chajariik xakoj chupaam taqeh pahqanik inkan pan rutihk’iik i na’ojb’al wilih.

● Chu’nchel taqeh ajnimaneel ko ruman chi ne inkiqahsaj kihaa’.

Korik. Re’re’ xuq’or i Jesús chi nakib’anam taqeh rajtahqaneel (Mateo 28:19, 20). Re’ reh xuqahsaj wo’ ruhaa’. Ruum aj re’, mi inawaaj wih’ik chi rajtahqaneel i Cristo, ko ruman chi ne inaqahsaj ahaa’ noq hat chik kow pan uxlab’al eh noq ch’iklik ak’ux chi inawaaj chik ab’anam i wilih.

● Re’ qahsanik ha’ irub’an chi ma’ ne ta chik qojmahkunik.

Ma’ korik ta. Re’ qahsanik ha’ jenaj ehtalil reh chi re’ taqeh k’achareel ne inkil chi xaq’ahsaj chik ak’achariik reh i Jehová. Eh inqaq’ahsaj i qak’achariik reh i Jehová ruum chi inqaaj k’acharik je’ rukab’ iraaj i reh, ma’ inqab’an ta i wilih xa ruum chi inqik’raaj chi re’ wilih qojrumin reh chi ma’ ne ta inqab’an i yiib’ wach, reʼ mareh imponik chi qawach.

● Re’ qahsanik ha’ re’ rutihk’iik i b’ehik pan b’eeh reh i ko’lemb’al iib’.

Korik. Je’ rukab’ iruq’or i Santo Laj Huuj, re’ qahsanik ha’ aajwaal wach reh chi ne inqako’leej qiib’ (1 Pedro 3:​21). Xa re’ la’, ma’ je’ ta rukab’ noq ne inqapahqaaj jenaj seguro re’ i ne qojruko’leej pan reh reh wach k’axkilal. Na la’ qaqahsam qahaa’ ruum chi inqak’ax i Jehová eh inqaaj kamanik chuwach ruuk’ chu’nchel qak’ux (Marcos 12:29, 30).

● Mi ma’ qahsamaj nuhaa’, re Dios ma’ ne ta iruq’at q’orik chi nunaah.

Ma’ korik ta. Pan Santiago 4:​17 iruq’or chi «awach i reht’al i holohik, eh ma’ rub’an taj, ru mahk i rukoj», atoob’ ta qaqahsam chik qahaa’ oon ma’chih. Ruum aj re’, chakapaaj: ¿Inareq na chi riij chajariik iraaj i Dios chi ne inab’an? ¿Hat na kow pan uxlab’al reh chi ne inatz’ir riij ak’achariik? Mi je’ re’, mareh ko ruman chi ne tiq’orik ruuk’ atuut awajaaw oon ruuk’ jeno’ ajnimaneel kow pan uxlab’al. Re’ keh ne tikitob’eej reh chi ne inaqahsaj ahaa’.

● Re’ taqeh wamigo k’ahchi’ chik kiqahsam kihaa’, na wo’ nub’anam i hin.

Ma’ korik ta. Ko ruman chi ne inaqahsaj ahaa’ ruum chi inelik pan ak’ux rub’anariik (Salmo 110:3). Eh ne irub’an chi ne inab’an i wilih noq areqem chik chi riij chajariik iraaj ruq’orom chi hat chik testigo reh Jehová eh noq aweht’aliim chik chajariik na’ab’anam noq hat chik testigo reh Jehová (Eclesiastés 5:​4, 5).

Jenaj na’ojb’al xti q’e’ ko ruman

Re’ qahsanik ha’ ne irujal ak’achariik eh ne irub’an chi ne inak’ul k’ih taqeh kooch. Xa re’ la’, iruyeew wo’ chanaah jenaj kamanik. ¿Aha’ wilik i kamanik wilih?. Rub’anariik chu’nchel i xaq’or reh i Jehová noq xaq’ahsaj ak’achariik reh.

¿Mi na chik aqahsam ahaa’? Mi je’ re’, qeht’al chi suq ak’ux ruum i wilih. Q’e’ looq’ chi qeh kamanik chuwach i Jehová ruuk’ chu’nchel qak’ux eh ruk’uhtjiik reh chi qojk’acharik reh rub’anariik chajariik iraaj i reh (Mateo 22:36, 37).

CHUPAAM I JENAJ CHIK CAPÍTULO

Chawil nik’wach ne inareq rusuqkiil ak’achariik.

REʼ IRUQʼOR I SANTO LAJ HUUJ

«Chaq’asaj taq awiib’ chi k’achlik mayiij, santohimaj je’ rukab’  imponik chuwach i Dios. Re’ i wili i korik laj loq’inik taq naa a’nam» (Romanos 12:1).

NE IRUB’AN CHI NE INAB’AN I WILIH

Chapahqaaj reh atuut awajaaw ajwach i hermano reh i molaabʼ ne tirutob’eej reh chi ne tik’ihik pan uxlab’al (Hechos 16:​1-3).

¿MI AWEHT’AL NAQ I WILIH?

Re’ qahsanik ha’ jenaj «ehtalil» ko ruman reh chi ne inako’leej awiib’ (Ezequiel 9:​4-6).

¡JU’JUN TAQEH KAMANIK!

Chakapaaj chi riij ju’jun taqeh na’ojb’al chi riij i Santo Laj Huuj ko ruman chi ne inareq chi riij chi korik reh chi ne inaqahsaj ahaa’: ․․․․․

Chakapaaj chajariik inawaaj apahqaam reh atuut awajaaw chi riij i wilih: ․․․․․

RAAJ I HAT, ¿CHAJARIIK INAKAPAAJ?

● ¿Chaaj wo’ reet ko naʼakapaam mi na’aqahsam ahaa’?

● ¿Chaaj wo’ reet ju’jun taqeh k’ijool inkiqahsaj kihaa’ noq ko majaa’ inkikorsaj kiib’ chi korik?

● ¿Chaaj wo’ reet wilik taqeh k’ijool inkuyʼeej k’ih haab’ reh ruq’ahtesjiik i kik’achariik reh i Jehová eh reh ruqahsjiik kihaa’?

[Re’ taqeh q’orik koruman]

Ruk’ulik pan nuk’ux chi xnuqahsaj chik nuhaa’ kirutob’eej reh chi ne inub’an i holohik eh ma’ ne ta inumin wiib’ pan k’axkilal»​​(Noemí).

[Re’ cuadro]

Ju’jun taqeh pahqanik chi riij i qahsanik ha’.

¿Chajariik iruk’uhtaaj i qahsanik ha’? Noq inamin ikoq awiib’ pan ha’, re’ wilih je’ rukab’ i kimik, ruum chi inakanaa’ i k’acharik wilik naq aweh najtir. Eh noq ti’elik pan ha’, re’ wilih je’ rukab’ noq ne tik’acharik wo’ chik, xa re’ la’ yu’naak na’akojom ak’achariik reh rub’anariik chajariik iraaj i Jehová.

¿Chajariik iraaj ruq’orom ruq’ahtesjiik ak’achariik reh i Jehová? Iraaj ruq’orom chi ma’ re’ ta chik i hat i aj ehchan reh ak’achariik, xaq’ahsaj la’ chik reh i Jehová (Mateo 16:24). Ruum aj re’, noq ko majaa’ inaqahsaj aha’, ko ruman chi ne inab’an jenaj atiij chuwach i Jehová aha’ wii’ inaq’or reh chi na’ab’anam chajariik iraaj i reh.

¿Chajariik nanub’anam noq ko majaa’ inuqahsaj nuhaa’? Na’ak’achariik je’ rukab’ iruq’or i Santo Laj Huuj eh na’aq’oriik chi riij inakoj wach kuuk’ taqeh k’achareel. Na wo’ ruwih’iik pan amigohiil ruukʼ i Dios eh wilih naʼakowbʼisam ruukʼ i tijinik eh tiij. Ko ruman chi ne inaloq’ej wach i Jehová ruum chi jeʼ reʼ inawaaj ab’anam, ma’ na ta ab’anam xa ruum chi inkiq’or aweh.

¿Jarub’ haab’ ko ruman chi ne inwih’ik weh reh chi ne inuqahsaj nuhaa’? Re’ ahab’ul ma’ reʼ ta i xti q’e’ ko ruman. Reʼ q’e’ ko ruman, reʼ chi reʼ hat ne inareq chi riij chajariik iraaj ruq’orom chi na’aq’ahsam ak’achariik reh i Jehová.

¿Chajariik ne inub’an mi inwaaj chik nuqahsam nuhaa’, xa re’ la’ re’ taqeh wajaaw inkiq’or weh chi ko na wuyʼeem k’isiin? Mi re’ keh inkikapaaj chi ko wilik inawaaj reh rukojariik pan ak’achariik taqeh i na’ojb’al iruyeew i Santo Laj Huuj, chab’iraj taqeh eh chakoj taqeh i q’iij re’re’ reh chi ne tiponik chi hat manlik ramigo i Dios (1 Samuel 2:26).

[Re’ cuadro]

Página reh ejercicios oon actividades

¿K’ahchi’ na akapaam chi naʼaqahsam ahaa’?

Re’ taqeh pahqanik wilih ne kitob’inik aweh reh runab’jiik mi k’ahchi’ ab’anam i aajwaal wach reh rureqariik i wilih. Peet, ¡maʼ insahchik pan akʼux rilariik wach taqeh texto reh runabʼjiik chi riij taqeh pahqanik wilih!

¿Mi inakoj ak’ux ruuk’ i Jehová? ¿Nik’wach kʼahchiʼ akʼuhtaam i wilih? (Salmo 71:5) ․․․․․

¿Mi aweht’al aha’ wilik i holohik eh aha’ wilik i ma’ holohik ta? ¿Jank’al ak’uhtaam i wilih? (Hebreos 5:14) ․․․․․

¿Jarub’ pech inab’an atiij chuwach i q’iiji? ․․․․․.

¿Chi riij chajariik tiq’orik pan atiij? ¿Mi inak’uhtaaj ruuk’ taqeh atiij chi inak’ax i Jehová? (Salmo 17:6) ․․․․․

¿Chajariik chik inawaaj ab’anam reh chi holohik taqeh atiij? ․․․․․

¿Mi inawil wach i Santo Laj Huuj rajlal q’iij? (Josué 1:8) ․․․․․

¿Chajariik inatz’ir riij noq inatijej awiib’ chi awutkeel? ․․․․․

¿Chajariik chik inawaaj ab’anam pan atijinik inab’an chawutkeel? ․․․․․

¿Inab’an na i q’oroj k’uhb’aal chi korik? (Jenaj ehtalil: ¿Mi ne inab’an q’orik chi riij taqeh na’ojb’al reh i Santo Laj Huuj re’ ko ruman chi ne inanab’eej? ¿Mi tiponik wo’ chik kuuk’ taqeh k’achareel xkib’iraj i k’uhb’aal? ¿Mi k’ahchi’ asik’im ajwach ne iraaj tijinik chi riij i Santo Laj Huuj awuukʼ?)

□ Hoo’ □ Ma’chih ta

¿Mi ti’elik chi q’oroj k’uhb’aal, atoob’ ta re’ atuut awajaaw ma’ ki’elik ta? (Hechos 5:42)

□ Hoo’ □ Ma’chih ta

¿Chajariik chik inawaaj ab’anam pan q’oroj k’uhb’aal? (2 Timoteo 2:15) ․․․․․

¿Tiwih’ik na pan chu’nchel taqeh moloj iib’, oon xa ko nik’ tiponik? (Hebreso 10:25) ․․․․․

¿Nik’wach titob’inik chupaam taqeh moloj iib’? ․․․․․

Mi yeʼooj qʼabʼ aweh ruum atuut awajaaw ojik chupaam taqeh moloj iib’, ¿tiʼooj na noq reʼ keh maʼ inkib’an ta ojik?

□ Hoo’ □ Ma’chih ta

¿Suq na ak’ux chi rub’anariik chajariik iraaj i Dios? (Salmo 40:8)

□ Hoo’ □ Ma’chih ta

¿Inkʼulik na pan akʼux junriim oq noq maʼ xabʼan chajariik xatkimi chi rub’anariik taqeh awuchʼihiil pan escuela? (Romanos 12:2) ․․․․․

¿Chajariik ne inab’an reh chi ma’ jaruuj ne inakanaa’ ruk’axariik i Jehová? (Judas 20, 21) ․․․․․

Mi re’ atuut awajaaw oon re’ taqeh awamigo inkikanaa’ i Jehová, ¿mi ne wo’ naq inakanaa’ i hat? (Mateo 10.36, 37)

□ Hoo’ □ Ma’chih ta

[Ehtalil]

Re’ qahsanik ha’ je’ rukab’ i kaxaro: Na’aye’em ruloq’il eh na’akapaam riij chi korik