PART 7
¿Awach i Jesús?
Reʼ Jehová xutaqʼaaj i Jesús wach akʼal (1 Juan 4:9)
Noq ko majaʼ wilik i Adán, reʼ Jehová xuyeew rukʼachariik jenaj ángel wilik rajaawriik. Reʼ reh iraaj chi ne inqabʼiraj i ángel wilih.
Reʼ Dios xubʼan chi reʼ ángel wilih, Jesús rubʼihnaal, ne naq inasjik wach akʼal pan tinamit Belén. Reʼ rutuut María jenaj naq qʼahxoq maʼ rehtʼaliim ta wach qʼoʼrinik winaq (Juan 6:38).
Noq xwihʼik wach akʼal, reʼ Jesús xukʼuhtaaj chi ajkʼaxool naq jeʼ rukabʼ i Jehová. Ruum ajreʼ, reʼ taqeh i kristyaan inkaaj naq wihʼik ruukʼ. Reʼ reh maʼ inyoʼjik ta naq chi ruqʼorariik i korik chi riij i Dios.
Reʼ Jesús xutobʼeej taqeh kristyaan, xa reʼ laʼ kʼih xkixowaaj wach (1 Pedro 2:21-23)
Reʼ ajkʼamal kibʼeeh taqeh aj judío inkixowaaj naq wach i Jesús ruum chi xuqʼor chi inkikʼuhtaaj naq i chukuj qʼorik eh maʼ holohik ta naq i kinaʼojbʼal.
Xroqʼomaaj woʼ taqeh yowaabʼ eh wilik i kamnaq xuksaj taqeh.
Reʼ taqeh ajkʼamal bʼeeh reʼreʼ xkiʼan chi reʼ taqeh romano ne naq inkiqʼoj eh ne naq inkikansaj i Jesús.
