LECCIÓN 04
¿Ajwach i Dios jeʼ rukabʼ iruqʼor i Santo Laj Huuj?
Pan rutihkʼiik cho i kʼacharik, reʼ taqeh kʼachareel kʼih taqeh dios kiloqʼem wach. Xa reʼ laʼ reʼ Santo Laj Huuj inqʼorik chi riij jenaj Dios «xiikʼ naah nimaal wach chikiwach chuʼnchel i tokoom dios» (2 Crónicas 2:5). ¿Ajwach i Dios reʼreʼ? ¿Eh chaaj woʼ reet xiikʼ naah nimaal wach chi kiwach chuʼnchel taqeh dios reʼ inkiloqʼej i kʼachareel? Reʼ Dios iraaj chi ne natijej chi riij, chupaam i tijinik wilih.
1. ¿Chajariik i rubʼihnaal i Dios iruqʼor i Santo Laj Huuj? ¿Eh chajariik xubʼan, reh chi ne inqanabʼeej i rubʼihnaal?
Reʼ Dios iruyeew riibʼ chi nabʼjik pan Santo Laj Huuj noq iruqʼor: «Reʼ hin Jehová, reʼ wilih i nubʼihnaal» (chawil Isaías 42:5, 8, TNM). Reʼ inkitzʼir riij i qʼorbʼal hebreo inkiqʼor chi reʼ bʼihnaal Jehová iraaj ruqʼorom «reʼ reh irubʼan chi ne inkʼularik». Reʼ Jehová iraaj chi ne inqanabʼeej wach i rubʼihnaal (Éxodo 3:15). ¿Chaaj woʼ reet qehtʼal? Ruum chi reʼ reh xubʼan chi reʼ rubʼihnaal ne inkan ikʼinaq chi wuquubʼ mil pech a pan Santo Laj Huuj. Jehová i rubʼihnaal «i Dios pan taxaaj, eh jeʼ woʼ wach akʼal» (Deuteronomio 4:39).
2. ¿Ajwach i Jehová iruqʼor qeh i Santo Laj Huuj?
Reʼ Santo Laj Huuj iruqʼor chi, chi kixilak chuʼnchel taqeh dios reʼ inkiloqʼej taqeh kʼachareel, xa reʼ woʼ i Jehová i korik Dios. ¿Chaaj woʼ reet? Wilik kʼih ruwiiʼ. Reʼ Jehová xti wilik rajaawriik, xa reʼ woʼ reh nim rawajaawriik chi naah chu’nchel i wach ak’al (chawil Salmo 83:18, TNM). Reʼ reh «xti nim rajaawriik», reʼ wilih iraaj ruqʼorom chi wilik rajaawriik reh rubʼanariik chuʼnchel i imponik chuwach. Ajtzʼuhkrisaneel woʼ hoq, reʼ reh xubʼan «chuʼnchel i chibʼih jariik wilik»: reʼ taxaaj akʼal eh chuʼnchel i wilik rukʼachariik wach akʼal (Apocalipsis 4:8, 11). Reʼ Jehová xa wilik woʼ cho najtir eh juneliik naruwihʼiik (Salmo 90:2).
CHATZʼIR RIIJ I KʼAHCHIʼ ATIJEM
Qilow chaaj woʼ reet maʼ jenaj ta wach i rubʼihnaal i Dios ruukʼ inqʼorarik reh, jenaj bʼihnaal xa reʼ woʼ reh inehchanik reh. Naʼatijem nikʼwach iruyeew chi nabʼjik i rubʼihnaal eh chaaj woʼ reet iraaj chi ne nanabʼeej.
3. Reʼ Dios kʼih inqʼorarik reh, xa reʼ laʼ wilik jenaj rubʼihnaal
Reh rilariik chaaj woʼ reet maʼ jenaj ta wach i rubʼihnaal jenoʼ kʼachareel ruukʼ inqʼorarik reh, chawil taq i VIDEO eh tiqʼoroq taq chi riij:
-
¿Chaaj woʼ reet maʼ jenaj ta wach jenoʼ bʼihnaal ruukʼ chi xa ne inqaqʼor jaaw?
Reʼ Santo Laj Huuj iruqʼor chi reʼ taqeh kʼachareel kʼih inkikoj chi kidios eh chi kajaaw. Chawil taq i Salmo 136:1-3 eh tiqʼoroq taq chi riij:
-
¿Ajwach i Dios «chi kinaah taqeh dios» eh i «Ajabʼees chi kinaah taqeh ajabʼees»?
4. Reʼ Jehová iraaj chi ne nanabʼeej i rubʼihnaal eh ne inaqʼor
¿Nikʼwach noq qehtʼal chi reʼ Jehová iraaj chi ne nanabʼeej i rubʼihnaal? Chawil taq i VIDEO eh tiqʼoroq taq chi riij:
-
¿Iraaj na i Jehová chi ne nanabʼeej i rubʼihnaal? ¿Chaaj woʼ reet?
Reʼ Jehová iraaj chi reʼ taqeh kʼachareel ne inkiqʼor i rubʼihnaal. Chawil taq Romanos 10:13 eh tiqʼoroq taq chi riij:
-
¿Chaaj woʼ reet aajwaal wach ruqʼorariik i rubʼihnaal i Dios, Jehová?
-
¿Nikʼwach inawikʼraaj awiibʼ noq jenoʼ kʼachareel iruqʼor abʼihnaal?
-
Mi reʼ hat xaqʼor i rubʼihnaal i Jehová, ¿chajariik irikʼraaj?
5. Reʼ Jehová iraaj chi hat ramigo
Jenaj ixoq aj Camboya, Soten i rubʼihnaal xuqʼor chi noq xutijej i rubʼihnaal i Dios xujal i rukʼachariik. Chawil taq i VIDEO eh tiqʼoroq taq chi riij:
-
Jeʼ rukabʼ xqil pan video, ¿nikʼwach xujal i rukʼachariik i Soten runabʼjiik i rubʼihnaal i Dios?
Reh chi hoj ramigo jenoʼ kʼachareel, peet naqanabʼeem i rubʼihnaal. Chawil taq i Santiago 4:8 reʼ rutihkʼiik eh tiqʼoroq taq chi riij:
-
Jeʼ rukabʼ i xawil pan texto ¿chajariik iraaj i Jehová chi ne nabʼan?
-
¿Inaqʼor na i hat, chi reʼ runabʼjiik eh ruqʼorariik i rubʼihnaal i Dios ne tirujil ruukʼ? ¿Chaaj woʼ reet inaqʼor?
REʼ INKIQʼOR I JUʼJUN: «Ruum chi xa jenaj i Dios xa nikʼpaʼ wach ne inqaqʼor reh».
-
¿Chʼiklik na akʼux chi reʼ rubʼihnaal i Dios, Jehová?
-
¿Nikʼwach ne nakʼuhtaaj keh i tokoom i rubʼihnaal i Dios, eh chi ne inkiqʼor?
KʼOLOQ PAN AKʼUX
Jehová i rubʼihnaal i kʼachlik Dios. Reʼ reh iraaj chi ne inqanabʼeej i rubʼihnaal eh ne inqaqʼor, reh chi hoj ramigo.
Reʼ xkahnik pan akʼux
-
¿Chaaj woʼ reet i Jehová maʼ jeʼ ta rukabʼ taqeh tokoom dios, reʼ inkiyeew ruloqʼil taqeh kʼachareel?
-
¿Chaaj woʼ reet ko ruman chi ne inqaqʼor i rubʼihnaal i Dios?
-
¿Iraaj na i Jehová chi hat ramigo? ¿Chaaj woʼ reet noq inaqʼor?
CHAREQ RUMAN
Chatzʼir riij i hoʼoobʼ chi ehtalil irukʼuhtaaj chi wilik jenaj Dios.
Chanabʼeej chaaj woʼ reet inqakapaaj chi reʼ Dios xa wilik woʼ naq cho najtir.
«Reʼ Dios xa wilik woʼ naq cho najtir» (La Atalaya, 1 reh agosto reh 2014)
Chawil chaaj woʼ reet ko ruman ruqʼorariik i rubʼihnaal i Dios atoobʼ ta maʼ qojchol ta ruqʼorariik nikʼwach tzʼihbʼamaj najtir.
¿Ko ruman na chi ne inqaqʼor i rubʼihnaal i Dios? Chawil chaaj woʼ reet inqaqʼor chi xa jenaj woʼ i rubʼihnaal i Dios.
«¿Jarubʼ i bʼihnaal wilik reh i Dios?» (Naʼojbʼal reh jw.org)
a Pan apéndice A4 pan La Biblia. Traducción del Nuevo Mundo ne nareq ruman chajariik iraaj ruqʼorom i rubʼihnaal i Dios eh chaaj woʼ reet pan juʼjun Santo Laj Huuj xkisaj i bʼihnaal reʼreʼ.
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
