Reʼ Jehová xuyeew jenaj qakooch: reʼ taqeh 66 chi huuj wilik chupaam i Santo Laj Huuj. Xa reʼ laʼ mareh ne naqʼor: «¿Nikʼwach xkorsjik i Santo Laj Huuj? ¿Ajwach eh i kapebʼal wilik chupaam?». Reh runabʼjiik chi riij taqeh pahqanik wilih, qil nikʼwach i Santo Laj Huuj xkʼuloq quuk’.

1. Reʼ taqeh winaq xitzʼihbʼanik reh i Santo Laj Huuj, ¿xa reʼ laʼ chaaj woʼ reet inqaqʼor chi rukapebʼaal i Dios wilik chupaam?

40 chi winaq tokoom i kikamaj eh kiwiiʼ xkitzʼihbʼaaj i Santo Laj Huuj. Xkitoqʼaa rutzʼihbʼjiik pan haabʼ 1513 noq ko majaaʼ inkʼulik i Cristo eh xkikohlaaj rutzʼihbʼjiik pan haabʼ 98 reh i qaqʼijil. Jeʼ reʼ noq xchahmik 1.600 haabʼ rutzʼihbʼjiik. Atoobʼ ta je’ re’, reʼ Santo Laj Huuj jenaj wach iruqʼor i wilik chupaam. ¿Nikʼwach noq jeʼ reʼ? Ruum chi rukapebʼaal i Dios (chawil 1 Tesalonicenses 2:13). Reʼ taqeh winaq wilih maʼ reʼ ta kikapebʼaal xkitzʼihbʼaaj. Rajkamanoom laʼ i Dios taqeh, «parubʼihnaal i reh xiqʼorik, eh reʼ i Santolaj Uxlabʼal xkʼamwik cho kibʼeeh» (2 Pedro 1:​21). a Reʼ Dios ruukʼ i rusanto laj uxlabʼal xubʼan chi reʼ taqeh winaq xkitzʼihbʼaaj i rukapebʼaal (2 Timoteo 3:16).

2. ¿Xa reʼ ta woʼ i hat ne inwihʼik jenoʼ aSanto Laj Huuj? ¿Ajwach chik?

Reʼ taqeh kʼachareel keh i «nimaq taq tinamit, taqeh tribu, taqeh reh reh wach kiqʼorbʼal eh taqeh kokʼ tinamit» ne inwihʼik jenoʼ kiSanto Laj Huuj eh ne kitobʼjik ruum taqeh holohik qʼorik wilik chupaam (chawil Apocalipsis 14:6, TNM). Reʼ Dios xubʼan chi ne inwihʼik pan kʼih qʼorbʼal. Pan korik, xa reʼ woʼ i huuj wilih kikʼsam pan kʼih qʼorbʼal. Chuʼnchel i kʼachareel wach akʼal ne inkinabʼeej iruqʼor i Santo Laj Huuj, maʼxta qʼorik reh ahaʼ paʼ kipatinik oon chajariik i kiqʼorbʼal.

3. ¿Ajwach xukoj i Jehová reh chi maʼ ne ta insahchik wach i Santo Laj Huuj?

Reʼ Santo Laj Huuj xtzʼihbʼjik wach rutzʼuhmal chikop eh ruukʼ taqeh rooq jenaj chʼahn oon kʼicheʼ rubʼihnaal papiro. Reʼ taqeh wilih maʼ najt ta inkikuy. Xa reʼ laʼ reʼ taqeh winaq reʼ inkaaj naq wach i Santo Laj Huuj xkitzʼhbʼaaj woʼ chik chi korik reʼ tzʼihbʼamaj naq chik. Eh juʼjun taqeh winaq xkiyeew i kikʼachariik reh rukoʼljiik i Santo Laj Huuj. Atoobʼ ta kʼih kʼachareel wilik kajaawriik xkaaj kisacham wach, reʼ Jehová maʼ xuyeew ta qʼabʼ chi jenoʼ ne inqʼatwik reh, reh qʼorik quukʼ. Reʼ Santo Laj Huuj iruqʼor: «Eh reʼ i ruqʼoral i QaJaaw Dios, maʼ jaruuj naa rikʼiik wach» (Isaías 40:8).

 CHATZʼIR RIIJ I KʼAHCHIʼ ATIJEM

5. Reʼ Santo Laj Huuj maʼ xsahchik ta wach atoobʼ ta xikʼik pan kʼih kʼaxkilal

 6. Jenaj huuj keh chuʼnchel i kʼachareel

Xa reʼ woʼ i Santo Laj Huuj ikʼsamaj pan kʼih qʼorbʼal eh inpuhkaljik chi kʼihaal. Chawil taq i Hechos 10:34, 35 eh tiqʼoroq taq chi riij:

• ¿Chaaj woʼ reet inikʼsjik pan tokoom qʼorbʼal i Santo Laj Huuj eh inpuhkaljik pan kʼih yeʼaabʼ?

• Ruukʼ inawil pan qajik, ¿chajariik imponik chawach chi riij i Santo Laj Huuj?

 KʼOLOQ PAN AKʼUX

Reʼ Santo Laj Huuj ruqʼorbʼal i Dios, eh reʼ reh rubʼanam chi reʼ taqeh kʼachareel ne inwihʼik jenaj keh eh ne inkireq chi riij.

Reʼ xkahnik pan akʼux

• ¿Chajariik xukoj i Dios reh chi reʼ taqeh winaq ne inkitzʼihbʼaaj i Santo Laj Huuj?

• ¿Chajariik chi kʼaxkilal xikʼik wiiʼ i Santo Laj Huuj? Eh ¿Chaaj woʼ reet maʼ xsahchik ta wach? ¿Eh chajariik ne naqʼor chi riij, chi ikʼsamaj pan kʼih qʼorbʼal eh chi riij i rupuhkaljiik?

• ¿Chajariik inawikʼraaj noq inanabʼeej chi reʼ Dios iraaj qʼorik awuukʼ?