LECCIÓN 07
¿Nikʼwach i Jehová?
¿Nikʼwach i Jehová noq inakapaaj i hat? ¿Inakapaaj na chi najt wilik quukʼ jeʼ rukabʼ taqeh chʼumiil pan taxaaj? ¿Oon inakapaaj chi wilik rajaawriik xa reʼ laʼ inaqʼor chi maʼxta irikʼraaj jeʼ rukabʼ jenaj kowlaj teew? ¿Pan korik nikʼwach i Jehová? Pan ruqʼorbʼal reʼ Santo Laj Huuj, reʼ Jehová irukʼuhtaaj qeh juʼjun taqeh runaʼojbʼal eh irukʼuhtaaj woʼ qeh chi qojraaj.
1. ¿Chaaj woʼ reet maʼ inqil ta wach i Dios?
«Reʼ Dios xa Uxlabʼal woʼ hoq» (Juan 4:24). Reʼ Jehová maʼ reʼ ta tibʼkal eh bʼaqil. Reʼ reh jenaj uxlabʼal wilik cho pan taxaaj eh reʼ ruyeʼaabʼ maʼ inqil ta woʼ wach.
2. ¿Ahaʼ wilik i juʼjun chi naʼojbʼal wilik reh i Jehová iruqʼor i Santo Laj Huuj?
Atoobʼ ta maʼ inqil ta wach i Jehová, noq inqanabʼeej wach inqaaj wach ruum chi reʼ reh holohik taqeh runaʼojbʼal. Reʼ Santo Laj Huuj iruqʼor chi reʼ Jehová: «Imponik chuwach i korik. Eh reʼ taqe korik wach kikʼux ruukʼ i reh maʼ rukanaaʼ ta taqe» (Salmo 37:28). Eh jeʼ woʼ hoq «aj keteloom wachiis, atoobʼ wach rukʼux», ruukʼ taqeh kʼachareel kiʼikʼik pan tiʼ kʼaxik (Santiago 5:11). «Reʼ QaJaaw Dios [Jehová] xa wilik woʼ kuukʼ chi kitoobʼjiik i tiʼ wilik i kánima. Eh i rukoʼleej taqe i xamaʼ naa ta chik keliik chupaam i tiʼ kʼaxik noq inkikʼraaj» (Salmo 34:18). ¿Mi awehtʼal naq chi reʼ hoj ne inqasuqbʼisaj oon ne inqatiʼbʼisaj rukʼux i Jehová ruukʼ inqabʼan? Reʼ kʼachareel reʼ maʼ rubʼan taj i holohik irutiʼbʼisaj rukʼux i Jehová (Salmo 78:40, 41). Xa reʼ laʼ, reʼ kʼachareel reʼ rubʼan i holohik irusuqbʼisaj rukʼux i Jehová (chawil Proverbios 27:11).
3. ¿Ruukʼ chajariik irukʼuhtaaj qeh i rukʼaxooj i Jehová?
Reʼ naʼojbʼal reʼ xti aajwaal wach wilik reh i Jehová, reʼ kʼaxooj. «Reʼ Dios reh aj Kʼaxool» (1 Juan 4:8). Reʼ Jehová irukʼuhtaaj qeh i rukʼaxooj ruukʼ i Santo Laj Huuj eh jeʼ woʼ ruukʼ i xutzʼuhkrisaj (chawil Hechos 14:17). Chakapaaj nikʼwach i qakorsjik xubʼan. Xubʼan chi ne inqil taqeh koloor eh chi ne inqabʼan rusuqkiil taqeh tzʼuuy eh taqeh wiʼk haʼ. Reʼ reh iraaj chi ne inqasuqkileej i kʼacharik.
CHATZʼIR RIIJ I KʼAHCHIʼ ATIJEM
Qil chajariik irukoj i Jehová reh rubʼanariik taqeh i holohik tzʼuhkrisamaj. Eh chi riij i reʼ qatzʼir riij nikʼwach irukʼuhtaaj taqeh i ruholohik naʼojbʼal.
4. Reʼ santo laj uxlabʼal: reʼ aansil irukoj i Dios reh kamanik
Reʼ hoj inqakoj i qaqʼabʼ reh kamanik eh reʼ Jehová irukoj i rusanto laj uxlabʼal reh kamanik. Reʼ Santo Laj Huuj maʼ iruqʼor ta chi reʼ santo laj uxlabʼal jenaj kʼachareel, reʼ laʼ aansil irukoj i Dios reh rubʼanariik chuʼnchel. Chawil taq Lucas 11:13 eh Hechos 2:17, eh tiqʼoroq taq chi riij:
-
Ajwach irupahqaaj santo laj uxlabʼal reh i Dios inyeʼarik keh. Jeʼ reʼ noq, ¿inakapaaj na chi reʼ santo laj uxlabʼal jenaj kʼachareel? ¿Oon inaqʼor chi jenaj aansil irukoj i Dios reh kamanik? ¿Chaaj woʼ reet jeʼ reʼ inakapaaj?
Reʼ Jehová irukoj i rusanto laj uxlabʼal reh rubʼanariik taqeh holohik tzʼuhkrisamaj. Chawil taq Salmo 33:6 eh 2 Pedro 1:20, 21, eh tiqʼoroq taq chi riij:
-
¿Chajariik xukorsaj i Jehová ruukʼ i rusanto laj uxlabʼal? ¿Chajariik chik?
5. Reʼ Jehová wilik taqeh ruholohik naʼojbʼal reʼ irubʼan chi ne inqajil qiibʼ ruukʼ
Reʼ Moisés korik naq wach rukʼux chi ruloqʼjiik i Dios. Atoobʼ ta jeʼ reʼ iraaj naq runabʼeem wach i ajtzʼuhkrisaneel. Ruum aj reʼ, reʼ Moisés xuqʼor: «Chakʼuhtaaj weh taqeh abʼeeh reh chi ne nunabʼeej awach» (Éxodo 33:13, TNM). Eh reʼ Jehová xqʼorik ruukʼ chi riij taqeh i rujuʼjun naʼojbʼal. Chawil taq i Éxodo 34:4-6 eh tiqʼoroq taq chi riij:
-
¿Ahaʼ wilik taqeh runaʼojbʼal i Jehová xuqʼor reh i Moisés?
-
¿Ahaʼ wilik taqeh naʼojbʼal wilih imponik chawach?
6. Reʼ Jehová iraaj kiwach taqeh kʼachareel
Reʼ taqeh aj hebreo reʼ najtir rutinamiit i Dios, xiwihʼik pan kowlaj kamanik ar Egipto. ¿Nikʼwach naq irikʼraaj riibʼ i Jehová noq iril i rutinamiit chi kiʼikʼik pan tiʼ kʼaxik? Chabʼiraj taq i AUDIO eh chakʼam taq nah i tzʼihbʼamaj, oon xa chawil taq i Éxodo 3:1-10. Eh chi riij i reʼ tiqʼoroq taq chi riij:
-
¿Chajariik irukʼuhtaaj aweh i ehtalil wilih chi riij irikʼraaj i Jehová noq qojikʼik pan kʼaxkilal? (Chawil taq i versículo 7 eh 8).
-
¿Inakapaaj na chi reʼ Jehová pan korik iraaj rutobʼeem taqeh kʼachareel? ¿Inaqʼor na chi wilik pan qʼabʼ kitobʼjiik? ¿Chaaj woʼ reet jeʼ reʼ inakapaaj?
7. Ruukʼ i tzʼuhkrisamaj inqil taqeh runaʼojbʼal i Jehová
Reʼ Jehová irukʼuhtaaj qeh i runaʼojbʼal ruukʼ taqeh xutzʼuhkrisaj. Chawil taq i VIDEO. Chi riij i reʼ chawil taq i Romanos 1:20 eh tiqʼoroq taq chi riij:
-
¿Chajariik chi runaʼojbʼal i Jehová irukʼuhtaaj aweh i xutzʼuhkrisaj?
REʼ INKIQʼOR I JUʼJUN: «Reʼ Dios jenaj aansil xa ahaʼ paʼ wilik eh maʼ ne ta irubʼan chi ne inqanabʼeej wach, ruum chi maʼ reʼ ta jenaj kʼachareel».
-
¿Chajariik inaqʼor i hat?
-
¿Chaaj woʼ reet jeʼ reʼ inakapaaj?
KʼOLOQ PAN AKʼUX
Reʼ Jehová jenaj uxlabʼal ruum aj reʼ maʼ inqil ta wach. Wilik taqeh ruholohik naʼojbʼal eh reʼ xti nim naʼojbʼal wilik reh, reʼ kʼaxooj.
Reʼ xkahnik pan akʼux
-
¿Chaaj woʼ reet maʼ inqil ta wach i Jehová?
-
¿Chajariik i santo laj uxlabʼal?
-
¿Ahaʼ wilik taqeh runaʼojbʼal i Jehová iruqʼor i Santo Laj Huuj?
CHAREQ RUMAN
Chanabʼeej wach chi korik i Jehová noq ne natzʼir riij i kijibʼ chi runaʼojbʼal.
Qil taqeh ehtalil reʼ rukʼuhtaaj chi reʼ Jehová maʼ xa ta ahaʼ wilik.
Chawil chaaj woʼ reet reʼ Santo Laj Huuj iruqʼor chi reʼ santo laj uxlabʼal jeʼ rukabʼ «taqeh ruqʼabʼ» i Dios.
Jenaj winaq maʼ inilwik ta, maʼ rukoj ta naq wach chi inkapebʼjik naq ruum i Dios. Chanabʼeej chaaj woʼ reet xujal i runaʼojbʼal.
«Yuʼnaak inwikʼraaj chi ne nutobʼeej taqeh tokoom» (La Atalaya, 1 reh octubre reh 2015)
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
