Reʼ Jehová iraaj chi reʼ hat ne nanabʼeej wach. ¿Chaaj woʼ reet? Ruum chi reʼ Dios iruyʼeej chi reʼ hat ne tiponik chi ramigo noq ne nanabʼeej taqeh runaʼojbʼal, taqeh rubʼan eh taqeh narubʼanam, ruukʼ i wilih ne nawaaj ponik chi ramigo. ¿Xa reʼ laʼ, mi korik chi ne qojponik chi ramigo i Dios? (Chawil Salmo 25:14). ¿Chajariik naʼabʼanam i hat reh chi hat ramigo? Reʼ Santo Laj Huuj iruqʼor qeh chi riij taqeh pahqanik wilih eh iruqʼor woʼ qeh chi reʼ amigohiil ruukʼ i Jehová, reʼreʼ i xti aajwaal wach pan qakʼachariik.

1. ¿Chajariik iruqʼor aweh i Jehová chi naʼabʼanam?

«Chajil taq i koq awiibʼ ruukʼ i Dios reʼ reh nee taq inwihik awuukʼ» (Santiago 4:8). ¿Chajariik iraaj ruqʼorom i qʼorik wilih? Chi reʼ Jehová iraaj chi hat ramigo. Juʼjun inkiqʼor chi kʼaxik chi keh ponik chi ramigo i Dios ruum chi maʼ inkil ta wach. Xa reʼ laʼ reʼ Dios xukanaaʼ pan ruqʼorbʼal, reʼ Santo Laj Huuj chuʼnchel i naqanabʼeem chi riij reh chi ne inqajil qiibʼ ruukʼ. Noq inqil pan Santo Laj Huuj reʼ iruqʼor qeh i Dios, reʼ qamigohiil ruukʼ i Jehová inkʼihik atoobʼ ta maʼ inqil ta wach.

2. ¿Chaaj woʼ reet reʼ Jehová xti manlik amigo chaweh?

Maʼ ajwach ta chik qʼeʼ tiraaj jeʼ rukabʼ i Jehová. Reʼ reh iraaj chi suq akʼux eh chi juneliik ne tiqʼorik ruukʼ. Ne rubʼan chi chuʼnchel i tiqajik wiiʼ kapeew chakanaaʼ pan qʼabʼ i Dios, ruum reʼ reh qʼeʼ tiraaj (1 Pedro 5:7). Ruum chi reʼ Jehová juneliik wilik chi qatobʼjik, chi ruyeʼariik rukowiil qakʼux eh qabʼirjik (chawil Salmo 94:​18, 19).

3. ¿Chajariik iraaj i Jehová chi ne inkibʼan taqeh ramigo?

Reʼ Jehová iraaj kiwach chuʼnchel taqeh kʼachareel xa reʼ laʼ, «reʼ i korik wach kikʼux, raʼj imponik chuwach i reʼ» (Proverbios 3:32). Reʼ Jehová iraaj chi reʼ taqeh ramigo ne inkibʼan i holohik chi bʼanarik eh chi maʼ ne ta inkibʼan i maʼ holohik ta chi bʼanarik. Wilik inkikapaaj chi maʼ jaruuj ne inkibʼan reʼ imponik chuwach i Jehová. Xa reʼ laʼ, reʼ reh irureq chi riij inkikapaaj eh iraaj kiwach chuʼnchel taqeh inajwanik reh eh inkikoj kikʼux reh rubʼanariik i imponik chuwach (Salmo 147:11; Hechos 10:​34, 35).

 CHATZʼIR RIIJ I KʼAHCHIʼ ATIJEM

4. Reʼ Abrahán ramigo naq i Jehová

Reʼ wilik pan Santo Laj Huuj chi riij i Abrahán (i rubʼihnaleej naq Abrán) irukʼuhtaaj qeh chi riij i amigohiil ruukʼ i Dios. Chawil taq chi riij i Abrahán pan Génesis 12:​1-4 eh tiqʼoroq taq chi riij:

• ¿Chajariik naq i narubʼanam i Abrahán?

• ¿Chajariik xuqʼor i Jehová chi naruyeʼem naq reh?

• ¿Chajariik xubʼan i Abrahán noq xubʼiraj xqʼorar reh ruum i Jehová?

5. Reʼ wilih iraaj i Jehová chi ne inkibʼan taqeh ramigo

Chi qunchelaal inqaaj chi reʼ taqeh qamigo ne qojkitobʼeej.

• ¿Nikʼwach taqeh amigo inawaaj i hat?

Chawil taq 1 Juan 5:3 eh tiqʼoroq taq chi riij:

• ¿Chajariik iraaj i Jehová chi ne inkibʼan taqeh ramigo?

Reh runimjiik i Jehová ne inqajal wach i qanaʼojbʼal eh i qawiiʼ. Chawil taq Isaías 48:​17, 18 eh tiqʼoroq taq chi riij:

• ¿Chaaj woʼ reet reʼ Jehová irupahqaaj keh i ramigo chi ne inkijal i kinaʼojbʼal eh i kiwiiʼ?

 6. Reʼ Jehová irutobʼeej taqeh ramigo

 KʼOLOQ PAN AKʼUX

Reʼ Jehová iraaj chi hat ramigo eh ne tirutobʼeej reh chi ne najil awiibʼ ruukʼ.

Reʼ xkahnik pan akʼux

• ¿Nikʼwach irutobʼeej i Jehová taqeh ramigo?

• ¿Chaaj woʼ reet i Jehová iruqʼor keh taqeh ramigo chi ne inkijal i kinaʼojbʼal eh i kiwiiʼ?

• ¿Inaqʼor na i hat chi reʼ irupahqaaj i Jehová keh taqeh ramigo xti kʼaxik wach? ¿Chaaj woʼ reet jeʼ reʼ inakapaaj?