Chi qunchelaal inqaaj chi ne inwihʼik jenoʼ qamigo korik wach i rubʼanooj eh jeʼ woʼ reʼ iraaj i Jehová. Xa reʼ laʼ, kʼaxik rubʼanariik i korik wach bʼanooj ruum chi kʼih taqeh kʼachareel inkiqʼor chukuj qʼorik eh inkijotʼ i tokoom. ¿Ahaʼ wilik taqeh kooch ne inqakʼul mi korik wach i qabʼanooj?

1. ¿Chaaj woʼ reet ko ruman chi korik wach i qabʼanooj?

Noq korik wach i qabʼanooj kuukʼ i tokoom, inqakʼuhtaaj chi inqaaj wach i Jehová eh chi inqayeew ruloqʼil. Kʼoloq pan qakʼux chi reʼ Jehová rehtʼal chajariik inqakapaaj eh inqabʼan (Hebreos 4:​13). Noq reʼ hoj inqaaj qabʼanam i korik, reʼ Jehová irukoj rehtaal eh looqʼ chi reh. Pan ruqʼorbʼal iruqʼor: «Ruum reʼ i QaJaaw Dios [Jehová] maʼ imponik ta chuwach i yiibʼ wach naʼojbʼal. Eh reʼ i korik wach kikʼux, raʼj imponik chuwach reʼ» (Proverbios 3:​32).

2. ¿Ajwach uukʼ naqakʼuhtaam chi korik wach i qabʼanooj?

Reh rubʼanariik iraaj i Jehová kʼul naqaqʼorom i korik chi qawach (Zacarías 8:​16, 17). Reʼ wilih iraaj ruqʼorom chi maʼ inqachuk ta qʼorik keh i qafamilia ni xa ta keh i quchʼihil chi kamanik, ni xa ta inqachuk qʼorik keh taqeh qahermano pan molaabʼ ni xa ta keh i wilik kajaawriik nah tinamit. Reʼ taqeh kʼachareel korik wach i kibʼanooj maʼ inkibʼan ta ileqʼ ni xa ta inkijotʼ i tokoom (chawil Proverbios 24:​28 eh Efesios 4:​28). Eh inkitoj i kiʼimpuesto (Romanos 13:​5-7). Chupaam i wilih eh ruukʼ tokoom chik inqabʼan pan qakʼachariik, «inqaaj qaʼnam chuʼnchel i maʼ xta reet chi bʼanarik» (Hebreos 13:​18).

3. ¿Chajariik taqeh kooch ne inqakʼul wilaʼ korik wach i qabʼanooj?

Noq reʼ taqeh kʼachareel kehtʼal chi korik wach i qabʼanooj inkikoj kikʼux quukʼ. Inqabʼan chi ne inwihʼik tuqkilal eh chi reʼ taqeh hermano pan molaabʼ ne inkikoj kikʼux quukʼ ruum chi hoj jenaj familia. Eh inwihʼik rusuqkiil qakʼux noq saq wach i qakapebʼaal. Noq korik wach i qabʼanooj, inqakʼuhtaaj chi xiikʼ naah holwochiil taqeh kʼuhbʼaal kʼuhtamaj cho qeh chi riij i Dios, i qaj Koʼloom, eh mareh ne inqabʼan chi reʼ taqeh kʼachareel ne inkaaj kiloqʼem wach i Jehová (Tito 2:​10).

 CHATZʼIR RIIJ I KʼAHCHIʼ ATIJEM

5. Juneliik korik oq wach i qabʼanooj

 6. Wilik taqeh kooch inqakʼul noq korik wach i qabʼanooj

Ruum chi korik wach i qabʼanooj mareh ne inwihʼik qakʼaxkilaal, xa reʼ laʼ, reʼ rubʼanariik i korik qʼeʼ atoobʼ. Chawil taq i Salmo 34:​12-​16 eh tiqʼoroq taq chi riij:

• ¿Nikʼwach ne irubʼan chi holohik i qakʼachariik mi korik wach i qabʼanooj?

1. Noq reʼ bʼahilbʼees eh i ehkʼehbʼees inkiqʼor i korik chi kiwach, inkowjik i kikaxaro.

2. Noq reʼ taqeh kamanoom korik wach i kibʼanooj, reʼ taqeh patroon inkikoj kikʼux kuukʼ.

3. Noq reʼ taqeh tinamit korik wach i kibʼanooj, inkiyeew chi nabʼjik chi holohik kʼachareel taqeh.

 KʼOLOQ PAN AKʼUX

Reʼ Jehová iraaj chi reʼ taqeh ramigo korik wach i kibʼanooj ruukʼ chuʼnchel inkiqʼor eh inkibʼan.

Reʼ xkahnik pan akʼux

• ¿Ajwach uukʼ naqakʼuhtaam chi korik wach i qabʼanooj?

• ¿Chaaj woʼ reet maʼ ne ta irubʼan chi ne inqachuk qʼorik?

• ¿Chaaj woʼ reet juneliik korik oq wach abʼanooj?