LECCIÓN 37
¿Chajariik iruqʼor i Santo Laj Huuj chi riij i kamanik eh i tumiin?
¿Xatkapebʼinik na jenoʼ pech noq xatkahnik chi maʼxta akamaj oon atumiin? Wilaʼ jeʼ reʼ, mareh xakʼaxkileej ruketariik afamilia eh ruyeʼariik reh i Jehová i loqʼil irukʼul chi reh. Reʼ Santo Laj Huuj iruyeew qanaʼojbʼal reh chi ne inqayeew reh i Jehová i loqʼil irukʼul chi reh.
1. ¿Chajariik iruqʼor i Santo Laj Huuj chi riij i kamanik?
Reʼ Dios iraaj chi ne inqasuqkileej i qakamaj. Ruum aj reʼ, reʼ Santo Laj Huuj iruqʼor: «Reʼ rukʼul chi naa rubʼanam i winaq, reʼ chi chubʼan [...] rusuqkiil i chibʼih reh i rureq ruukʼ i rukamaj» (Eclesiastés 2:24). Reʼ Jehová kow inkamanik. Noq inqatijej qeh ruukʼ eh qojkamanik chi kow, imponik chuwach eh reʼ hoj suq qakʼux.
Reʼ kamanik ko ruman, xa reʼ laʼ maʼ reʼ ta oq i peet chuwach i qaloqʼinik ruukʼ i Jehová (Juan 6:27). Reʼ Dios iruqʼor qeh chi naruyeʼem qeh i aajwaal wach chi qeh mi laʼ xqakoj chi peet pan qakʼachariik.
2. ¿Chajariik iruqʼor i Santo Laj Huuj chi riij i tumiin?
Reʼ Santo Laj Huuj iruqʼor chi reʼ tumiin «inkamanik chi toobʼal reh i juʼjun», iruqʼor woʼ qeh chi reʼ tumiin maʼ ne ta iruyeew qeh i suqkiil kʼuxliis (Eclesiastés 7:12). Jeʼ reʼ noq, reʼ Santo Laj Huuj iruqʼor qeh chi maʼ inqakʼax wach i tumiin eh iruqʼor woʼ qeh: «Suq oq taq akʼux ruukʼ i wilik taq awuukʼ» (chawil Hebreos 13:5, TNM). Noq suq qakʼux ruukʼ i wilik qeh maʼ qojqʼuhtik ta reh rusikʼariik i xa chajariik pan qakʼachariik. Eh maʼ inqamin ta woʼ qiibʼ pan kʼaas (Proverbios 22:7). Eh maʼ inqamin ta qiibʼ pan kʼaxkilal ruum chi maʼ qojkʼoʼnik ta ruum i tumiin eh maʼ inqasikʼ ta kamanik reʼ ne qojrubʼehomrisaj xareʼyuʼ.
3. ¿Nikʼwach ne inqabʼan i yeʼooj ruukʼ i qatumiin ruukʼ chuʼnchel qakʼux?
Reʼ Dios Jehová suq reh i yeʼooj, eh inqatijej qeh ruukʼ noq inqunej eh inqayeew i wilik qeh ruukʼ chuʼnchel qakʼux (1 Timoteo 6:18, TNM). Jenaj ruwiiʼ reh rukojariik i qatumiin jeʼ rukabʼ noq qojtobʼinik ruukʼ taqeh saach inbʼaan pan molaabʼ eh noq inqatobʼeej taqeh qahermano noq aajwaal wach chi keh. Reʼ imponik chuwach i Jehová maʼ reʼ ta i kʼihaal chi tumiin inqayeew, reʼ laʼ chaaj woʼ reet inqayeew. Jeʼ reʼ noq, mi reʼ hoj inqayeew ruukʼ chuʼnchel qakʼux inqasuqbʼisaj rukʼux i Jehová (chawil Hechos 20:35).
CHATZʼIR RIIJ I KʼAHCHIʼ ATIJEM
Naqilom taqeh kooch irukʼam cho noq maʼ inqikʼsaj ta naah i kamanik eh naqilom taqeh kooch inchalik noq suq qakʼux ruukʼ i wilik qeh.
4. Mi hat holohik kamanoon ne inayeew ruloqʼil i Jehová
Noq kow i qamigohiil ruukʼ i Jehová inqakoj chi peet pan qakʼachariik eh maʼ reʼ ta i qakamaj. Chawil taq i VIDEO eh tiqʼoroq taq chi riij:
-
Jeʼ rukabʼ xawil pan video, ¿nikʼwach naq i runaʼojbʼal eh i rubʼanooj i Jason pan rukamaj?
-
¿Nikʼwach irubʼan i Jason reh chi xa suq woʼ rukʼux pan kamanik?
Chawil taq i Colosenses 3:23, 24 eh tiqʼoroq taq chi riij:
-
¿Chaaj woʼ reet ko ruman chi naqakamaniik ruukʼ chuʼnchel qakʼux?
Reʼ kamanik ko ruman, xa reʼ laʼ, maʼ reʼ ta oq i peet chuwach i qaloqʼinik ruukʼ i Jehová.
5. Suq oq qakʼux ruukʼ i wilik qeh
Kʼih taqeh kʼachareel inkimol wach kʼih i tumiin reh bʼehomrik, xa reʼ laʼ, reʼ Santo Laj Huuj maʼ jeʼ ta reʼ iruqʼor chi naqabʼanam. Chawil taq 1 Timoteo 6:6-8 eh tiqʼoroq taq chi riij:
-
¿Chajariik chi naʼojbʼal iruyeew qeh i texto wilih?
Ne irubʼan chi suq qakʼux atoobʼ ta maʼ kʼih ta wilik qeh. Chawil taq i VIDEO eh tiqʼoroq taq chi riij:
-
¿Chaaj woʼ reet suq kikʼux taqeh familia wilih atoobʼ ta maʼ kʼih ta i kitumiin?
¿Eh mi wilik qatumiin eh ko inqaaj ruman? Reʼ wilih maʼ holohik ta, reʼ Jesús xukoj jenaj ehtalil reh ruqʼorariik chi yohbʼaal i wilih. Chawil taq i Lucas 12:15-21 eh tiqʼoroq taq chi riij:
-
¿Chajariik inatijej chi riij i ehtalil xuqʼor i Jesús? (Chawil taq i versículo 15).
Chawil taq i Proverbios 10:22 eh i 1 Timoteo 6:10. Eh chi riij i reʼ tiqʼoroq taq chi riij:
-
Jeʼ rukabʼ i xawil pan texto, ¿chajariik i ko ruman? ¿chi hoj ramigo i Jehová oon chi kʼih i qatumiin? ¿Chaaj woʼ reet jeʼ reʼ inaqʼor?
-
¿Chajariik taqeh kʼaxkilal irukʼam cho i rukʼaxariik wach i tumiin?
6. Reʼ Jehová ne iruyeew qeh i aajwaal wach chi qeh
Noq maʼxta qakamaj oon qatumiin ne irukʼuhtaaj mi chʼiklik qakʼux ruukʼ i Jehová. Chawil taq i VIDEO reh runabʼjiik chajariik naqabʼanam chupaam taqeh i kʼaxkilal reʼreʼ eh chi riij i reʼ tiqʼoroq taq chi riij:
-
Jeʼ rukabʼ xawil pan video, ¿chajariik taqeh kʼaxkilal xikʼik wiiʼ i hermano?
-
¿Chajariik xubʼan reh chi suq rukʼux noq ko majaaʼ naq irureq rukamaj?
Chawil taq i Mateo 6:25-34 eh tiqʼoroq taq chi riij:
-
¿Chajariik iruqʼor i Jehová chi naruyeʼem qeh wilaʼ xqakoj chi peet pan qakʼachariik?
REʼ INKIQʼOR I JUʼJUN: «Ko ruman chi ne kinkamanik chi kow reh ruketariik i nufamilia. Ruum aj reʼ, maʼ ne ta inubʼan ojik pan chuʼnchel taqeh moloj iibʼ».
-
¿Ahaʼ wilik i texto reh i Santo Laj Huuj irukʼuhtaaj aweh chi qʼeʼ atoobʼ rukojariik chi peet i Jehová?
KʼOLOQ PAN AKʼUX
Reʼ kamanik eh i tumiin ko ruman chi qeh, xa reʼ laʼ maʼ qakanaaʼ chi reʼ kamanik eh i tumiin ne qojrisaj ruukʼ i Jehová.
Reʼ xkahnik pan akʼux
-
¿Chajariik ne tirutobʼeej reh chi maʼ ne ta tiʼikʼik qʼiij chi kamanik?
-
¿Chajariik taqeh kooch inqakʼul noq suq qakʼux ruukʼ i wilik qeh?
-
Mi reʼ Jehová iruqʼor chi naruyeʼem qeh i aajwaal wach chi qeh, ¿nikʼwach ne nakʼuhtaaj i hat chi inachʼikaaʼ akʼux ruukʼ?
CHAREQ RUMAN
Chanabʼeej mi reʼ Santo Laj Huuj iruqʼor chi reʼ tumiin maʼ atoobʼ ta.
«¿Rumahk na i tumiin chuʼnchel taqeh kʼaxkilal inkʼuljik?» (Naʼojbʼal reh jw.org)
Chawil nikʼwach i yeʼooj imponik chuwach i Jehová.
«¿Chawil chajariik iruqʼor i Santo Laj Huuj chi riij i yeʼooj?» (Naʼojbʼal reh jw.org)
¿Holohik na i kʼoʼnik ahaʼ wiiʼ inqayeew eh inqakʼul tumiin?
¿Chajariik xtoobʼinik reh jenaj winaq reh chi xujal i rukʼachariik ruum chi ajileqʼ naq eh inkʼoʼnik naq ruum tumiin?
«Imponik naq chi nuwach i ajaminik ruukʼ taqeh kawaayo» (La Atalaya, 1 reh noviembre reh 2011)
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
