Reʼ kikʼ irubʼan chi ne inwihʼik qakʼachariik. Ruum chi reʼ Dios xtzʼuhkrisanik qeh, iruqʼor qeh nikʼwach naqakojom i kikʼ. ¿Chajariik iruqʼor i Dios chi riij i kikʼ? ¿Ne na irubʼan chi ne inkʼuxarik oon chi ne inkojarik pan tibʼkaal? ¿Chajariik ne intoobʼinik aweh reh chi ne inachih i naʼabʼanam ruukʼ i kikʼ?

1. ¿Chajariik iruqʼor i Jehová chi riij i kikʼ?

Najtir cho qʼiij reʼ Jehová xuqʼor keh taqeh rajkamanoom: «Reʼ i kikʼ inyeʼwik kikʼachariik chuʼnchel i kʼachaach» (Levítico 17:​14). Reʼ Jehová iruqʼor chi reʼ kikʼ irujalwacheej i kʼacharik. Eh ruum chi reʼ kʼacharik jenaj kooch xuyeew qeh i Dios saq wach eh looqʼ, reʼ kikʼ looqʼ woʼ hoq.

2. ¿Chajariik iruqʼor i Dios chi maʼ na ta qabʼabam ruukʼ i kikʼ?

Noq ko majaaʼ naq inkorsjik i molaabʼ keh i peet ajnimaneel, reʼ Jehová xuqʼor keh taqeh rajkamanoom chi maʼ na ta kikʼuxum i kikʼ (chawil Génesis 9:4 eh Levítico 17:​10). Eh noq wilik chik molaabʼ, reʼ Jehová xuqʼor woʼ chik i kʼuhbʼaal wilih. Reʼ kikʼamwik bʼeeh pan rutinamiit i Jehová reʼ jun tzuhbʼ chi apóstol eh taqeh kʼamal bʼeeh reh i molaabʼ xkiqʼor keh taqeh ajnimaneel: «Tiʼeloq taq chuwach i [...] kikʼ» (chawil Hechos 15:​28, 29, TNM).

¿Chajariik iraaj ruqʼorom tiʼeloq taq chuwach i kikʼ? Mi reʼ doctor xuqʼor aweh chi naʼawelik chuwach i bʼanaj haʼ, ¿maj reʼ hat maʼ ne ta chik inabʼan? Xa reʼ laʼ, ¿mi ne naq inakʼux i kʼuxbʼal wilik kʼah laj haʼ ruukʼ oon mi ne naq inakoj pan awibʼootzʼ? Maʼchih maj korik. Jeʼ woʼ reʼ inkʼuljik ruukʼ i kʼuhbʼaal iruyeew i Dios chi riij i kikʼ, chi maʼ na ta qakʼuxum eh chi maʼ na ta qakojom pan qibʼootzʼ. Runimjiik i Dios iraaj ruqʼorom chi maʼ na ta qakʼuxum i tiibʼ maʼ isamaj ta rukikʼeel eh ni xa ta naqukʼem i kikʼ. Eh ni xa ta naqakʼuxum i kʼuxbʼal kojimaj kikʼ reh.

¿Eh chajariik qehtʼal chi riij nikʼwach rukojariik i kikʼ inkibʼan taqeh doctor? Juʼjun taqeh iqʼombʼal eh iqʼoom maʼ irukʼam ta riibʼ ruukʼ i rukʼuhbʼaal i Dios, jeʼ rukabʼ noq maʼ inqakoj ta i kikʼ oon reʼ taqeh kijibʼ iruchʼaqʼ wiiʼ riibʼ: reʼ glóbulos rojos, glóbulos blancos, plaquetas eh plasma. Wilik pech mareh maʼ tʼanlik ta chi qawach mi jenoʼ iqʼombʼal maʼ irukʼam ta naah i rukʼuhbʼaal i Dios, jeʼ rukabʼ noq reʼ taqeh doctor inkikoj taqeh tʼuch kikʼ reh i kijibʼ iruchʼaqʼ wiiʼ riibʼ i kikʼ reh iqʼominik. Eh wilik pech reʼ rukikʼeel i yowaabʼ inkojarik woʼ chik reh, reh reqʼomjiik. Noq atzʼirim chik riij taqeh wilih, chi qajuʼjunaal naqachihiim chajariik naqabʼanam (Gálatas 6:5). a

 CHATZʼIR RIIJ I KʼAHCHIʼ ATIJEM

3. Chachih chajariik imponik chuwach i Jehová

¿Nikʼwach ne inachih i naʼojbʼal reh runabʼjiik nikʼwach inkojarik i kikʼ jeʼ rukabʼ imponik chuwach i Dios? Chawil taq i VIDEO eh tiqʼoroq taq chi riij chaaj woʼ reet ko ruman rukʼamariik naah taqeh naʼojbʼal wilik pan qajik:

• Chabʼan atiij reh chi ne inwihʼik anaʼojbʼal (Santiago 1:5).

• Chasikʼ taqeh naʼojbʼal irukʼuhtaaj aweh i Santo Laj Huuj eh chawil nikʼwach ne inakoj pan akʼachariik (Proverbios 13:​16).

• Chasikʼ chajariik taqeh chi iqʼombʼal eh iqʼoom wilik pan atinamiit.

• Eh chakoj rehtaal chajariik i maʼ ne ta naq inakʼulaaʼ.

• Reh chi saq wach akapebʼaal chakoj rehtaal mi reʼ xachih holohik (Hechos 24:​16). b

• Kʼoloq pan akʼux chi maʼ reʼ ta abʼahiil, awehkʼeen, i kʼamal bʼeeh oon reʼ inkʼuhtanik aweh chi riij i Santo Laj Huuj, maʼ reʼ ta i keh nakiqʼorom aweh i naʼabʼanam (Romanos 14:​12).

• Chatzʼihbʼaaj i xachih chi naʼabʼanam.

4. Reʼ taqeh testigo reh Jehová inqasikʼ chi ne qojkiqʼomaj chi korik

Runimjiik i rukʼuhbʼaal i Dios chi riij i kikʼ maʼ iraaj ta ruqʼorom chi maʼ na ta inqoqʼomaaj qiibʼ. Chawil taq i VIDEO.

Chawil taq i Tito 3:2 eh tiqʼoroq taq chi riij:

• ¿Chaaj woʼ reet ko ruman chi ne qojqʼorik chi riij i kikʼ kuukʼ taqeh doctor pan chaqʼlamiil?

 5. Reʼ taqeh tʼuch reh i kijibʼ iruchʼaq wiiʼ riibʼ i kikʼ

Reʼ kikʼ iruchʼaq wiiʼ riibʼ chi: glóbulos rojos, glóbulos blancos, plaquetas eh plasma. Reʼ taqeh kijibʼ wilih iruchʼaq woʼ riibʼ eh irubʼihnaleej kokʼ tʼuch kikʼ. c Juʼjun taqeh i kokʼ tʼuch wilih inkojarik pan iqʼoom reh reqʼomjiik taqeh yabʼilaal oon reh chi ne inkipahbʼaaʼ i kikʼ.

Noq jenoʼ ajnimaneel irukapaaj chi narukojom i kokʼ tʼuch kikʼ wilih oon maʼchih, ko ruman chi ne irukoj pan ruman chajariik rutijem pan Santo Laj Huuj reh chi saq wach i rukapebʼaal. Mareh juʼjun maʼ ne ta inkaaj kikojom i kokʼ tʼuch kikʼ reh keqʼomjiik oon chi ne inkamanjik wach i kikikʼeel eh wilik taqeh mareh ne inkaaj kikʼulum.

Noq naʼachihim i naʼabʼanam, chakapaaj:

• ¿Nikʼwach naq ne inuqʼor reh i nudoctor, chi nanukʼulum oon chi maʼ na ta nukʼulum juʼjun reh i kokʼ tʼuch kikʼ?

 KʼOLOQ PAN AKʼUX

Reʼ Jehová iraaj chi ne qojelik chuwach i kikʼ, chi maʼ na ta qakojom pan qatibʼkaal, maʼ na ta qakʼuxum eh maʼ na ta qayeʼem reh jenoʼ kʼachareel.

Reʼ xkahnik pan akʼux

• ¿Chaaj woʼ reet i Jehová iruqʼor chi looqʼ i kikʼ?

• Noq reʼ Dios xuqʼor chi naqeliik chuwach i kikʼ, ¿nikʼwach qehtʼal chi xraaj ruqʼorom chi maʼ na ta qakojom pan qatibʼkaal?

• ¿Chajariik ne intoobʼinik aweh reh ruchihariik nikʼwach rukojariik akikʼeel nakibʼanam taqeh doctor?