LECCIÓN 42
¿Chajariik iruqʼor i Santo Laj Huuj chi riij i kaxarohiil eh chi riij jenoʼ maʼxta ruchʼihiil?
Pan juʼjun tinamit inkikapaaj chi, reh chi ne inwihʼik i suqkiil kʼuxliis ko ruman i kaxarohiil. Xa reʼ laʼ maʼ chuʼnchel ta taqeh kaxaro suq kikʼux ni xa ta chuʼnchel taqeh i maʼxta kuchʼihil pan kikʼachariik tiʼ kikʼux. Reʼ Santo Laj Huuj iruqʼor chi reʼ kaxarohiil jenaj kooch eh mi jenoʼ iraaj kahnik chi rutkeel jenaj woʼ kooch chi reh.
1. ¿Chajariik taqeh holohik irukʼam cho noq jenoʼ maʼ rusikʼ ta ruchʼihiil?
Reʼ Santo Laj Huuj iruqʼor: «Reʼ i rubʼan kaxaro maʼxta reet chi reh xa reʼ laʼ, reʼ maʼ rubʼan ta kaxaro qʼeʼ woʼ chik holohik chi reh» (chawil 1 Corintios 7:32, 33, 38, TNM). ¿Chajariik iraaj ruqʼorom chi jenoʼ kʼachareel «qʼeʼ woʼ chik holohik chi reh» mi maʼ xubʼan kaxaro? Reʼ taqeh ajnimaneel reʼ maʼxta kuchʼihil pan kikʼachariik maʼ inooj ta kikʼux rukapebʼjiik chi riij mi suq rukʼux i kehkʼeen oon reʼ kibʼahiil. Ruum aj reʼ wilik kiqʼiij reh rubʼanariik xa chajariik inkaaj kibʼanam. Juʼjun maʼ inkikʼaxkileej ta rukamanjiik wach i Jehová jeʼ rukabʼ noq kiʼooj chi qʼoroj kʼuhbʼaal pan tokoom yeʼaabʼ. Eh reʼ xti holohik chi keh i maʼxta kuchʼihil, reʼ chi ne inkikoj i kiqʼiij reh rukowsjiik i kamigohiil ruukʼ i Jehová.
2. ¿Chajariik taqeh holohik irukʼam cho noq jenoʼ irubʼan kaxaro?
Jeʼ rukabʼ noq jenoʼ maʼ rusikʼ ta ruchʼihiil pan rukʼachariik, reʼ kaxarohiil wilik woʼ i holohik irukʼam cho. Reʼ Santo Laj Huuj iruqʼor chi «maʼ xta reet chi pankibʼal neenbʼaan i kamanik, chuwach chi xa jinaj neembʼanik reh» (Eclesiastés 4:9). Jeʼ reʼ inqil kuukʼ taqeh kaxaro reʼ inkikoj pan kikʼachariik taqeh naʼojbʼal inkitijej pan Santo Laj Huuj. Reʼ taqeh inkibʼan kaxaro pan civil inkibʼan kʼul qʼorik chi kiwach chi nakikʼaxam kiibʼ chi nakiyeʼem kiloqʼil chi kiwach eh chi nakichaʼjeem kiibʼ ruukʼ chaqʼlamiil. Ruum aj reʼ maʼxta kiyoʼjik wiiʼ, xa reʼ laʼ maʼ jeʼ ta reʼ ne inqaqʼor chi kiij taqeh i xa pan kibʼal wilkeebʼ ruum chi maʼ kaxaro ta taqeh. Eh reʼ taqeh kibʼanam kaxaro ne inkikʼihsaj i kihalakʼuun pan suqkiil kʼuxliis.
3. ¿Chajariik irukapaaj i Jehová chi riij i kaxarohiil?
Noq reʼ Jehová xukʼulaaʼ pan kaxaro i Adán eh i Eva, xuqʼor: «Reʼ winaq koruman chi nareliik nah qʼabʼ i rutuut rajaaw. Eh ruukʼ chik i rehkʼeen naa rukʼulaam wach i rukʼachariik» (Génesis 2:24). Reʼ Jehová iraaj chi reʼ bʼahilbʼees eh reʼ ehkʼenbʼees ne inkikʼax kiibʼ eh ne kiwihʼik pan kabʼcheel chuʼnchel i kikʼachariik. Eh reʼ Jehová iruqʼor chi jenoʼ kaxaro ne iruchʼaq riibʼ noq jenoʼ keh irubʼan kʼoyomal ruukʼ tokoom. Wilaʼ xwihʼik kʼoyomal reʼ Dios irukanaaʼ chi reʼ bʼahilbʼees oon reʼ ehkʼenbʼees reʼ maʼxta rumahk ne iruchih wach mi naruchʼaqam riibʼ (Mateo 19:9). a Reʼ Jehová maʼ imponik ta chuwach chi jenoʼ ajnimaneel ne rubʼan kaxaro ruukʼ kʼih ixoq oon ruukʼ kʼih winaq (1 Timoteo 3:2).
CHATZʼIR RIIJ I KʼAHCHIʼ ATIJEM
Qanabʼeej chajariik naʼabʼanam reh chi suq akʼux wilaʼ hat kaxaro oon maʼxta awuchʼihil, eh reh chi ne nasuqbʼisaj rukʼux i Jehová.
4. Chakoj chi korik akʼachariik wilaʼ maʼxta awuchʼihil
Jenaj naq kooch chi reh i Jesús wihʼik chi maʼxta ruchʼihiil (Mateo 19:11, 12). Chawil taq i Mateo 4:23 eh tiqʼoroq taq chi riij:
-
¿Nikʼwach rukojariik i rukʼachariik xubʼan i Jesús ruum chi maʼxta ruchʼihiil reh ruloqʼjiik i rajaaw eh reh rutobʼjiik taqeh tokoom?
Reʼ taqeh ajnimaneel reʼ maʼxta kuchʼihil ne rubʼan chi suq kikʼux wilaʼ xkikoj chi korik i kikʼachariik jeʼ rukabʼ xubʼan i Jesús. Chawil taq i VIDEO eh tiqʼoroq taq chi riij:
-
¿Chajariik ne inkibʼan taqeh ajnimaneel reʼ maʼxta kuchʼihil reh chi ne inkikoj chi korik i kikʼachariik?
¿Mi awehtʼal naq?
Reʼ Santo Laj Huuj maʼ iruqʼor ta jaruubʼ haabʼ wilik reh jenoʼ kʼachareel reh chi ne irubʼan kaxaro. Xa reʼ laʼ iruqʼor qeh chi peet narikʼiik i qakʼijolaal, ruum chi reʼ taqeh habʼil reʼreʼ kow wach. Ruum chi jenoʼ qʼahxoq oon kʼijool qʼeʼ inooj rukʼux chi riij i yohkik ruukʼ jenoʼ kʼachareel eh reʼ wilih irubʼan chi maʼ ne ta inkapebʼinik chi korik (1 Corintios 7:36).
5. Chachih chi korik ajwach inawaaj chi awuchʼihil pan akʼachariik
Ruchihariik ajwach uukʼ inawaaj kaxaro reʼreʼ xti ko ruman pan akʼachariik. Chawil taq i Mateo 19:4-6, 9 eh tiqʼoroq taq chi riij:
-
¿Chaaj woʼ reet jenoʼ ajnimaneel narukapaam riij chi korik noq ko majaaʼ irubʼan kaxaro?
Reʼ Santo Laj Huuj ne tirutobʼeej runabʼjiik ahaʼ wilik taqeh naʼojbʼal ko ruman chi ne inwihʼik reh jenoʼ bʼahilbʼees oon ehkʼenbʼees. Eh reʼ xti aajwaal wach, chasikʼ jenoʼ rajloqʼineel i Jehová. b Chawil taq i 1 Corintios 7:39 eh 2 Corintios 6:14. Chi riij i reʼ tiqʼoroq taq chi riij:
-
Mi jenoʼ rajloqʼineel i Jehová iraaj kaxaro, ¿chaaj woʼ reet naruchihiim jenoʼ iruloqʼej wach i Jehová?
-
Wilaʼ xubʼan kaxaro ruukʼ jenoʼ maʼ ruloqʼej ta i Jehová, ¿chajariik ne inkʼuljik?
Mi xqakoj jenoʼ bʼooyax eh bʼuurux chi laqʼlikeebʼ reh kamanik ne inkiqʼoj kiibʼ. Jeʼ woʼ reʼ inkʼuljik noq jenoʼ ajnimaneel irubʼan kaxaro ruukʼ jenoʼ maʼ ruloqʼej ta wach i Jehová ne inwihʼik kʼih rukʼaxkilaal.
6. Chayeew ruloqʼil i kaxarohiil jeʼ rukabʼ irubʼan i Jehová
Pan najtir Israel, juʼjun taqeh bʼahilbʼees inkichʼaq naq kiibʼ ruukʼ i kehkʼeen ruum xa chajariik. Chawil taq i Malaquías 2:13, 14, 16 eh tiqʼoroq taq chi riij:
-
¿Chaaj woʼ reet i Jehová irixowaaj wach i chʼaqoj iibʼ chi maʼ xwihʼik ta kʼoyomal jeʼ rukabʼ iruqʼor i Santo Laj Huuj?
Reʼ kʼoyomal eh reʼ chʼaqoj iibʼ iruyeew tiʼkiil rukʼux i ehkʼenbʼees oon reʼ bʼahilbʼees reʼ maʼxta kimahk eh jeʼ woʼ i kihalakʼuun.
Chawil taq i VIDEO eh tiqʼoroq taq chi riij:
-
Mi hat kaxaro ruukʼ jenoʼ maʼ ruloqʼej ta wach i Jehová, ¿chajariik ne nabʼan reh chi suq akʼux pan akaxaro?
7. Chanimaj taq i rukʼuhbʼaal i Jehová chi riij i kaxarohiil
Juʼjun taqeh kʼachareel inkikʼaxkileej rukojariik pan kikʼachariik taqeh rukʼuhbʼaal i Jehová chi riij i kaxarohiil. c Xa reʼ laʼ reʼ Jehová irukuxisaj taqeh ajwach inkinimaj i rukʼuhbʼaal. Chawil taq i VIDEO.
Chawil taq i Hebreos 13:4 eh tiqʼoroq taq chi riij:
-
¿Inakapaaj na i hat chi reʼ taqeh rukʼuhbʼaal i Jehová chi riij i kaxarohiil holohik chi qeh? ¿Chaaj woʼ reet jeʼ reʼ inakapaaj?
Reʼ Jehová iraaj chi reʼ taqeh ajnimaneel ne inkibʼan kaxaro pan civil oon mi jenoʼ xuchʼaq riibʼ ko ruman chi ne inwihʼik jenoʼ ruhuuj ahaʼ wiiʼ iruqʼor chi xuchʼaq riibʼ, ruum chi reʼ wilih ko ruman chi jun suut i akʼal. Chawil taq i Tito 3:1 eh tiqʼoroq taq chi riij:
-
Mi reʼ hat, hat kaxaro, ¿chʼiklik na akʼux chi reʼ akaxaro pan civil tzʼihbʼamaj kuum taqeh wilik kajaawriik?
MAREH NE INKIQʼOR AWEH: «Maʼ ko ruman ta i kaxaro. Mi inqaaj qiibʼ ne qojwihʼik pan kabʼcheel».
-
¿Chajariik naq ne naqʼor i hat?
KʼOLOQ PAN AKʼUX
Reʼ kaxarohiil eh chi maʼxta awuchʼihil kooch taqeh inchalik ruukʼ i Jehová. Mi hoj kaxaro oon mi maʼxta quchʼihil ne rubʼan chi ne inqasuqkileej i qakʼachariik wilaʼ inqanimaj taqeh rukʼuhbʼaal i Dios.
Reʼ xkahnik pan akʼux
-
¿Nikʼwach ne irukoj chi korik i rukʼachariik jenoʼ maʼxta ruchʼihiil?
-
¿Chaaj woʼ reet iruqʼor i Santo Laj Huuj chi reʼ taqeh ajnimaneel ne inkibʼan kaxaro ruukʼ i kuch ajnimaneel?
-
¿Ahaʼ wilik i mahk iruqʼor i Santo Laj Huuj chi ne irubʼan chi ne inkichʼaq kiibʼ taqeh kaxaro?
CHAREQ RUMAN
¿Chajariik iraaj ruqʼorom chi maʼ na ta qabʼanam kaxaro kuukʼ i maʼ inkinimaj ta i Dios?
«Juʼjun taqeh kʼachareel inkipahqaaj» (La Atalaya, 1 reh julio reh 2004)
Chawil kiʼibʼ ehtalil pan video reʼ ne ruyeew anaʼojbʼal chi riij i rusikʼariik awuchʼihil jeʼ woʼ chi riij i kaxarohiil.
¿Chajariik nanubʼanam reh chi ne chik inubʼan kaxaro? (11:53)
Chanabʼeej chaaj woʼ reet jenaj hermano chʼiklik rukʼux chi reʼ xyeʼarik reh ruum i Jehová qʼeʼ looqʼ chuwach taqeh i xukanaaʼ.
Noq jenoʼ ajnimaneel iraaj rukanaam riibʼ oon iraaj ruchʼaqam riibʼ, ¿chajariik ko ruman chi ne rukapaaj?
«Qayeew ruloqʼil i rukʼulaam wach i Dios» (La Atalaya, reh diciembre reh 2018)
a Pan ruman 4 ne nareq kʼisinoq chik chi riij i kaʼnanik iibʼ (noq jenoʼ keh maʼ xubʼan ta i kʼoyomal).
b Pan juʼjun tinamit reʼ taqeh ajabʼees inkichih ajwach uukʼ narubʼanam kaxaro i kakʼuun oon kixqʼuun. Jeʼ reʼ, reʼ taqeh ajabʼees ne inkisikʼ jenoʼ rajloqʼineel i Jehová. Reʼreʼ xti aajwaal wach chi keh chuwach i bʼehomal.
c Mi reʼ hat kʼacharik inabʼan ruukʼ jenoʼ eh maʼ hat ta taq kaxaro, awuukʼ wilik mi na taq abʼanam kaxaro oon na akanaam taq awiibʼ chi jun pech.
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
