Reʼ Jehová iraaj chi ne inqasuqkileej i qakʼachariik eh chi ne woʼ inqabʼan qaninqʼiij. ¿Xa reʼ laʼ imponik na chuwach i Dios chuʼnchel taqeh ninqʼiij inbʼanarik? ¿Nikʼwach ne inqakʼuhtaaj chi inqaaj wach i Dios eh chi ko ruman chi qeh irikʼraaj?

1. ¿Chaaj woʼ reet maʼ imponik ta chuwach i Jehová juʼjun taqeh ninqʼiij?

Mareh ne rusach akʼux runabʼjiik chi juʼjun taqeh ninqʼiij raaʼ riʼsil i maʼ manlik ta nimanik oon maʼ rukʼam ta riibʼ ruukʼ irukʼuhtaaj i Santo Laj Huuj, jeʼ rukabʼ noq reʼ ninqʼiij wilik qʼijinik chupaam oon mareh irukʼuhtaaj chi reʼ anima maʼ inkimik ta. Eh je woʼ taqeh naʼojbʼal eh bʼanooj inkikoj wach i kʼachareel reʼ wilik yoʼjik chupaam oon suerte (Isaías 65:​11). Ruum aj reʼ i Jehová iruqʼor keh taqeh rajkamanoom: «Eleen taq chi kixilak [...] Eh maa aʼn taq chik aweh i chʼuwaʼ wach naʼojbʼal» (2 Corintios 6:​17). a

2. ¿Chajariik iruqʼor i Jehová chi riij taqeh kʼachareel inkikʼul kiloqʼil pan jenoʼ ninqʼiij?

Reʼ Jehová iruqʼor chi maʼ inqabʼan jeʼ rukabʼ taqeh kʼachareel «reʼ inkikoj kikʼux ruuk i xa winaq», ruum chi reʼ wilih yohbʼaal (chawil Jeremías 17:5, TNM). Juʼjun taqeh ninqʼiij inbʼaan reh ruyeʼariik kiloqʼil taqeh taqʼaneel, taqeh xkikoʼleej i kitinamiit. Eh pan juʼjun ninqʼiij inkiyeew ruloqʼil taqeh ehtalil reh i tinamit jeʼ rukabʼ i bandera oon inkininqʼijej woʼ wach i ruqʼijiil i kitinamiit noq xelik riʼsil rajaawriik jenoʼ tinamit (1 Juan 5:​21). Eh wilik woʼ taqeh naʼojbʼal inkiyeew taqeh político eh inkibʼehsaj reh i tinamit reh chi ne inkikoj wach eh ne inkiyeew chi nabʼjik, eh wilik woʼ taqeh nimaq taq ninqʼiij reʼ inkiyeew ruloqʼil i kʼachareel jeʼ rukabʼ i runinqʼijiik wach i kiqʼijil ixoq eh tokoom chik ninqʼiij. Mi xqayeew ruloqʼil jenoʼ kʼachareel oon jenoʼ molaabʼ eh mi reʼ naʼojbʼal irubʼehsaj maʼ irukʼam ta riibʼ ruukʼ iraaj i Dios, ¿nikʼwach inakapaaj i hat chi ne irikʼraaj riibʼ i Jehová?

3. ¿Chajariik bʼanooj ne irubʼan chi jenoʼ ninqʼiij maʼ holohik ta?

Reʼ Santo Laj Huuj iruqʼor chi reʼ Jehová irixowaaj wach noq xa chayeew chik i xohkrʼik inbʼaan eh jeʼ woʼ ninqʼijinik (1 Pedro 4:3). Pan juʼjun taqeh ninqʼiij reʼ taqeh kʼachareel maʼ kehtʼal ta chik inkibʼan, inkitʼusaaʼ kiibʼ pan ninqʼiij eh jeʼ woʼ pan bʼeeh. Mi juneliik inqaaj chi hoj ramigo i Jehová, ko ruman chi maʼ ne ta inqamin qiibʼ chupaam taqeh ninqʼiij reʼ ne ruchʼuwaʼrisaj wach i qatiʼjolal.

 CHATZʼIR RIIJ I KʼAHCHIʼ ATIJEM

 5. Chachop akʼux reh chi reʼ taqeh kʼachareel ne inkiyeew ruloqʼil taqeh inanimaj

6. Reʼ Jehová iraaj chi suq qakʼux

Reʼ Jehová iraaj chi ne inqasuqkileej i wihʼik junkʼaam ruukʼ i qafamilia eh kuukʼ i qamigo. Chawil taq i Eclesiastés 8:​15 eh tiqʼoroq taq chi riij:

• Jeʼ rukabʼ xawil pan texto ¿chajariik iruyeew qeh i Jehová reh chi suq qakʼux?

Reʼ Jehová iraaj chi reʼ taqeh rajkamanoon ne kikʼoʼnik eh ne kihiʼlik pan tzuhbʼaal reh chi suq kikʼux. Chawil taq i VIDEO reh chi ne taq inakoj rehtaal chi reʼ wilih inqabʼan chupaam taqeh qanimlaj moloj iibʼ pan reh reh tinamit.

Chawil taq i Gálatas 6:​10 eh tiqʼoroq taq chi riij:

• ¿Ko ruman na rubʼanariik jenoʼ ninqʼiij reh chi ne inqabʼan otobʼil keh i qas qachaaqʼ?

• Noq wilik inawaaj asihim, ¿inabʼan na i siih ruum chi xatkiyuqʼeej pan ninqʼiij oon inabʼan i siih atoobʼ ta maʼxta jenoʼ ninqʼiij?

• Kʼih taqeh ajabʼees testigo reh Jehová wilik inkibʼan reh chi reʼ kihalakʼuun suq kikʼux eh wilik pech inkiyeew rukooch i kihalakʼuun. Wilaʼ reʼ hat wilik ahalakʼuun, ¿chajariik naq ne nabʼan reh chi suq kikʼux?

 KʼOLOQ PAN AKʼUX

Reʼ Jehová iraaj chi ne qojwihʼik junkʼaam oq ruukʼ i qafamilia eh qamigo xa reʼ laʼ, maʼ raaj ta chi ne qojwihʼik chupaam taqeh ninqʼiij reʼ maʼ imponik ta chuwach.

Reʼ xkahnik pan akʼux

• ¿Ahaʼ wilik taqeh pahqanik naqabʼanam reh runabʼjiik mi jenoʼ ninqʼiij imponik chuwach i Jehová?

• ¿Chajariik naqabʼanam reh chi reʼ taqeh qafamilia eh qamigo ne inkireq chi riij chi wilik taqeh i maʼ inqaninqʼijej ta wach?

• ¿Chaaj woʼ reet qehtʼal chi reʼ Jehová iraaj chi suq qakʼux?