Reʼ Jesús xukʼuhtaaj chi reʼ taqeh rajtahqaneel «maʼ jenaj ta kiwach ruukʼ i wach akʼal» (Juan 15:​19, TNM). Reʼ wilih iraaj ruqʼorom chi maʼ inkitahqeej ta i rutaqʼaniik i winaq ruukʼ inkikapaaj, ruukʼ inqikʼraaj, ruukʼ inkiqʼor eh ruukʼ inkibʼan eh ni xa ta inkimin kiibʼ pan qʼaqʼinik. Xa reʼ laʼ rubʼanariik i wilih kʼaxik, ruum chi ne qojkiseʼlaaj mi maʼ xqamin qiibʼ. ¿Nikʼwach ne inqakʼuhtaaj chi maʼ inqatahqeej ta i rutaqʼaniik i winaq eh chi korik wach i qakʼux ruukʼ i Jehová?

1. ¿Chajariik inkikapaaj taqeh manlik ajnimaneel chi riij i rutaqʼaniik i winaq?

Reʼ taqeh manlik ajnimaneel inqanimaj i rutaqʼaniik i winaq. Reʼ Jesús xuqʼor: «Koruman taq chi neena aʼn i tooj ruukʼ ajaabʼees». Eh jeʼ woʼ reʼ inqabʼan, inqakʼam naah taqeh rukʼuhbʼaal i tinamit jeʼ rukabʼ i rutojariik i impuesto (Marcos 12:​17). Reʼ Santo Laj Huuj irukʼuhtaaj chi reʼ Jehová iruyeew qʼabʼ chi ne kitaqʼanik i winaq (Romanos 13:1). Ruum aj reʼ qehtʼal chi reʼ rutaqʼaniik i winaq maʼ nim ta rajaawriik, maʼ jeʼ ta rukabʼ i rajaawriik i Dios. Chʼiklik qakʼux chi reʼ qaDios eh i runimaal rajaawriik narusacham wach chuʼnchel taqeh qakʼaxkilaal.

2. ¿Nikʼwach ne inqakʼuhtaaj chi maʼ inqatahqeej ta i rutaqʼaniik i winaq?

Jeʼ rukabʼ i Jesús, reʼ hoj maʼ inqamin ta qiibʼ pan política. Noq reʼ taqeh kʼachareel xkil jenaj reh i sachbʼal kʼuxliis xubʼan i Jesús xkaaj kikojom chi rey ayuʼ wach akʼal, xa reʼ laʼ reʼ reh maʼ xuyeew ta qʼabʼ (Juan 6:​15). ¿Chaaj woʼ reet? Ruum chi reʼ Jesús xuqʼor: «Reʼ i runimaal i wajaawriik i hin maʼ reʼ ta reh ayuʼ wach akʼal» (Juan 18:​36). Reʼ hoj rajtahqaneel i Jesús kʼih ruwiiʼ inqakʼuhtaaj chi maʼ inqatahqeej ta i rutaqʼaniik i winaq, jeʼ rukabʼ noq maʼ qojooj ta chi qʼaqʼinik (chawil Miqueas 4:3). Maʼ inqayeew ta ruloqʼil taqeh ehtalil reh i tinamit jeʼ rukabʼ i bandera, ruum chi mi xqayeew kʼahchiʼ qakʼuhtaam chi inqaloqʼej wach (1 Juan 5:​21). Eh maʼ inqatahqeej ta woʼ ajwach iraaj okik chi ajaawriik nah tinamit, maʼ inqatobʼeej ta taqeh eh maʼ inqixowaaj ta woʼ kiwach. Ruukʼ taqeh wilih eh tokoom chik ruwiiʼ inqakʼuhtaaj chi korik wach qakʼux chi riij i runimaal rajaawriik i Dios, reʼ taqʼanik xupahbʼaaʼ ar pan taxaaj.

 CHATZʼIR RIIJ I KʼAHCHIʼ ATIJEM

3. Reʼ hoj manlik ajnimaneel maʼ inooj ta qakʼux chi riij i política ruukʼ inqabʼan eh inqikʼraaj

Ne inqatijej qeh i xubʼan i Jesús eh taqeh rajtahqaneel. Chawil taq i Romanos 13:​1, 5-7 eh i 1 Pedro 2:​13, 14. Chi riij reʼ chawil taq i VIDEO eh tiqʼoroq taq chi riij:

• ¿Chajariik narikʼraam jenoʼ ajnimaneel chi riij i wilik kajaawriik? Eh ¿Chaaj woʼ reet?

• ¿Ahaʼ wilik taqeh rukʼuhbʼaal i tinamit ko ruman chi ne inqakʼam naah?

Noq inwihʼik qʼaqʼinik juʼjun taqeh tinamit inkiqʼor chi maʼ inkimin ta kiibʼ pan qʼaqʼinik xa reʼ laʼ, reh reh ruwiiʼ kitobʼjiik i kabʼchel chi tinamit inkibʼan. ¿Irukʼuhtaaj na i wilih chi maʼ inooj ta kikʼux chi riij i qʼaqʼinik? Chawil taq i Juan 17:​16. Chi riij i reʼ chawil taq i VIDEO eh tiqʼoroq taq chi riij:

• ¿Chajariik iraaj ruqʼorom chi maʼ inqatahqeej ta i rutaqʼaniik i winaq?

Wilik pech reʼ taqeh winaq kitaqʼanik inkipahqaaj qeh chi ne inqabʼan jenoʼ naʼojbʼal reʼ maʼ rukʼam ta riibʼ ruukʼ i rukʼuhbʼaal i Dios. ¿Chajariik ne inqabʼan mi jeʼ reʼ inkʼuljik? Chawil taq i Hechos 5:​28, 29. Chi riij i reʼ chawil taq i VIDEO eh tiqʼoroq taq chi riij:

• Mi jenoʼ rukʼuhbʼaal i rutaqʼaniik i winaq maʼ irukʼam ta riibʼ ruukʼ i rukʼuhbʼaal i Dios, ¿ahaʼ wilik i ne inqanimaj?

• Wilik pech taqeh ajnimaneel maʼ ne ta inkinimaj taqeh wilik kajaawriik, ¿chaaj woʼ reet?

 4. Maʼ min awiibʼ pan política ruukʼ inaqʼor ruukʼ inabʼan ni xa ta ruukʼ akapebʼaal

Chawil taq i 1 Juan 5:​21. Chi riij i reʼ chawil taq i VIDEO eh tiqʼoroq taq chi riij:

• ¿Chaaj woʼ reet i Ayenge maʼ xumin ta riibʼ pan política ni xa ta xraaj wihʼik pan moloj iibʼ reh rukʼalenik i bandera?

• ¿Inaqʼor na i hat chi holohik i xuchih?

¿Chajariik chik ne rubʼan chi ne inooj qakʼux chi riij i política? Chawil taq i VIDEO eh tiqʼoroq taq chi riij:

• ¿Nikʼwach ne inqakʼuhtaaj chi maʼ inooj ta qakʼux chi riij taqeh kʼoʼnik pelota reh i qatinamiit oon tokoom chik kʼoʼnik chi jun suut i akʼal?

• Wilik pech reʼ taqeh wilik kajaawriik inkichih i holohik oon wilik pech inkichih i maʼ holohik ta, noq jeʼ reʼ ¿chajariik naqabʼanam reh chi maʼ ne ta inooj ta qakʼux chi riij inkichih?

• ¿Nikʼwach ne qojrujotʼ rubʼirjiik inkiqʼor taqeh ajnoticia eh rubʼirjiik i juʼjun chi kʼachareel?

 KʼOLOQ PAN AKʼUX

Reʼ taqeh ajnimaneel inkichop kikʼux reh chi maʼ inkimin ta kiibʼ pan política eh reʼ wilih inkʼutinik ruukʼ inkikapaaj ruukʼ inkiqʼor eh ruukʼ i kibʼanooj.

Reʼ xkahnik pan akʼux

• ¿Ahaʼ wilik taqeh rukʼuhbʼaal i tinamit ko ruman chi ne inqanimaj?

• ¿Chaaj woʼ reet maʼ inqamin ta qiibʼ pan política?

• ¿Nikʼ ne inqakʼuhtaaj chi maʼ ajwach ta inqatahqeej?