Kʼih chik i xatijej chi riij i Jehová ruukʼ atijinik chi riij i Santo Laj Huuj. Ruum chi xakoj pan ruman i xatijej pan Santo Laj Huuj mareh wilik chik i xajal pan akʼachariik. Xa reʼ laʼ, mareh wilik kʼahchiʼ kaat ruqʼatam reh chi ne naqʼahsaj akʼachariik reh i Jehová eh chi ne naqahsaj ahaaʼ. Reʼ tijinik wilih iruqʼor qeh taqeh kʼaxkilal kiʼikʼik wiiʼ taqeh kitijinik chi riij i Santo laj Huuj, iruqʼor woʼ qeh nikʼwach xiʼelik chupaam reh chi xkiqahsaj kihaaʼ eh iruqʼor woʼ chajariik ne nabʼan i hat reh chi ne naqahsaj ahaaʼ.

1. ¿Aajwaal na wach chi kʼih naʼawehtʼaliim chi riij i Santo Laj Huuj reh chi ne naqahsaj ahaaʼ?

Reh chi ne naqahsaj ahaaʼ ko ruman chi ne nareq chi riij i korik (1 Timoteo 2:4). Reʼ wilih maʼ raaj ta ruqʼorom chi noq ko majaaʼ inaqahsaj ahaaʼ naʼawehtʼaliim ruchaqʼwesjiik chuʼnchel taqeh pahqanik ne inkibʼan aweh chi riij i Santo Laj Huuj. Reʼ taqeh ajnimaneel, reʼ najtir kiqahsam kihaaʼ ko ruman chi keh chi maʼ ne ta inkikanaaʼ tijinik (Colosenses 1:​9, 10). Xa reʼ laʼ reʼ ko ruman chi ne nareq chi riij, reʼ taqeh kʼuhtanik aajwaal wach wilik pan Santo Laj Huuj. Reʼ taqeh kʼamal bʼeeh pan molaabʼ ne tikitobʼeej runabʼjiik mi reʼ hat awehtʼal chik i korik chi riij i Santo Laj Huuj.

2. ¿Chajariik ko ruman chi naʼabʼanam reh chi ne naqahsaj ahaaʼ?

Reʼ Santo Laj Huuj iruqʼor: «Chayotʼ taq akʼux eh chajal taq wach anaʼojbʼal» (chawil Hechos 3:​19, TNM). Reʼ wilih naʼabʼanam noq ko majaaʼ inaqahsaj ahaaʼ. Xa reʼ laʼ ¿chajariik iraaj ruqʼorom chi naʼayotʼom akʼux? Iraaj ruqʼorom chi reʼ hat intiʼbʼik akʼux ruum taqeh mahk abʼanam eh inapahqaaj kuybʼal amahk reh i Jehová. Iraaj woʼ ruqʼorom chi naʼakanaam taqeh i maʼ holohik ta bʼanooj eh chi naʼachopom akʼux reh kʼacharik jeʼ rukabʼ imponik chuwach i Dios. Reʼ wilih iraaj woʼ ruqʼorom chi reʼ hat inatoqʼaaʼ ojik pan chuʼnchel taqeh moloj iibʼ reh i molaabʼ eh chi inaqʼor i kʼuhbʼaal atoobʼ ta maʼ qahsimaj ta ahaaʼ.

3. ¿Chaaj woʼ reet maʼ na ta akanaam chi reʼ yoʼjik ne tiruqʼat reh chi ne naqahsaj ahaaʼ?

Juʼjun maʼ inkiqahsaj ta kihaaʼ ruum chi kiyoʼjik chi ne kiqʼehbʼik pan mahk eh chi maʼ ne ta inkibʼan xkiqʼor reh i Jehová. Korik, wilik pech reʼ hat ne nabʼan i maʼ holohik ta jeʼ rukabʼ xkikʼul taqeh winaq eh ixoq korik wach kikʼux reʼ iruqʼor i Santo Laj Huuj. Xa reʼ laʼ kʼoloq pan akʼux chi reʼ Jehová maʼ ruyʼeej ta chi reʼ taqeh rajkamanoom xa korik chik kiwach (chawil Salmo 103:​13, 14). Reʼ reh ne insuqbʼik rukʼux awuukʼ wilaʼ reʼ hat ne inabʼan chuʼnchel i wilik pan aqʼabʼ. Eh reʼ Jehová ne woʼ tirutobʼeej. Reʼ reh iruqʼor qeh chi «maʼxta ne qojruchʼaq ruukʼ i rukʼaxooj i Dios» (chawil Romanos 8:​38, 39, TNM).

 CHATZʼIR RIIJ I KʼAHCHIʼ ATIJEM

4. Chanabʼeej wach chi korik i Jehová

5. Ne tiʼelik korik chupaam taqeh kʼaxkilal

 6. Chakoj akʼux chi reʼ Jehová ne tirutobʼeej

7. Chatyooxeej reh i Jehová ruukʼ chuʼnchel akʼux i kʼaxooj irikʼraaj chawiij

 KʼOLOQ PAN AKʼUX

Ruukʼ i rutobʼaal i Jehová, ne tiʼelik korik chupaam taqeh kʼaxkilal reʼ taqeh tiruqʼat reh chi ne naqahsaj ahaaʼ.

Reʼ xkahnik pan akʼux

• ¿Aajwaal na wach chi kʼih naʼawehtʼaliim chi riij i Santo Laj Huuj reh chi ne naqahsaj ahaaʼ?

• ¿Chajariik ko ruman chi naʼabʼanam reh chi ne naqahsaj ahaaʼ?

• ¿Chaaj woʼ reet maʼ na ta akanaam chi reʼ yoʼjik ne tiruqʼat reh chi ne naqahsaj ahaaʼ?