Noq reʼ Jehová xojrutzʼuhkrisaj xuyeew qeh i kooch reh qʼorik. ¿Imponik na chuwach i Dios nikʼwach tiqʼorik? Mareh imponik chuwach oon mareh maʼchih (Chawil Santiago 1:​26). Jeʼ reʼ noq, ¿nikʼwach ne inqakoj i qaqʼorbʼal reh chi ne imponik chuwach i Jehová?

1. ¿Nikʼwach ne inqakoj chi korik i qaqʼorbʼal reʼ xuyeew chi qakooch i Jehová?

Reʼ Santo Laj Huuj iruqʼor qeh: «Kʼul taq chayeew rukowiil akʼux chawach, kʼul taq chatoobʼeej awiibʼ chawach» (1 Tesalonicenses 5:​11). ¿Mi awehtʼal wach jenoʼ iraaj rukowiil rukʼux? ¿Chajariik naq ne nabʼan reh chi ne insuqbʼik rukʼux? Chaqʼor reh i kʼachareel reʼreʼ chi looqʼ chaweh. Chaqʼor reh taqeh holohik naʼojbʼal wilik reh. ¿Inkʼulik na pan akʼux jenoʼ texto reh i Santo Laj Huuj reʼ ne iruyeew rukowiil rukʼux jenoʼ awehtʼal wach? Kʼih taqeh texto wilik reh chi ne inachih. Eh kʼoloq pan akʼux chi reʼ i naʼaqʼorom reh jenoʼ kʼachareel, ne irutiʼbʼisaj rukʼux oon ne irusuqbʼisaj rukʼux. Jeʼ reʼ noq juneliik tiqʼoroq pan chaqʼlamiil eh pan rukorkiil (Proverbios 15:1).

2. ¿Ahaʼ wilik taqeh qʼorik ko ruman chi maʼ ne ta inqaqʼor?

Reʼ Santo Laj Huuj iruqʼor: «Maʼ eloq taq cho pan achiiʼ taqeh qʼorik chʼuwaʼ wach» (chawil Efesios 4:​29, TNM). Reʼ wilih iraaj ruqʼorom chi maʼ na ta qaqʼorom taqeh qʼorik chʼuwaʼ wach, tiʼlaj qʼorik oon bʼajooj reh rutibʼsjiik kikʼux taqeh kʼachareel. Eh maʼ na ta woʼ qaqʼorom taqeh moloj wach kʼutaaj eh ni xa ta chukuj qʼorik (chawil Proverbios 16:​28).

3. ¿Chajariik ne intoobʼinik qeh reh chi holohik i qʼorik naqabʼanam?

Reʼ taqeh inqaqʼor irukʼuhtaaj chajariik taqeh inqakapaaj eh inqikʼraaj (Lucas 6:​45). Ruum aj reʼ naqokrisam qiibʼ reh rukapebʼjiik chuʼnchel taqeh atoobʼ chi bʼanarik eh i maʼxta ruchʼuwaʼil wach eh taqeh irukʼul chi ne inyeʼarik kiloqʼil eh jeʼ woʼ taqeh qʼorik reʼ irukʼuhtaaj kʼaxooj (Filipenses 4:8). Reh rubʼanariik taqeh wilih, naqachihiim chi korik i naqachamam wiiʼ qiibʼ eh naqasikʼim qamigo holohik i kinaʼojbʼal (Proverbios 13:​20). Ko ruman woʼ chi peet naqakapaam i naqaqʼorom. Chakapaaj chajariik naq ne inkikʼraaj i kibʼirinik aweh ruukʼ i naʼaqʼorom. Reʼ Santo Laj Huuj iruqʼor: «Wilik taqe i qʼeʼ tiʼ kiqʼojwik ruukʼ i kiqʼoral. Eh reʼ i wilik kinaʼojbʼal ruukʼ i kiqʼoral, inkiqʼomaaj i tiʼ reʼ reʼ» (Proverbios 12:​18).

 CHATZʼIR RIIJ I KʼAHCHIʼ ATIJEM

4. Chawikʼraaj awiibʼ ruukʼ i qʼorik inabʼan

Chi qunchelaal mareh xqaqʼor jenoʼ qʼorik maʼ holohik ta eh chi riij i reʼ maʼ suq ta xubʼan qeh xqaqʼor (Santiago 3:2). Chawil taq i Gálatas 5:​22, 23 eh tiqʼoroq taq chi riij:

• Reh chi ne tiqʼorik pan rukorkiil, ¿ahaʼ wilik reh taqeh naʼojbʼal wilih ne napahqaaj reh i Jehová? ¿Nikʼwach naq ne tirutobʼeej taqeh naʼojbʼal wilih?

Chawil taq i 1 Corintios 15:​33 eh tiqʼoroq taq chi riij:

• ¿Ne na tirujotʼ nikʼwach kiqʼorik taqeh awamigo eh taqeh i kʼoʼnik inachih eh taqeh inacham wiiʼ awiibʼ? ¿Nikʼwach ne tirujotʼ?

Chawil taq i Eclesiastés 3:​1, 7 eh tiqʼoroq taq chi riij:

• ¿Nikʼ naq ne irubʼan chi maʼ ne ta tiqʼorik oon ne inawuyʼeej reh qʼorik?

 5. Holohik tiqʼoroq chi kiij taqeh tokoom

6. Hat oq chaqʼlaam noq ne tiqʼorik ruukʼ afamilia

 KʼOLOQ PAN AKʼUX

Ruukʼ taqeh inqaqʼor ne inqatiʼbʼisaj kikʼux i kibʼirinik qeh oon ne inqasuqbʼisaj kikʼux. Ruum aj reʼ naqakapaam chi riij i naqaqʼorom eh naqakapaam nikʼ naqaqʼoriik eh nikʼwach naqaqʼorom.

Reʼ xkahnik pan akʼux

• ¿Nikʼwach naʼaqʼoriik reh kitoobʼjik i kibʼirinik aweh?

• ¿Chajariik chi qʼorik maʼ irukʼul ta chi qʼorarik?

• ¿Chajariik ne qojrutobʼeej reh chi juneliik holohik ne qojqʼorik eh pan chaqʼlamiil?