Chi qunchelaal reh reh wach inqatiqʼaaʼ qiibʼ, noq inqatiqʼaaʼ qiibʼ irukʼuhtaaj nikʼwach i hoj eh ne woʼ irubʼan chi ne inqasuqbʼisaj rukʼux i Jehová mi inqakʼam naah juʼjun taqeh naʼojbʼal inqatijej pan Santo Laj Huuj. Qatzʼir riij juʼjun.

1. ¿Chajariik chi naʼojbʼal inqatijej pan Santo Laj Huuj ne qojrutobʼeej runabʼjiik nikʼwach naqatiqʼaam qiibʼ?

Reʼ ajnimaneel naruchihiim i itzʼih irukʼul chi kojarik eh maʼ na ta rikʼsam naah i narubʼanam, naruwihʼiik runaʼojbʼal. Eh ko ruman woʼ hoq chi saq wach i kitibʼkaal eh i kisoʼ reh chi ne inkikʼuhtaaj chi «rajloqʼineel i Dios taqeh» (1 Timoteo 2:​9, 10, TNM). Chakoj rehtaal i kijibʼ chi naʼojbʼal inqareq pan texto wilih. 1) Reʼ qasoʼ irukʼul oq «chi kojarik». Pan rutinamiit i Jehová reh reh wach itzʼih inqakoj mareh awilom chupaam taqeh qamoloj iibʼ, xa reʼ laʼ ruukʼ i qasoʼ eh ruukʼ i rismaal qanaah ne inqakʼuhtaaj chi inqayeew ruloqʼil i Dios. 2) Noq «maʼ inqikʼsaj ta naah» noq inqatiqʼaaʼ qiibʼ, iraaj ruqʼorom chi maʼ na ta qakojom taqeh itzʼih saqum wach eh taqeh itzʼih irukʼuhtaaj i qatibʼkaal oon taqeh i xa ritʼik chik, maʼ na ta woʼ qakojom taqeh itzʼih reʼ ne irubʼan chi reʼ taqeh kʼachareel xa kow chik ne qojkitzʼehtaaj. 3) Inqakʼuntaaj chi «wilik qanaʼojbʼal» noq maʼ inqakoj ta taqeh i koreʼ kʼahchiʼ relik cho. 4) Reʼ qasoʼ naqakojom juneliik narukʼuhtaam chi hoj «rajloqʼineel i Dios», jeʼ reʼ ne inqakʼuhtaaj keh i kʼachareel chi inqaloqʼej wach i manlik Dios (1 Corintios 10:​31).

2. ¿Nikʼwach ne irikʼraaj riibʼ jenoʼ ajnimaneel ruukʼ inqakoj chi qiij?

Korik chi reʼ hoj ne inqakoj xa paʼ jariik inqaaj. Xa reʼ laʼ naqakapaam nikʼwach inqatiqʼaaʼ qiibʼ ruum chi mareh maʼ suq ta ne irubʼan keh i kiʼilwik qeh. Inqabʼan chuʼnchel i wilik pan qaqʼabʼ reh chi maʼ ne ta inqaqʼebʼ taqeh tokoom ruukʼ i qasoʼ inqakoj. Inqakʼam laʼ naah i naʼojbʼal wilih: «Chi qajuʼjunaal qabʼan i holohik reh rutoobʼjiik i qas qachaaqʼ, reh chi kow rukʼux» (chawil Romanos 15:​1, 2, TNM).

3. ¿Nikʼwach naqatiqʼaam qiibʼ reh chi reʼ taqeh kʼachareel ne inkaaj kinabʼeem wach i Jehová?

Inqachih chi korik i qasoʼ inqakoj reh i juʼjun chi qʼiij. Jeʼ rukabʼ inqakoj reh ojik chupaam taqeh moloj iibʼ reh i molaabʼ eh jeʼ woʼ i reh ojik chi qʼoroj kʼuhbʼaal. Maʼ inqaaj ta chi reʼ taqeh kʼachareel ne inkiqʼor i maʼ holohik ta chi riij i Dios, ruum nikʼwach inqatiqʼaaʼ qiibʼ. Inqaaj laʼ qayeʼem rukowiil kikʼux reh chi ne inkaaj kitijem chi riij i Dios reh chi ne inkikoj rehtaal i «xiikʼ naah holwochiil laj kʼuhbʼaal kʼuhtamaj cho keh chi riij i Dios, i qaj Koʼloom» (Tito 2:​10).

 CHATZʼIR RIIJ I KʼAHCHIʼ ATIJEM

4. Noq inqatiqʼaaʼ qiibʼ jeʼ rukabʼ imponik chuwach i Jehová inqayeew ruloqʼil

¿Chaaj woʼ reet xti ko ruman chi naqakapaam nikʼwach inqatiqʼaaʼ qiibʼ? Chawil taq i Salmo 47:2 eh tiqʼoroq taq chi riij:

• Ruum chi inqakʼam i rubʼihnaal i Jehová, ¿nikʼwach ko ruman chi naqatiqʼaam qiibʼ?

• ¿Ko ruman na chi ne nakoj rehtaal nikʼwach inatiqʼaaʼ awiibʼ reh ojik chupaam taqeh moloj iibʼ eh reh ojik chi qʼoroj kʼuhbʼaal? ¿Chaaj woʼ reet jeʼ reʼ inakapaaj?

 5. Nikʼwach ne inqachih chi korik i qasoʼ eh nikʼwach naqatiqʼaam qiibʼ

Chawil taq i VIDEO.

Maʼxta qʼorik reh mi kʼih tzʼaaqʼ i qasoʼ oon maʼ kʼih ta tzʼaaq, xa reʼ laʼ mi saq wach eh irukʼul oq chi kojarik pan reh reh wach yeʼaabʼ wilkooj wiiʼ. Chawil taq i 1 Corintios 10:​24 eh i 1 Timoteo 2:​9, 10. Chi riij i reʼ tiqʼoroq taq chi riij chaaj woʼ reet maʼ ne ta naq inqakoj taqeh itzʼih mi...

• ... chʼuwaʼ wach mi weqenaq oon maʼ irukʼul ta chi kojarik.

• ... ritʼik, mi saqum wach oon mi inkʼutinik i qatibʼkaal.

Atoobʼ ta reʼ taqeh ajnimaneel maʼ inqanimaj ta chik i kʼuhbʼaal xyeʼarik reh i Moisés, reʼ kʼuhbʼaal wilih iruqʼor qeh chi riij irukapaaj i Jehová. Chawil taq i Deuteronomio 22:5 eh tiqʼoroq taq chi riij:

• ¿Chaaj woʼ reet maʼ holohik ta chi jenoʼ ixoq ne irutiqʼaaʼ riibʼ chi jeʼ rukabʼ winaq eh chi jenoʼ winaq ne irutiqʼaaʼ riibʼ chi jeʼ rukabʼ ixoq?

Chawil taq i 1 Corintios 10:​32, 33 eh i 1 Juan 2:​15, 16, eh tiqʼoroq taq chi riij:

• Wilaʼ reʼ taqeh kʼachareel ahaʼ wiiʼ qojpatinik oon reʼ molaabʼ qojponik wiiʼ maʼ suq ta inkikʼraaj kiibʼ ruukʼ nikʼwach inqatiqʼaaʼ qiibʼ, ¿naqakanaam na chi jeʼ reʼ oon wilik i naqabʼanam? ¿Chaaj woʼ reet?

• ¿Chajariik chi itzʼih wilik pan atinamiit eh nikʼwach inkitiqʼaaʼ kiibʼ?

• ¿Inakapaaj na chi reʼ taqeh itzʼih reʼreʼ, maʼ irukʼul ta chi reh jenoʼ ajnimaneel? ¿Chaaj woʼ reet jeʼ reʼ inakapaaj?

 KʼOLOQ PAN AKʼUX

Noq inqachih i qasoʼ naqakojom eh inqatiqʼaaʼ qiibʼ chi korik inqayeew ruloqʼil i Jehová eh taqeh kiʼilwik qeh.

Reʼ xkahnik pan akʼux

• ¿Chaaj woʼ reet i Jehová iruqʼor qeh nikʼwach naqatiqʼaam qiibʼ?

• ¿Ahaʼ wilik taqeh naʼojbʼal inqatijej pan Santo Laj Huuj ne qojrutobʼeej runabʼjiik nikʼwach naqatiqʼaam qiibʼ?

• Ruukʼ nikʼwach inqatiqʼaaʼ qiibʼ, ¿ne na irubʼan chi reʼ taqeh kʼachareel ne inkaaj kinabʼeem wach i Jehová? ¿Chaaj woʼ reet jeʼ reʼ inakapaaj?