Chi jun suut i akʼal millón chi kʼachareel, ruukʼ chuʼnchel kikʼux inkiyeew ruloqʼil i Jehová chupaam taqeh kʼihaal chi molaabʼ. Reʼ taqeh ajnimaneel wilih looqʼ chi keh chi inkʼamarik kibʼeeh eh chi inyeʼarik kinaʼojbʼal. Ruukʼ chuʼnchel kikʼux inkitobʼeej i kimolaabʼ eh kʼih ruwiʼ rutoobʼjiik inkibʼan. ¿Jeʼ na reʼ inawaaj abʼanam i hat pan amolaabʼ?

1. ¿Nikʼwach rutoobʼjiik amolaabʼ ne nabʼan ruukʼ awansil eh ruukʼ aqʼiij?

Chi qunchelaal ne qojtoobʼinik pan molaabʼ. ¿Wilik na taqeh hermano yowaabʼ eh nim kihabʼul pan amolaabʼ? ¿Ne na irubʼan chi ne inakʼam taqeh ruje pan moloj iibʼ? ¿Ne na irubʼan chi ne inooj abʼan kiloqʼ pan kʼaybʼal oon kitoobʼjiik ruukʼ iraaj bʼanarik pan kipaat? (Chawil Santiago 1:​27). Ne woʼ irubʼan chi ne inqabʼehsaj qiibʼ reh rumesjiik paam i qayeʼaabʼ reh moloj iibʼ eh rilariik mi wilik iraaj korsjik chupaam. Maʼ ajwach ta qojrumin chupaam i wilih, xa pan qakʼux inchalik toobʼinik ruum chi inqaaj wach i Dios eh inqaaj woʼ kiwach taqeh qahermano (Salmo 110:3).

Reʼ taqeh qahsimaj chik kihaaʼ chi Testigo ne woʼ kitoobʼinik ruukʼ tokoom chik kamanik pan molaabʼ. Reʼ taqeh hermano, reʼ inkaaj toobʼinik wilik i nakibʼanam reh chi ne kiponik chi ajtoʼool keh i kʼamal bʼeeh oon chi kʼamal bʼeeh. Eh reʼ taqeh hermano eh taqeh hermana ne woʼ irubʼan chi ne kitoobʼinik chi qʼoroj kʼuhbʼaal chi precursor. Eh juʼjun taqeh Testigo kitoobʼinik reh rukorsjiik taqeh yeʼaabʼ reh loqʼinik. Eh wilik i kiʼooj pan tokoom yeʼaabʼ reh rutoobʼjiik jenoʼ molaabʼ ahaʼ wiiʼ aajwaal wach chi reh.

2. ¿Nikʼwach ne inqatobʼeej i molaabʼ ruukʼ i qatumiin eh ruukʼ i wilik qeh?

Reʼ Santo Laj Huuj iruqʼor: «Chakʼax i QaJaaw Dios [Jehová] ruukʼ taqe i chibʼih aweh» (Proverbios 3:9). Looqʼ chi qeh rukojariik i qatumiin eh taqeh wilik qeh reh rutoobʼjiik i qamolaabʼ eh jeʼ woʼ rutoobʼjiik i qʼoroj kʼuhbʼaal chi jun suut i akʼal (chawil 2 Corintios 9:7). Eh ruukʼ i qatoobʼinik ruukʼ tumiin inqatobʼeej taqeh qahermano inkikʼul i tiʼ kʼaxik. Kʼih inkisaj pareh kiʼsinoq kitumiin reh toobʼinik (chawil 1 Corintios 16:2). Reʼ tumiin ne irubʼan chi ne inqakoj chupaam taqeh kokʼ kaxoon reʼ wilkeebʼ pan qayeʼaabʼ reh loqʼinik oon ne woʼ irubʼan chi reʼ qatoobʼinik ruukʼ tumiin ne inqataqʼaaʼ pan qayeʼaabʼ reh internet donate.pr418.com. Reʼ Jehová iruyeew qʼabʼ qeh rukojariik i qatumiin eh i wilik qeh reh rukʼuhtjiik i qakʼaxooj chi riij.

 CHATZʼIR RIIJ I KʼAHCHIʼ ATIJEM

 KʼOLOQ PAN AKʼUX

Reʼ Jehová looqʼ chi reh chuʼnchel taqeh mayiij inqayeew reh rutoobʼjiik i molaabʼ, jeʼ rukabʼ noq qojtoobʼinik ruukʼ i qaqʼiij, ruukʼ i qansil eh ruukʼ i qatumiin.

Reʼ xkahnik pan akʼux

• ¿Nikʼwach rutoobʼjiik i molaabʼ ne inqabʼan ruukʼ i qansil eh ruukʼ i qaqʼiij?

• ¿Nikʼwach ne inqatobʼeej i molaabʼ ruukʼ i qatumiin eh ruukʼ i wilik qeh?

• ¿Nikʼwach ruwiiʼ inawaaj atobʼeem i molaabʼ?