Noq wilkooj chi kixilak taqeh qahermano inqikʼraaj qiibʼ jeʼ rukabʼ i rey David. Reʼ reh xuqʼor: «¡Chakoj taq rehtaal chi maʼ kʼisiin ta holwochiil. Eh maʼ kʼisiin ta loqʼil noq reʼ taqe hermano wilkeebʼ pan komonil, pan jinaj wach kʼuxliis!» (Salmo 133:1). Reʼ wihʼik pan jenaj wach kʼuxliis xa maʼ inchalik ta chi jeʼ reʼ, chi qunchelaal wilik i naqabʼanam reh chi maʼ ne ta inqaqʼebʼ.

1. ¿Chajariik imponik chawach chi riij inkibʼan i rutinamiit i Dios?

Mi reʼ hat tiʼooj pan tokoom tinamit eh tiponik pan jenoʼ molaabʼ mareh maʼ ne ta inareq chi riij i kiqʼorbʼal, xa reʼ laʼ ne inawikʼraaj chi xa jeʼ pan apaat wilkaat. ¿Chaaj woʼ reet? Ruum chi xa ahaʼ paʼ ne tiʼooj ne nawil chi reʼ taqeh testigo reh Jehová jenaj wach i huuj inkikoj reh tijinik chi riij i Santo Laj Huuj. Eh inqakowej woʼ qakʼux reh rukʼuhtjiik i kʼaxooj chi qawach. Eh xa ahaʼ paʼ qojpatinik chi qunchelaal inqaaj «qaqʼorom i rubʼihnaal i Jehová eh inqaaj qaloqʼem wach pan jenaj wach kʼuxliis» (Sofonías 3:9, TNM).

2. ¿Chajariik ko ruman chi ne nabʼan reh wihʼik pan jenaj wach kʼuxliis pan molaabʼ?

«Inchol taq akʼaxam awiibʼ chawach chi maʼ xta ruchʼuwaʼiil taq wach awánima eh chuʼnchel-oq taq akʼux» (1 Pedro 1:​22). ¿Nikʼwach ne nakʼam naah i naʼojbʼal wilih? Chakoj akʼux chi rilariik i holohik naʼojbʼal inkibʼan taqeh ahermano eh maʼ reʼ ta i maʼ holohik ta. Matwihʼik xa chi kixilaak reʼ inkikʼax wach i nakʼax wach i hat, chanikʼeej laʼ runabʼjiik kiwach taqeh kʼachareel reh reh wach i kikʼachariik eh i kiwiiʼ. Chabʼan chuʼnchel i wilik pan aqʼabʼ reh risjiik pan awanima mi tokoom rilariik taqeh kʼachareel inabʼan (chawil 1 Pedro 2:​17). a

3. ¿Chajariik naʼabʼanam noq inchalik akʼaah ruukʼ jenoʼ ajnimaneel?

Korik chi pan jenaj wach kʼuxliis wilkooj xa reʼ laʼ, ruum chi maʼ manlik ta qawach wilik pech ne inqaqʼoj qiibʼ ruukʼ i qaqʼorbʼal eh ne inqajik qakʼux. Ruum aj reʼ, reʼ ruqʼorbʼal i Dios iruqʼor: «Juneliik chakuy taq amahk». Eh chi riij i reʼ xuqʼor: «Jeʼ rukabʼ noq maʼ pajooj ta i kuyuj mahk xubʼan taq awuukʼ i Jehová, jeʼ woʼ reʼ taq naʼabʼanam i hat» (chawil Colosenses 3:​13, TNM). Pan korik, kʼih pech inqabʼan tiʼ reh i Jehová, xa reʼ laʼ reʼ reh irukuy qamahk. Eh ruum aj reʼ iraaj chi ne inqakuy kimahk taqeh qahermano. Mi reʼ hat xakoj rehtaal chi xabʼan tiʼ reh jenoʼ hermano tiqʼoroq ruukʼ chi riij i kʼaxkilal (chawil Mateo 5:​23, 24). b

 CHATZʼIR RIIJ I KʼAHCHIʼ ATIJEM

4. Jenaj wach rilariik taqeh kʼachareel chabʼan

Inqaaj qakʼuhtaam i qakʼaxooj chi kiij chuʼnchel taqeh qahermano. Xa reʼ laʼ, mareh ne inqakʼaxkileej kikʼaxariik i juʼjun, jeʼ rukabʼ noq inqakapaaj chi maʼ jenaj ta qawach kuukʼ. ¿Chajariik ne intoobʼinik qeh? Chawil taq i Hechos 10:​34, 35 eh tiqʼoroq taq chi riij:

• Reʼ Jehová iraaj chi chuʼnchel taqeh kʼachareel atoobʼ ta reh reh wach i kitinamiit ne kiponik chi rutestigo. Wilaʼ jeʼ reʼ, ¿nikʼwach rilariik taqeh kʼachareel naʼabʼanam reʼ maʼ jenaj ta kiwach awuukʼ?

• Pan atinamiit, ¿tokoom na rilariik taqeh kʼachareel inbʼanarik? ¿Chaaj woʼ reet maʼ ne ta irubʼan chi ne inatijej aweh i naʼojbʼal reʼreʼ?

Chawil taq i 2 Corintios 6:​11-​13 eh tiqʼoroq taq chi riij:

• ¿Chajariik naq ne nabʼan reh chi maʼ ne ta irukanaaʼ kʼihik akʼaxooj chi kiij taqeh ahermano eh hermana?

5. Chakuy i mahk ruukʼ chuʼnchel akʼux eh tiwihʼoq pan tuqkilal kuukʼ i tokoom

Atoobʼ ta reʼ hoj maʼ ne ta irubʼan chi ne inqakuy rumahk i Jehová ruum chi reʼ reh maʼ reʼ ta ajmahk, reʼ reh irukuy laʼ qamahk ruukʼ chuʼnchel rukʼux. Chawil taq i Salmo 86:5 eh tiqʼoroq taq chi riij:

• Jeʼ rukabʼ xawil pan versículo wilih, ¿nikʼwach i kuyuj mahk irubʼan i Jehová?

• ¿Inatyooxeej na chi reʼ Jehová irukuy i mahk? ¿Chaaj woʼ reet?

• ¿Chajariik taqeh kʼaxkilal irubʼan chi maʼ inakʼam ta awiibʼ ruukʼ taqeh tokoom?

Reh chi ne qojwihʼik pan jenaj wach kʼuxliis ruukʼ taqeh qahermano, ¿chajariik naqabʼanam reh chi ne inqatijej qeh i kuyuj mahk irubʼan i Jehová? Chawil taq i Proverbios 19:​11 eh tiqʼoroq taq chi riij:

• Noq ne inkibʼan aweh i maʼ holohik ta, ¿chajariik naq ne nabʼan reh chi maʼ ne ta inimbʼik wach i kʼaxkilal?

 Wilik pech reʼ hoj inqabʼan i maʼ holohik keh i tokoom. Mi jeʼ reʼ xkʼuljik, ¿chajariik naq ne inqabʼan? Chawil taq i VIDEO eh tiqʼoroq taq chi riij:

• ¿Chajariik xubʼan i hermana pan video reh chi xwihʼik pan tuqkilal ruukʼ i jenaj chik hermana?

 KʼOLOQ PAN AKʼUX

Mi reʼ hat inakuy kimahk taqeh ahermano eh inakʼuhtaaj chi inawaaj kiwach, ne nabʼan chi pan jenaj wach kʼuxliis ne inwihʼik i molaabʼ.

Reʼ xkahnik pan akʼux

• ¿Chajariik ne intoobʼinik aweh reh chi jenaj wach rilariik taqeh kʼachareel ne nabʼan?

• ¿Chajariik naʼabʼanam mi xchalik akʼaah ruukʼ jenoʼ ajnimaneel?

• ¿Inawaaj na akuyum kimahk taqeh tokoom jeʼ rukabʼ irubʼan i Jehová? ¿Chaaj woʼ reet?