Reʼ hoj qehtʼal chi reʼ Dios ajkʼaxool, xa reʼ laʼ reʼ taqeh nimanik inkiqʼor chi inkiyeew ruloqʼil i Dios ruukʼ i kibʼanooj eh ruukʼ i kinaʼojbʼal, wilaʼ jeʼ reʼ ¿chaaj woʼ reet inkibʼan i maʼ holohik ta chi bʼanarik? Inkibʼan i wilih ruum chi maʼ manlik ta ajnimaneel taqeh. Ruukʼ taqeh chukuj qʼorik inkiqʼor eh ruukʼ i kibʼanooj inkichʼuwaʼrisaj wach i rubʼihnaal i Dios. ¿Nikʼwach kibʼanam i wilih? ¿Chajariik irikʼraaj i Dios chi riij inkibʼan? ¿Eh chajariik i narubʼanam i Dios?

1. ¿Chajariik inkikʼuhtaaj i maʼ manlik ta nimanik?

Reʼ taqeh maʼ manlik ta nimanik «maʼ reʼ ta chik runimjiik i korik laj Dios inki aʼn. Reʼ laʼ chik i maʼ korik taj inkinimaj» (Romanos 1:25). Jeʼ rukabʼ noq maʼ inkikʼuhtaaj ta i rubʼihnaal i Dios keh i kʼachareel. Eh reʼ Santo Laj Huuj iruqʼor chi naqaqʼorom (Romanos 10:13, 14). Juʼjun taqeh kʼamal bʼeeh pan nimanik inkiqʼor chi rumahk i Dios noq inkʼuljik jenoʼ tiʼ kʼaxik. Xa reʼ laʼ reʼ inkiqʼor chukuj qʼorik. Ruum chi reʼ taqeh tiʼ kʼaxik inkʼuljik maʼ reʼ ta rumahk i Dios (chawil Santiago 1:13). Intiʼbʼik qakʼux rilariik chi reʼ taqeh chukuj qʼorik wilih irubʼan chi reʼ taqeh kʼachareel maʼ inkijil ta kiibʼ ruukʼ i Dios.

2. ¿Nikʼwach i rubʼanooj i maʼ manlik ta nimanik?

Reʼ taqeh maʼ manlik ta nimanik maʼ inkikʼax ta taqeh kʼachareel jeʼ rukabʼ irubʼan i Jehová. Reʼ Santo Laj Huuj iruqʼor chi «reʼ taqe ru mahk xtahmik wach, jeʼ naa kopan taxaaj xponik» (Apocalipsis 18:5). Reʼ taqeh maʼ manlik ta nimanik kʼih haabʼ inkikʼam chi rutobʼjiik taqeh i wilik kajaawriik nah tinamit, inkiyeew woʼ i kitobʼal pan qʼaqʼinik eh inkikanaaʼ chi ne kikansjik kʼih chi kʼachareel. Juʼjun taqeh kʼamal bʼeeh pan taq nimanik wilik kibʼehomal ruum chi inkipahqaaj kitumiin keh i kiponik ar. Reʼ wilih irukʼuhtaaj chi maʼ kehtʼal ta wach i Dios. Jeʼ reʼ noq ¿nikʼwach ne inkiqʼor chi rajkamanoom i Dios taqeh? (Chawil 1 Juan 4:8).

3. ¿Chajariik irikʼraaj i Dios chi riij taqeh maʼ manlik ta nimanik noq inkibʼan i maʼ holohik ta?

Mi reʼ hat maʼ nakʼax ta wach inkibʼan i maʼ manlik ta nimanik, ¡chakapaaj nikʼwach irikʼraaj riibʼ i Jehová! Reʼ reh iraaj kiwach taqeh kʼachareel, xa reʼ laʼ inchalik rujosqʼiil kuukʼ taqeh i kikʼamwik bʼeeh pan taq nimanik ruum chi inkichuk qʼorik chi riij i Dios eh maʼ inkikʼax ta taqeh kʼachareel reʼ inkaaj kinabʼeem chi riij i Dios. Reʼ Dios iruqʼor chi reʼ taqeh maʼ manlik ta nimanik narusachariik kiwach eh chi maʼ jaruuj chik naa rilariik wach (Apocalipsis 18:21). Maʼ najt ta chik iraaj chi reʼ Dios narusacham wach taqeh maʼ manlik ta nimanik (Apocalipsis 18:8).

 CHATZʼIR RIIJ I KʼAHCHIʼ ATIJEM

4. Reʼ Dios maʼ imponik ta chuwach chuʼnchel taqeh nimanik

Kʼih taqeh kʼachareel inkikapaaj chi atoobʼ ta kʼih taqeh nimanik xa jenaj woʼ i Dios inkiloqʼej wach. ¿Xa reʼ laʼ korik na inkiqʼor? Chawil taq Mateo 7:​13, 14 eh tiqʼoroq taq chi riij:

• Jeʼ rukabʼ iruqʼor i Santo Laj Huuj, ¿ahaʼ wilik i bʼeeh iruyeew kʼacharik?

Chawil taq i VIDEO eh tiqʼoroq taq chi riij:

• ¿Irukʼuhtaaj na i Santo Laj Huuj chi reʼ Dios, imponik chuwach chuʼnchel taqeh iglesia?

 6. Reʼ Dios iraaj rukoʼleem taqeh kʼachareel pan kiqʼabʼ i maʼ manlik ta nimanik

Chawil taq Apocalipsis 18:4 a eh tiqʼoroq taq chi riij:

• Reʼ Dios iraaj rutobʼeem taqeh kʼachareel reʼ xijotʼarik ruum taqeh i maʼ manlik ta nimanik. ¿Chajariik inaqʼor i hat chi riij i wilih?

7. Maʼ akanaaʼ i tijinik chi riij i manlik Dios

¿Ne na inakanaaʼ i tijinik chi riij i manlik Dios ruum i maʼ holohik ta kibʼanooj taqeh i maʼ manlik ta nimanik? Chakapaaj chi riij jenaj kʼijool maʼ irunimaj ta inqʼorarik reh ruum i rajaaw, inelik reje pan rupaat eh inooj rubʼan i maʼ holohik ta. Reʼ ajabʼees maʼ imponik ta chuwach irubʼan i rakʼuun. ¿Rumahk na i ajabʼees chi reʼ rakʼuun irubʼan i maʼ holohik ta pan rukʼachariik?

• ¿Ne na inakanaaʼ i tijinik chi riij i Jehová ruum i kibʼanooj taqeh i maʼ manlik ta nimanik?

 KʼOLOQ PAN AKʼUX

Reʼ taqeh maʼ manlik ta nimanik inkichuk qʼorik chi riij i rubʼihnaal i Dios ruukʼ i inkikʼuhtaaj chi riij eh ruukʼ taqeh kansanik kibʼanam. Maʼ najt ta chik iraaj chi reʼ Dios narusacham kiwach.

Reʼ xkahnik pan akʼux

• ¿Chajariik inaqʼor i hat chi riij inkikʼuhtaaj eh inkibʼan taqeh maʼ holohik ta nimanik?

• ¿Chajariik irikʼraaj i Jehová chi riij taqeh maʼ manlik ta nimanik?

• ¿Chajariik iruqʼor i Dios chi narubʼanam keh taqeh maʼ manlik ta nimanik?