Jeʼ rukabʼ xqatijej chik, maʼ chuʼnchel ta taqeh nimanik inkibʼan reʼ imponik chuwach i Dios. Xa reʼ laʼ, ne rubʼan chi ne inqayeew ruloqʼil i xtzʼuhkrisanik qeh eh ne inqasuqbʼisaj rukʼux. ¿Nikʼwach i loqʼinik imponik chuwach i Dios? (Santiago 1:​27). Qil chajariik irukʼuhtaaj i Santo Laj Huuj.

1. ¿Ajwach ne inqʼorik qeh nikʼwach ruloqʼjiik i Dios naqabʼanam?

Reʼ Santo Laj Huuj iruqʼor qeh nikʼwach ruloqʼjiik i Dios naqabʼanam. Reʼ Jesús jeʼ wilih xuqʼor reh i Dios: «Reʼ aqʼoral korik» (Juan 17:17). Juʼjun taqeh nimanik maʼ inkikoj ta pan ruman i ruqʼorbʼal i Dios, reʼ Santo Laj Huuj, reʼ laʼ chik i kinaʼojbʼal inkaaj kikʼuhtaam. Xa reʼ laʼ reʼ Jehová maʼ imponik ta chuwach noq maʼ inkikoj ta pan ruman taqeh rukʼuhbʼaal (chawil Marcos 7:9). Xa reʼ laʼ reʼ hoj inqasuqbʼisaj rukʼux noq inqakoj pan ruman chajariik iruqʼor qeh pan Santo Laj Huuj eh chi inqanimaj taqeh runaʼojbʼal.

2. ¿Nikʼwach i loqʼinik naqayeʼem reh i Jehová?

Ruum chi reʼ Jehová xtzʼuhkrisanik qeh, irukʼul chi xa reʼ woʼ reh ne inqayeew ruloqʼil (Apocalipsis 4:​11). Reʼ wilih iraaj ruqʼorom chi naqakʼaxam eh xa reʼ woʼ reh naqayeʼem ruloqʼil. Maʼ na ta qayeʼem ruloqʼil jenoʼ kʼachareel, jenoʼ korsimaj tyoox, oon jenoʼ ehtalil (chawil Isaías 42:8).

Reʼ loqʼinik naqayeʼem reh «santohimaj jeʼ rukabʼ imponik chuwach i Dios» (Romanos 12:1). Reʼ wilih iraaj ruqʼorom chi saq wach i qakʼachariik. Jeʼ rukabʼ i kikʼaxwik reh i Jehová inkiyeew ruloqʼil eh inkinimaj taqeh rukʼuhbʼaal chi riij i kaxarohiil. Eh maʼ inkichʼuwaʼrisaj ta woʼ wach i kikʼachariik ruukʼ taqeh droga, siikʼ eh bʼanaj haʼ. a

3. ¿Chaaj woʼ reet iraaj i Jehová chi ne inqaloqʼej wach chi kixilak i kinimanik reh?

Reʼ taqeh qamoloj iibʼ rajlaal xamaano irubʼan chi ne inqaloqʼej wach i Jehová pan molaabʼ (Salmo 111:​1, 2). Jenaj ruwiiʼ reh ruloqʼjiik i Dios jeʼ rukabʼ noq inqatzʼuyej wach (chawil Salmo 104:33). Mi reʼ Jehová iruqʼor qeh chi ne inqamol qiibʼ ruum chi iraaj qawach eh rehtʼal chi reʼ taqeh moloj iibʼ reʼreʼ irubʼan chi ne inqasuqkileej i qakʼachariik yuʼnaak eh chi juneliik. Noq inqamol qiibʼ inqayeew rukowiil qakʼux chi qawach.

 CHATZʼIR RIIJ I KʼAHCHIʼ ATIJEM

4. Maʼ atoobʼ ta chi ne inqakoj taqeh korsimaj tyoox oon ehtalil reh ruloqʼjiik i Dios

5. Mi xa reʼ woʼ Jehová inqayeew ruloqʼil, ne inqakanaaʼ taqeh chukuj qʼorik kikʼuhtaam qeh

 6. Inqayeew ruloqʼil i Dios chupaam taqeh moloj iibʼ

Noq qojtzʼuyinik eh inqayeew juʼjun qaqʼorbʼal chupaam taqeh moloj iibʼ, inqayeew ruloqʼil i Jehová eh inqayeew rukowiil qakʼux chi qawach. Chawil taq Salmo 22:22 eh tiqʼoroq taq chi riij:

• ¿Imponik na chawach taqeh qʼorik inkiyeew taqeh kiponik pan moloj iibʼ?

• ¿Raaj i hat, inawaaj na ayeʼem jenoʼ aqʼorbʼal pan moloj iibʼ?

7. Reʼ Jehová imponik chuwach chi reʼ hoj inqaqʼor keh i tokoom i kʼahchi qatijem

Wilik kʼih ruwiiʼ nikʼwach ne inqaqʼor keh i tokoom i kʼahchiʼ qatijem pan Santo Laj Huuj. Chawil taq Salmo 9:1 eh 34:1, eh tiqʼoroq taq chi riij:

• ¿Chajariik inawaaj aqʼorom keh i tokoom chi riij i atijem pan Santo Laj Huuj?

 KʼOLOQ PAN AKʼUX

Inqasuqbʼisaj rukʼux i xtzʼuhkrisanik qeh noq xa reʼ woʼ reh inqayeew ruloqʼil, jeʼ rukabʼ noq inqatzʼuyej wach chupaam taqeh moloj iibʼ eh noq inqaqʼor keh taqeh kʼachareel i kʼahchiʼ qatijem.

Reʼ xkahnik pan akʼux

• ¿Ajwach ne inqʼorik qeh nikʼwach ruloqʼjiik i Dios naqabʼanam?

• ¿Chaaj woʼ reet xa reʼ woʼ i Jehová naqayeʼem ruloqʼil?

• ¿Chaaj woʼ reet iraaj i Dios chi ne inqaloqʼej wach chi kixilak i kinimanik reh?