LECCIÓN 15
¿Ajwach i Jesús irukʼuhtaaj i Santo Laj Huuj?
Reʼ Jesús ehtʼalimaj wach chi junsut i akʼal. Xa reʼ laʼ atoobʼ ta kehtʼal i rubʼihnaal maʼ kehtʼal ta wach chi korik, eh kʼih taqeh kʼachareel maʼ jenaj ta wach inkikapaaj chi riij haj woʼ wach i Jesús. ¿Chajariik irukʼuhtaaj i Santo Laj Huuj chi riij i Jesús?
1. ¿Ajwach i Jesús irukʼuhtaaj i Santo Laj Huuj?
Reʼ Jesús jenaj uxlabʼal wilik rajaawriik ar pan taxaaj. Reʼ Jehová peet xutzʼuhkrisaj i Jesús noq ko majaaʼ wilik i taxaaj akʼal. Ruum aj reʼ inqʼorarik chi reʼ i Jesucristo i peet reh chuʼnchel i tzʼuhkrisamaj (Colosenses 1:15). Reʼ Santo Laj Huuj iruqʼor chi reʼ Jesús xa jenaj chi ribʼil riibʼ chuwach i Dios ruum chi maʼ ajwach ta xtobʼinik reh i Jehová noq xutzʼuhkrisaj i Jesús (Juan 3:16). Reʼ Jesús xkamanik chi rucheel i rajaaw, Jehová, xutobʼeej reh rutzʼuhkrisjiik chuʼnchel i wilik (chawil Proverbios 8:30). Eh reʼ keh xti inkaaj kiibʼ. Reʼ Jesús reʼ reh i «Atoobʼlaj Qʼorik», iraaj ruqʼorom chi reʼ Jesús injalwik reh i runaʼojbʼal eh i ruqʼorbʼal i rajaaw (Juan 1:14).
2. ¿Chaaj woʼ reet xkʼulik wihʼoq wach akʼal i Jesús?
Ikʼinaq chik kiʼibʼ mil haabʼ, noq reʼ Jehová xukoj i rusanto laj uxlabʼal reh chi reʼ Jesús jenaj ángel wilik rajaawriik xkʼul asjoq wach akʼal chi jeʼ rukabʼ kʼachareel, ruukʼ jenaj qʼahxoq María i rubʼihnaal reʼ xkahnik wach kʼacharik noq ko majaaʼ naq inyohkik ruukʼ jenoʼ winaq. Reʼ wilih jenaj sachbʼal kʼuxliis (chawil Lucas 1:34, 35). Reʼ reh xchalik wach akʼal reh chi ne imponik chi Cristo, oon reʼ Sikʼooj wach qʼorooj cho rubʼiral, eh reh rukoʼljiik chuʼnchel taqeh kʼachareel. a Chuʼnchel i qʼorooj cho rubʼiral chi riij i Sikʼooj wach xooj eloq wach ruukʼ i Jesús. Ruum aj reʼ, reʼ taqeh kʼachareel xkinabʼeej wach eh xkiqʼor chi reʼ reh «i Cristo, i Rakʼuun i kʼachlik Dios» (Mateo 16:16).
3. ¿Yuʼnaak ahaʼ oon haj inpatinik i Jesús?
Noq xkimik reʼ Jesús xyeʼarik woʼ chik rukʼachariik pan uxlabʼal eh xooj woʼ chik ar pan taxaaj. Eh noq ar chik wilik «xiikʼ naah nimaal wach i ruloqʼil xyeʼarik ruum i Dios» (Filipenses 2:9). Yuʼnaak reʼ Jesús wilik rajaawriik ar pan taxaaj, xa reʼ laʼ, xa reʼ woʼ i Jehová xti nim rajaawriik chuwach i Jesús.
CHATZʼIR RIIJ I KʼAHCHIʼ ATIJEM
Qatijej kʼisinoq chik chi riij ajwach i Jesús eh chaaj woʼ reet ko ruman runabʼjiik wach.
4. Reʼ Dios xti nim rajaawriik chuwach i Jesús
Atoobʼ ta reʼ Jesús jenaj uxlabʼal wilik rajaawriik ar pan taxaaj, reʼ Santo Laj Huuj iruqʼor chi irunimaj i Jehová, reʼ rajaaw eh ruDios. ¿Chaaj woʼ reet inqaqʼor chi reʼ Jesús irunimaj naq i rajaaw? Chawil taq i VIDEO reh chi ne taq inareq chi riij irukʼuhtaaj i Santo Laj Huuj chi riij i rajaawriik i Dios chi naah i Jesús.
Reʼ taqeh texto wilkeebʼ pan qajik irukʼuhtaaj qeh chi reʼ Jehová eh reʼ Jesús kiʼibʼ taqeh chi kʼachareel maʼ jenaj ta kiwach. Chawil taq i juʼjun chi texto eh tiqʼoroq taq chi riij:
Chawil taq i Lucas 1:30-32.
-
Jeʼ rukabʼ xuqʼor i ángel reh i María, ¿nikʼwach naq nakiqʼorom reh i Jesús?
Chawil taq Mateo 3:16, 17.
-
¿Chajariik xuqʼor i qʼorik xbʼaan cho pan taxaaj noq xqajik ruhaaʼ i Jesús?
-
¿Ajwach xqʼorik cho pan taxaaj noq inaqʼor i hat?
Chawil taq Juan 14:28.
-
¿Ajwach i asbʼees eh i wilik rajaawriik noq inaqʼor i hat: reʼ ajabʼees oon reʼ akʼunbʼees?
-
¿Chaaj woʼ reet i Jesús xuqʼor reh «Wajaaw» i Jehová?
Chawil taq Juan 12:49.
-
¿Ajwach eh taqeh qʼorik xuqʼor i Jesús? ¿Inaqʼor na chi reʼ Jesús jenaj wach ruukʼ i rajaaw?
5. Reʼ Jesús reʼ poʼ inchel i Sikʼooj wach
Pan Santo Laj Huuj kʼih i qʼorooj cho rubʼiral reh chi reʼ taqeh kʼachareel ne naq inkinabʼeej ajwach i Sikʼooj wach, reʼ xusikʼ wach i Dios reh rukoʼljiik chuʼnchel taqeh kʼachareel. Chawil taq i VIDEO, ahaʼ wiiʼ ne nawil juʼjun taqeh qʼorooj cho rubʼiral xooj eloq wach ruukʼ i Jesús noq xwihʼik wach akʼal.
Chawil taq i qʼorooj cho rubʼiral wilih pan Santo Laj Huuj eh tiqʼoroq taq chi riij:
Chawil taq Miqueas 5:2 reh runabʼjiik ahaʼ naq narasjiik i Sikʼooj wach. b
-
¿Xooj na eloq wach i qʼorooj cho rubʼiral wilih noq asjik i Jesús? (Mateo 2:1).
Chawil taq i Salmo 34:20 eh i Zacarías 12:10 reh rilariik juʼjun taqeh qʼorooj cho rubʼiral chi riij i rukimiik i Sikʼooj wach.
-
¿Xooj na eloq wach taqeh qʼorooj cho rubʼiral wilih? (Juan 19:33-37).
-
¿Inaqʼor na chi reʼ Jesús xubʼan, chi reʼ qʼorooj cho rubʼiral chi riij xooj eloq wach ruukʼ?
-
Ruukʼ chuʼnchel i wilih, ¿chajariik irukʼuhtaaj aweh chi riij i Jesús?
6. Reʼ runabʼjiik wach i Jesús qojrutobʼeej
Reʼ Santo Laj Huuj iruqʼor chi ko ruman runabʼjiik ajwach i Jesús eh chi riij i rukamaj xyeʼarik reh ruum i Dios. Chawil taq i Juan 14:6 eh 17:3, eh tiqʼoroq taq chi riij:
-
¿Chaaj woʼ reet xti ko ruman chi ne inqanabʼeej ajwach i Jesús?
Reʼ Jesús wilik xubʼan reh chi ne inqabʼan chi hoj ramigo i Dios eh xukʼuhtaaj i korik chi riij i Jehová. Eh ruum i reh ne woʼ irubʼan chi ne inwihʼik qakʼachariik chi juneliik.
REʼ INKIQʼOR I JUʼJUN: «Reʼ taqeh testigo reh Jehová maʼ inkikoj ta kikʼux ruukʼ i Jesucristo».
-
¿Chajariik naq ne inaqʼor i hat?
KʼOLOQ PAN AKʼUX
Reʼ Jesús jenaj uxlabʼal wilik rajaawriik, rakʼuun i Dios eh reʼ woʼ reh i Sikʼooj wach.
Reʼ xkahnik pan akʼux
-
¿Chaaj woʼ reet inqʼorarik chi reʼ Jesús i peet reh chuʼnchel i tzʼuhkrisamaj?
-
¿Chajariik naq irubʼan i Jesús noq ko majaaʼ naq inchalik ayuʼ wach akʼal?
-
¿Chaaj woʼ reet qehtʼal chi reʼ Jesús i Sikʼooj wach?
CHAREQ RUMAN
Chanabʼeej juʼjun ruwiiʼ reʼ irukʼuhtaaj chi reʼ Jesús reʼ i Sikʼooj wach.
Chawil mi reʼ Santo Laj Huuj irukʼuhtaaj chi reʼ Dios xponik chi rajaaw i Jesús jeʼ rukabʼ kikʼunanik taqeh kʼachareel.
«¿Chaaj woʼ reet inqʼorarik chi reʼ Jesús rakʼuun i Dios?» (Naʼojbʼal reh jw.org)
Chanabʼeej chi reʼ Santo Laj Huuj iruqʼor chi xa jenaj i Dios, maʼ ixibʼ ta ruwiiʼ.
«Reʼ Jesús: ¿jenaj na wach ruukʼ i Dios?» (La Atalaya, 1 reh abril reh 2009)
Chawil nikʼwach jenaj ixoq xujal i rukʼachariik noq xunabʼeej pan Santo Laj Huuj ajwach i Jesús.
a Pan lección 26 eh 27 iruqʼor chaaj woʼ reet ko ruman naq chi ne kikoʼljik taqeh kʼachareel eh nikʼwach qojrukoʼleej i Jesús.
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
