LECCIÓN 17
¿Nikʼwach i runaʼojbʼal i Jesús irukʼuhtaaj i Santo Laj Huuj?
Noq inqatijej chi riij i xubʼan eh i xuqʼor i Jesús noq xwihʼik ayuʼ wach akʼal eh noq inqatijej taqeh i ruholohik naʼojbʼal inqaaj qajilim qiibʼ ruukʼ eh ruukʼ i rajaaw, Jehová. ¿Ahaʼ wilik reh taqeh ruholohik naʼojbʼal i Jesús imponik chawach? ¿Eh chajariik naqabʼanam reh chi ne inqatijej qeh ruukʼ i Jesús?
1. ¿Nikʼwach irukʼuhtaaj i Jesús i runaʼojbʼal i rajaaw?
Reʼ Jesús kʼih haabʼ wihʼinaq pan taxaaj eh rilom nikʼwach inkamanik i rajaaw eh irutijej naq reh. Ruum aj reʼ, chuʼnchel taqeh irukapaaj i Jesús reʼ irikʼraaj eh taqeh rubʼanooj irukʼuhtaaj nikʼwach i rajaaw (chawil Juan 5:19). Jeʼ reʼ noq, reʼ Jesús irukʼuhtaaj chi korik i runaʼojbʼal i rajaaw eh ruum aj reʼ xuqʼor: «Awach inilwik nuwach i hin, i rilow woʼ wach i waJaaw» (Juan 14:9). Jeʼ reʼ noq, mi xanabʼeej chi korik ajwach i Jesús ne inanabʼeej chi korik ajwach i Jehová. Reʼ keteliniik wachiis xukʼuhtaaj i Jesús chi kiij taqeh kʼachareel xukʼuhtaaj reʼ irikʼraaj i Jehová chawiij i hat.
2. ¿Chajariik xubʼan i Jesús reh rukʼuhtjiik chi irukʼax i rajaaw?
Reʼ Jesús xuqʼor: «Reh chi chuʼnchel i tinamit naakehtʼaliim chi korik chi nukʼax i waJaaw, eh chi xa reʼ woʼ nubʼan i ruqʼor cho weh i reh» (Juan 14:31). Noq xwihʼik wach akʼal, reʼ Jesús xukʼuhtaaj i rukʼaxooj chi riij i rajaaw noq xunimaj atoobʼ ta xikʼik pan kʼaxkilal. Eh reʼ Jesús imponik naq chuwach qʼorik chi riij i rajaaw eh irutobʼeej woʼ naq taqeh kʼachareel reh chi ne kiponik chi ramigo i Dios (Juan 14:23).
3. ¿Nikʼwach xukʼuhtaaj i Jesús chi irukʼax taqeh kʼachareel?
Pan Santo Laj Huuj jeʼ wilih xuqʼor i Jesús «xasuq chik nukʼux kuukʼ i tinamit» (Proverbios 8:31). Xukʼuhtaaj chi iraaj kiwach taqeh kʼachareel noq xukowej kikʼux eh xutobʼeej taqeh chi maʼxta iruyʼeej chi jilow. Ruukʼ taqeh sachbʼal kʼuxliis xubʼan xukʼuhtaaj i rajaawriik eh chi iruketelaaj kiwach taqeh kʼachareel (Marcos 1:40-42). Qʼeʼ naq chaqʼlaam eh maʼ tokoom ta naq rilariik irubʼan taqeh kʼachareel. Reʼ naq taqeh iruqʼor iruyeew naq rukowiil kikʼux eh kuyʼinik taqeh kʼachareel kibʼirinik reh. Eh xuyeew woʼ riibʼ chi kimik ruum i rukʼaxooj chi kiij taqeh kʼachareel, xa reʼ laʼ qʼeʼ tiʼ irikʼraaj taqeh kinimanik reh i rukʼuhbʼaal (chawil Juan 15:13, 14).
CHATZʼIR RIIJ I KʼAHCHIʼ ATIJEM
Qanabʼeej chi riij i runaʼojbʼal i Jesús eh qil nikʼwach ne inqatijej i rukʼaxooj eh i yeʼooj xubʼan.
4. Reʼ Jesús iraaj wach i rajaaw
Ruukʼ i rukʼachariik i Jesús xukʼuhtaaj qeh nikʼwach ne inqakʼuhtaaj i qakʼaxooj chi riij i Dios. Chawil taq Lucas 6:12 eh jeʼ woʼ i Juan 15:10 eh 17:26. Noq awilom taq chik wach i texto, tiqʼoroq taq chi riij:
-
Noq inqil i rukʼachariik i Jesús, ¿nikʼwach ne inqakʼuhtaaj i qakʼaxooj chi riij i Jehová?
Reʼ Jesús iraaj naq wach i rajaaw wilik cho pan taxaaj eh juneliik irubʼan naq rutiij ruukʼ.
5. Reʼ Jesús irutobʼeej naq taqeh i aajwaal wach chi keh
Reʼ Jesús irukoj naq chi peet taqeh kʼachareel eh jeʼ woʼ i aajwaal wach chi keh. Atoobʼ ta qʼuhteel irutobʼeej naq taqeh i kʼachareel. Chawil taq Marcos 6:30-44 eh tiqʼoroq taq chi riij:
-
Jeʼ rukabʼ xawil chupaam taqeh versículo, ¿nikʼwach xukʼuhtaaj i Jesús chi iraaj kiwach taqeh kʼachareel? (Chawil taqeh versículo 31, 34, 41 eh 42).
-
¿Chaaj woʼ reet i Jesús xutobʼeej taqeh kʼachareel? (Chawil taq i versículo 34).
-
Ruum chi reʼ Jesús irukʼuhtaaj i runaʼojbʼal i rajaaw, ¿chajariik irukʼuhtaaj aweh chi riij i Jehová?
-
¿Nikʼwach ne inqakʼax taqeh tokoom jeʼ rukabʼ xubʼan i Jesús?
6. Reʼ Jesús suq reh i yeʼooj
Reʼ Jesús atoobʼ ta nebʼaaʼ irukʼax naq wach i yeʼooj, reʼreʼ irukʼuhtaaj qeh chi reʼ hoj ne inqatijej qeh i yeʼooj. Chawil taq i Hechos 20:35 eh tiqʼoroq taq chi riij:
-
Jeʼ rukabʼ xuqʼor i Jesús, ¿chajariik ne iruyeew rusuqkiil qakʼux?
Chawil taq i VIDEO eh tiqʼoroq taq chi riij:
-
¿Nikʼwach ne inqabʼan i yeʼooj atoobʼ ta maʼxta qatumiin?
¿Mi awehtʼal naq?
Reʼ Santo Laj Huuj irukʼuhtaaj chi naqabʼanam qatiij ruukʼ i Jehová eh naqakohlaam pan rubʼihnaal i Jesús (chawil taq Juan 16:23, 24). Jeʼ reʼ ne inqakʼuhtaaj chi looqʼ chi qeh reʼ xubʼan i Jesús reh ponik chi hoj ramigo i Jehová.
REʼ INKIQʼOR I JUʼJUN: «Reʼ Dios maʼxta iraaj reh, chi reʼ taqeh kʼachareel ne kiʼikʼik pan kʼaxkilal».
-
Ruum chi reʼ Jesús irukʼuhtaaj i runaʼojbʼal i rajaaw, ¿nikʼwach xukʼuhtaaj i Jesús chi reʼ Jehová iraaj qawach?
KʼOLOQ PAN AKʼUX
Reʼ Jesús iraaj wach i Jehová eh iraaj woʼ kiwach taqeh kʼachareel. Wilaʼ reʼ hoj inqatijej chi riij i Jesús ne inqanabʼeej wach i Jehová, ruum chi reʼ Jesús irukʼuhtaaj i runaʼojbʼal i rajaaw.
Reʼ xkahnik pan akʼux
-
Jeʼ rukabʼ xqatijej chi riij i rukʼachariik i Jesús, ¿nikʼwach ne inqakʼuhtaaj reh i Jehová chi inqaaj wach?
-
Jeʼ rukabʼ xqatijej chi riij i rukʼachariik i Jesús, ¿nikʼwach ne inqakʼuhtaaj keh i kʼachareel chi inqaaj kiwach?
-
¿Ahaʼ wilik reh i runaʼojbʼal i Jesús xponik chawach?
CHAREQ RUMAN
Chawil eh chatijej juʼjun taqeh naʼojbʼal wilik reh i Jesús.
«Qatijej qeh taqeh naʼojbʼal wilik reh i Jesús» (Jesús: el camino, la verdad y la vida, página 317)
Chanabʼeej chaaj woʼ reet xti ko ruman i rubʼihnaal i Jesús pan tiij.
«¿Chaaj woʼ reet naqakohlaam i qatiij pan rubʼihnaal i Jesús?» (La Atalaya, 1 reh febrero reh 2008)
¿Iruqʼor na i Santo Laj Huuj nikʼwach inkaʼyik i Jesús?
«¿Nikʼwach i ruwiiʼ eh i rukaʼyiik i Jesús?» (Naʼojbʼal reh jw.org)
Reʼ Jesús xuyeew kiloqʼil taqeh ixoq.
«Reʼ Dios iruyeew kiloqʼil taqeh ixoq» (La Atalaya, 1 reh septiembre reh 2012)
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
