Reʼ Jehová imponik chuwach chi chuʼnchel tuslik wach (1 Corintios 14:33). Ruum aj reʼ, reʼ rutinamiit tuslik wach i kamanik irubʼan. ¿Nikʼwach tusimaj wach i rukamaj i molaabʼ wilih? ¿Chajariik naqabʼanam reh chi ne inelik korik chuʼnchel?

1. ¿Ajwach wilik rajaawriik chi naah i molaabʼ?

Reʼ «i Jesucristo reʼ reh kʼamal kibʼeeh aj nimaneel» (Efesios 5:23). Reʼ Jesús iril cho pan taxaaj i kamanik irubʼan i rutinamiit i Jehová chi junsut i akʼal. Xukanaaʼ jenaj «móso korik wach rukʼux, wilik runaʼojbʼal»: reʼ wilih jenaj tzuhbʼ chi kʼamal bʼeeh ehtʼalimaj kiwach chi Reʼ kikʼamwik bʼeeh pan rutinamiit i Jehová (chawil Mateo 24:45-47). Jeʼ rukabʼ naq inkibʼan taqeh apóstol eh taqeh kʼamal bʼeeh ar Jerusalén pan peet siglo, reʼ kikʼamwik bʼeeh pan rutinamiit i Jehová inkil i kikamaj taqeh molaabʼ chi junsut i akʼal (Hechos 15:2). Xa reʼ laʼ, reʼ taqeh winaq wilih maʼ reʼ ta kiʼehchanik reh i rutinamiit i Jehová. Inkisikʼ laʼ i rutobʼaal i Jehová pan Santo Laj Huuj eh inkikoj kiibʼ chi riʼsil i rajaawriik i Jesús.

2. ¿Chajariik chi kamanik inkibʼan taqeh ajkʼamal bʼeeh reh i molaabʼ?

Reʼ taqeh ajkʼamal bʼeeh reh i molaabʼ wilik kinaʼojbʼal pan uxlabʼal, inkibʼan i kʼuhtanik ruukʼ i Santo Laj Huuj, inkitobʼeej eh inkiyeew rukowiil kikʼux taqeh hermano wilkeebʼ pan molaabʼ. Reʼ keh maʼ kitojarik ta ruum i kikamaj. Xa chi sih inkibʼan. Ruukʼ laʼ chuʼnchel kikʼux inkibʼan jeʼ rukabʼ iraaj i Dios maʼ xa minooj ta taqeh chupaam, maʼ ruum ta tumiin eh maʼ inkikʼay ta wach i rukamaj i Dios (1 Pedro 5:1, 2). Reʼ taqeh ajkʼamal bʼeeh wilik ajtoʼool keh, reʼ taqeh ajtoʼool wilih chi qʼun qʼun ne inwihʼik keh i naʼojbʼal reʼ ko ruman reh chi ne kiponik chi ajkʼamal bʼeeh.

Reʼ kikʼamwik bʼeeh pan rutinamiit i Jehová inkichih juʼjun taqeh ajkʼamal bʼeeh reh chi ne kiponik chi ulaʼineel rajlaal i waqiibʼ poh. Reʼ taqeh hermano wilih inkulaʼineej taqeh molaabʼ reh ruyeʼariik rukowiil kikʼux eh kinaʼojbʼal. Eh inkichih woʼ hoq ajwach nakikojom chi ajkʼamal bʼeeh eh ajtoʼool reʼ wilik keh i naʼojbʼal reʼ irupahqaaj i Santo Laj Huuj (1 Timoteo 3:1-10, 12; Tito 1:5-9).

3. ¿Chajariik inkibʼan chi kijuʼjunaal taqeh Testigo?

Chi kunchelaal pan molabʼ inkiyeew ruloqʼil «i rubʼihnaal i QaJaaw Dios [Jehová]» noq inkiyeew i kiqʼorbʼal pan moloj iibʼ. Jeʼ woʼ noq kiʼooj chi qʼoroj kʼuhbʼaal eh chi kijuʼjunaal inkibʼan reʼ wilik pan kiqʼabʼ rubʼanariik (chawil Salmo 148:12, 13).

 CHATZʼIR RIIJ I KʼAHCHIʼ ATIJEM

4. Reʼ Jesús jenaj kʼamal bʼeeh iruhiʼlisaj i qanima

Reʼ Jesús jeʼ wilih iruqʼor qeh. Chawil taq Mateo 11:28-30 eh tiqʼoroq taq chi riij:

• ¿Nikʼwach i Jesús chi ajkʼamal bʼeeh? ¿Eh chajariik iraaj chi ne inqikʼraaj?

5. Reʼ taqeh ajkʼamal bʼeeh inkikʼuhtaaj chi holohik i kinaʼojbʼal ruukʼ i kibʼanooj

1. Reʼ taqeh ajkʼamal bʼeeh inkikowej i kamigohiil ruukʼ i Jehová eh inkitobʼeej woʼ i kifamilia reh chi kow i kamigohiil ruukʼ i Jehová.

2. Reʼ taqeh ajkʼamal bʼeeh inkikapaaj taqeh kihermano reʼ wilkeebʼ pan molaabʼ.

3.   Reʼ taqeh ajkʼamal bʼeeh rajlaal inkiqʼor i kʼuhbʼaal.

4. Reʼ taqeh ajkʼamal bʼeeh ajkʼuhtaneel taqeh. Inkibʼan i mees eh tokoom chik kamanik pan yeʼaabʼ reh moloj iibʼ.

6. Inqatobʼeej taqeh i ajkʼamal bʼeeh

Reʼ Santo Laj Huuj iruqʼor qeh chi ko ruman kitobʼjik taqeh ajkʼamal bʼeeh. Chawil taq Hebreos 13:17 eh tiqʼoroq taq chi riij:

• ¿Chaaj woʼ reet i Santo Laj Huuj iruqʼor qeh chi naqaniman taqeh i kikʼamwik qabʼeeh eh naqabʼanam inkiqʼor qeh? ¿Inaqʼor na i hat chi holohik irupahqaaj qeh i Santo Laj Huuj? ¿Chaaj woʼ reet?

Chawil taq Lucas 16:10 eh tiqʼoroq taq chi riij:

• ¿Chaaj woʼ reet ko ruman chi ne inqatobʼeej taqeh ajkʼamal bʼeeh atoobʼ ta maʼ nim ta wach i kamanik?

 KʼOLOQ PAN AKʼUX

Reʼ Jesús wilik rajaawriik chi naah i molaabʼ. Reʼ taqeh ajkʼamal bʼeeh wilkeebʼ riʼsil rajaawriik i Jesús eh reʼ hoj inqatobʼeej taqeh ruukʼ chuʼnchel qakʼux, ruum chi qojkikʼax eh inkikʼuhtaaj qeh chi holohik i kinaʼojbʼal ruukʼ i kibʼanooj.

Reʼ xkahnik pan akʼux

• ¿Ajwach i wilik rajaawriik chi naah i molaabʼ?

• ¿Chajariik chi kamanik inkibʼan taqeh ajkʼamal bʼeeh reh i molaabʼ?

• ¿Chajariik inkibʼan chi kijuʼjunaal taqeh rajkamanoom i Jehová?