LECCIÓN 21
¿Nikʼwach kʼahchiʼ qaqʼorom i kʼuhbʼaal chi riij i runimaal rajaawriik i Dios
Maʼ najt ta chik iraaj chi reʼ Jehová narusacham wach i kʼaxkilal kiʼikʼik wiiʼ taqeh kʼachareel ruukʼ i runimaal rajaawriik. Ruum aj reʼ, inqaqʼor keh i kʼachareel i holohik kʼuhbʼaal chi riij. Reʼ Jesús iraaj naq chi reʼ taqeh rajtahqaneel ne inkiqʼor i kʼuhbʼaal chi jun suut i akʼal (Mateo 28:19, 20). ¿Nikʼwach kʼahchiʼ kikʼamam naah i xuqʼor i Jesús taqeh testigo reh Jehová reh ruqʼorariik i kʼuhbʼaal?
1. ¿Nikʼwach kʼahchiʼ rojiik eloq wach i Mateo 24:14 pan qaqʼijil?
Reʼ Jesús xuqʼor cho rubʼiral chi: «Reʼ akʼ kʼuhbʼaal wili chi riij i runimaal rajaawriik i Dios naa ruqʼorariik chi junsuut i wach akʼal» (Mateo 24:14). Reʼ taqeh testigo reh Jehová imponik chi qawach rubʼanariik i kamanik wilih. Inqaqʼor i kʼuhbʼaal chi jun suut i akʼal eh pan jenaj mil chi qʼorbʼal. Reh rubʼanariik i kamanik wilih ko ruman chi ne inqachop qakʼux eh chi tuslik wach ne inqabʼan. Maʼ ne ta naq inqabʼan i kamanik wilih mi maʼ qojrutobʼeej i Jehová.
2. ¿Chajariik inqabʼan reh ruqʼorariik i kʼuhbʼaal keh i kʼachareel?
Inqaqʼor i kʼuhbʼaal xa ahaʼ paʼ wilkeebʼ kʼachareel. Jeʼ rukabʼ naq inkibʼan taqeh ajnimaneel pan peet siglo, qojooj «chiʼ taq paat» (Hechos 5:42). Reʼ ojik chiʼ taq paat irubʼan chi ne inqaqʼor i kʼuhbʼaal chi tuslik wach keh taqeh kʼihaal chi kʼachareel rajlaal i haabʼ. Xa reʼ laʼ, wilik pech reʼ taqeh kʼachareel maʼ wilkeebʼ ta pan kipaat, ruum aj reʼ inqaqʼor i kʼuhbʼaal chupaam taqeh yeʼaabʼ ahaʼ wiiʼ wilkeebʼ kʼih taqeh kʼachareel. Juneliik inqasikʼ ruwiiʼ nikʼwach naqaqʼoriik kuukʼ taqeh kʼachareel chi riij i Jehová eh chi riij i narubʼanam.
3. ¿Ajwach ne rubʼan chi ne iruqʼor i kʼuhbʼaal chi riij i runimaal rajaawriik i Dios?
Chuʼnchel taqeh manlik ajnimaneel ko ruman chi ne inkiqʼor i kʼuhbʼaal chi riij i runimaal rajaawriik i Dios. Chi qeh i hoj reʼ wilih xti ko ruman. Inqabʼan chuʼnchel i wilik pan qaqʼabʼ reh ruqʼorariik i kʼuhbʼaal, ruum chi looqʼ chi qeh i kikʼachariik taqeh kʼachareel (chawil 1 Timoteo 4:16). Reʼ kamanik inqabʼan xa chi sih maj reʼ Santo Laj Huuj iruqʼor: «Xa chi siih taq xakʼul [...], xa chi siih woʼ chik taq naa ayeʼem» (Mateo 10:7, 8). Atoobʼ ta maʼ chuʼnchel ta taqeh i kʼachareel qojkibʼiraj reʼ hoj maʼ inqakanaaʼ ta ruqʼorariik i kʼuhbʼaal ruum chi jeʼ reʼ inqayeew ruloqʼil i Jehová eh inqasuqbʼisaj rukʼux.
CHATZʼIR RIIJ I KʼAHCHIʼ ATIJEM
Naqilom chuʼnchel i kamanik inkibʼan taqeh testigo reh Jehová reh ruqʼorariik i kʼuhbʼaal chi jun suut i akʼal eh nikʼwach qojrutobʼeej i Jehová.
Inqaqʼor i kʼuhbʼaal chi jun suut i akʼal: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Inqabʼan chuʼnchel i wilik pan qaqʼabʼ reh ruqʼorariik i kʼuhbʼaal keh chuʼnchel i kʼachareel
Reʼ taqeh testigo reh Jehová inqabʼan chuʼnchel i wilik pan qaqʼabʼ, reh ruqʼorariik i kʼuhbʼaal chi riij i runimaal rajaawriik i Dios keh chuʼnchel i kʼachareel xa ahaʼ paʼ wilkeebʼ. Chawil taq i VIDEO eh tiqʼoroq taq chi riij:
-
¿Chajariik xponik chawach chi riij nikʼwach i qʼoroj kʼuhbʼaal inqabʼan?
Chawil taq i Mateo 22:39 eh Romanos 10:13-15, eh tiqʼoroq taq chi riij:
-
¿Nikʼwach inqakʼuhtaaj chi inqaaj kiwach taqeh kʼachareel noq inqaqʼor keh i kʼuhbʼaal?
-
¿Chajariik iruqʼor i Jehová chi kiij taqeh inkiqʼor i kʼuhbʼaal chi riij i runimaal rajaawriik? (Chawil taq i versículo 15).
5. Qojtobʼinik pan rukamaj i Dios
Kʼih taqeh ehtalil wilik ahaʼ wiiʼ irukʼuhtaaj chi reʼ Jehová inkʼamwik naah i qʼoroj kʼuhbʼaal. Qil xkʼuljik ar Nueva Zelanda. Jenaj hermano rubʼihnaal Paul xooj qʼorol kʼuhbʼaal pan taq paat pan xqʼeq eh xureq jenaj tuut. Xa reʼ laʼ pan wahqʼeq reʼreʼ, reʼ tuut xubʼan rutiij ruukʼ i Dios Jehová eh xupahqaaj reh chi ne naq intobʼjik reh runabʼjiik wach. Reʼ Paul xuqʼor: «xa ixibʼ hora xikʼik wilkiin naq chik wach rupuerta».
Chawil taq i 1 Corintios 3:9 eh tiqʼoroq taq chi riij:
-
¿Nikʼwach irukʼuhtaaj i rehtalil i tuut chi reʼ Jehová inkʼamwik naah i qʼoroj kʼuhbʼaal?
Chawil taq i Hechos 1:8 eh tiqʼoroq taq chi riij:
-
¿Chaaj woʼ reet ko ruman chi ne qojrutobʼeej i Jehová reh chi ne inqaqʼor i kʼuhbʼaal?
¿Mi awehtʼal naq?
Pan moloj iibʼ xilak xamaano inkikʼuhtaaj qeh nikʼwach i qʼoroj kʼuhbʼaal naqabʼanam. Mi reʼ hat hat chik poninaq chupaam taqeh moloj iibʼ wilih, ¿chajariik inaqʼor chi riij i kʼuhtanik inkiyeew qeh?
6. Noq inqaqʼor i kʼuhbʼaal reʼ i Dios inqanimaj
Pan peet siglo, reʼ taqeh ixowaneel maʼ inkaaj ta naq chi reʼ taqeh rajtahqaneel i Jesús ne inkiqʼor i kʼuhbʼaal. Reʼ taqeh ajnimaneel wilih xkikoʼleej riij i akʼ kʼuhbʼaal (Filipenses 1:7). Pan qaqʼijil jeʼ woʼ reʼ inqabʼan i hoj testigo reh Jehová. a
Chawil taq i Hechos 5:27-42 eh tiqʼoroq taq chi riij:
-
¿Chaaj woʼ reet maʼ ne ta inqakanaaʼ i qʼoroj kʼuhbʼaal? (Chawil taq i versículo 29, 38 eh 39).
MAREH NE INKIQʼOR AWEH: «¿Chaaj woʼ reet taqeh testigo reh Jehová kiʼooj chiʼ taq paat?».
-
¿Chajariik naq ne naqʼor?
KʼOLOQ PAN AKʼUX
Reʼ Jesús xuqʼor keh taqeh rajtahqaneel chi ne inkiqʼor i kʼuhbʼaal chi riij i runimaal rajaawriik i Dios chi jun suut i akʼal. Reʼ Jehová kʼahchiʼ rutobʼeem i rutinamiit reh rubʼanariik i kamanik wilih.
Reʼ xkahnik pan akʼux
-
¿Chajariik kʼahchiʼ rubʼanariik reh ruqʼorariik i kʼuhbʼaal chi jun suut i akʼal?
-
¿Nikʼwach inqakʼuhtaaj i qakʼaxooj chi riij taqeh kʼachareel noq inqaqʼor i kʼuhbʼaal?
-
¿Inaqʼor na i hat chi reʼ qʼoroj kʼuhbʼaal irubʼan chi suq qakʼux? ¿Chaaj woʼ reet?
CHAREQ RUMAN
Chawil i qʼoroj kʼuhbʼaal inkibʼan taqeh testigo reh Jehová pan nimaq taq tinamit.
Ar París inkiqʼor i kʼuhbʼaal ruukʼ i exhibidor ahaʼ wiiʼ kiʼikʼik kʼih kʼachareel (5:11)
¿Nikʼwach inkiqʼor i kʼuhbʼaal taqeh testigo reh Jehová keh taqeh kʼachareel kikanaam cho i kitinamiit ruum taqeh kʼaxkilal?
Inqatobʼeej taqeh pan uxlabʼal i kikanaam cho i kitinamiit ruum i kʼaxkilal (5:59)
Chabʼiraj i naruqʼorom aweh jenaj ajqʼorol kʼuhbʼaal iqal iqal chi holohik i rukʼachariik.
Chanabʼeej nikʼwach xkoʼljik riij i qʼoroj kʼuhbʼaal reh chi maʼ ne ta inkikanaaʼ ruqʼorariik.
a Reʼ Dios iruqʼor qeh chi naqaqʼorom i kʼuhbʼaal. Ruum aj reʼ, reʼ taqeh testigo reh Jehová maʼ inqapahqaaj ta keh taqeh wilik kajaawriik chi ne inkiyeew qʼabʼ qeh reh ruqʼorariik i kʼuhbʼaal.
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
