Reʼ Jesús xukʼuhtaaj chi, mi reʼ hoj inqaaj chi hoj ajnimaneel ko ruman chi ne inqaqahsaj qahaaʼ (chawil Mateo 28:​19, 20). ¿Xa reʼ laʼ chajariik i qahsanik haʼ? ¿Eh chajariik narubʼanam jenoʼ kʼachareel reh chi ne inqajik ruhaaʼ?

1. ¿Nikʼwach i qahsanik haʼ irukʼuhtaaj i Santo Laj Huuj?

Reʼ qahsanik haʼ pan qʼorbʼal griego iraaj ruqʼorom «ruminjiik qohoq pan haʼ». Noq reʼ Jesús xqajik ruhaaʼ xminjik qohoq pan haʼ Jordán eh chi riij i reʼ «xelik cho panhaʼ» (Marcos 1:​9, 10). Noq reʼ taqeh manlik ajnimaneel inqajik kihaaʼ kiminarik qohoq chi junpaʼlik pan haʼ.

2. ¿Chajariik iraaj ruqʼorom noq jenoʼ kʼachareel iruqahsaj ruhaaʼ?

Noq jenoʼ kʼachareel iruqahsaj ruhaaʼ irukʼuhtaaj chi xuqʼahsaj i rukʼachariik reh i Jehová. ¿Eh chajariik naqabʼanam reh chi ne inqaqʼahsaj i qakʼachariik reh i Jehová? Noq jenoʼ kʼachareel ko majaaʼ inqajik ruhaaʼ naruqʼorom reh i Dios pan rutiij chi iraaj ruloqʼem wach chi juneliik. Chupaam i tiij reʼreʼ, reʼ kʼachareel iruqʼor reh i Jehová chi xa reʼ woʼ i reh naruyeʼem ruloqʼil eh chi reʼ i aajwaal wach pan rukʼachariik, reʼ i rubʼanariik iraaj i Dios. Eh iraaj rutijem reh i rukʼachariik i Jesús eh taqeh xukʼuhtaaj, jeʼ rukabʼ noq xuqʼor: «Awach iraaj chi neenokik haaʼ chi waj tahqaneel, marubʼan chik runaʼojbʼal chi ribʼil riibʼ, [...] eh kirutahqeej» (Mateo 16:​24). Wilaʼ reʼ i kʼachareel iruqʼahsaj i rukʼachariik reh i Dios eh iruqahsaj ruhaaʼ, ne inwihʼik chi ramigo i Jehová eh chi ramigo taqeh i kiloqʼinik reh i Dios.

3. ¿Chajariik ko ruman chi ne nabʼan reh chi ne inqajik ahaaʼ?

Mi reʼ hat inawaaj aqahsam ahaaʼ ko ruman chi peet ne inatijej chi riij i Jehová eh ne inkʼihik akojbʼal chi riij (chawil Hebreos 11:6). Noq kʼih chik i atijem chi riij i Jehová eh inkʼihik akojbʼal ne inatoqʼaaʼ rukʼaxariik i Jehová. Eh reʼ wilih ne rubʼan chi reʼ hat ne inawaaj aqʼorom i kʼuhbʼaal eh ne inawaaj kʼacharik jeʼ rukabʼ irukʼuhtaaj i Santo Laj Huuj (2 Timoteo 4:2; 1 Juan 5:3). Chi jeʼ reʼ, ne tikʼachariik pan rukorkiil jeʼ rukabʼ imponik chuwach i Jehová, eh ne chik inawaaj aqʼahsam akʼachariik reh i Dios eh ne naqahsaj ahaaʼ (Colosenses 1:​9, 10). a

 CHATZʼIR RIIJ I KʼAHCHIʼ ATIJEM

4. Nikʼwach xqajik ruhaaʼ i Jesús eh chajariik ne inqatijej chi riij

Reh runabʼjiik kʼisinoq chik chi riij nikʼwach xqajik ruhaaʼ i Jesús, chawil taq i Mateo 3:​13-​17. Chi riij i reʼ tiqʼoroq taq chi riij:

• ¿Kʼisa neeʼ na i Jesús noq xqajik ruhaaʼ?

• ¿Xa reʼ na i runaah xkitʼaqsaj? Jeʼ reʼ noq, ¿nikʼwach xkiqahsaj ruhaaʼ?

Noq reʼ Jesús ruqahsam chik ruhaaʼ xutoqʼaaʼ i rukamaj reʼ xyeʼarik reh ruum i Dios. Chawil taq i Lucas 3:​21-​23 eh Juan 6:​38, eh tiqʼoroq taq chi riij:

• Noq qahsimaj naq chik ruhaaʼ, ¿chajariik xuqʼor i Jesús chi aajwaal naq wach chi reh rubʼanariik?

5. Reʼ qahsanik haʼ maʼ kʼaxik ta chi bʼanarik

Mareh ne tiyoʼjiik ruqʼahsjiik akʼachariik reh i Jehová eh ruqahsjiik ahaaʼ. Xa reʼ laʼ, mi maʼ xakanaaʼ tijinik chi riij i Jehová eh inanabʼeej wach chi korik ne inawaaj aqahsam ahaaʼ. Reh chi ne inanabʼeej kiwach juʼjun taqeh kʼachareel xkiqahsaj kihaaʼ, chawil taq i VIDEO.

Chawil taq i Juan 17:3 eh i Santiago 1:5, eh tiqʼoroq taq chi riij:

• ¿Chajariik ne intobʼinik reh jenoʼ kʼachareel reh chi ne iraaj ruqahsam ruhaaʼ?

1. Noq inqaqʼor reh i Jehová chi inqaaj qaloqʼem chi juneliik kʼahchiʼ qaqʼahsam reh i qakʼachariik.

2. Noq inqaqahsaj qahaaʼ inqakʼuhtaaj keh chuʼnchel taqeh kʼachareel chi reʼ qakʼachariik maʼ reʼ ta chik qeh, reh laʼ chik i Dios.

 6. Mi xaqahsaj ahaaʼ ne tiwihʼik pan rufamilia i Jehová

Noq inqaqahsaj qahaaʼ inwihʼik jenaj qafamilia chi jun suut i akʼal. Atoobʼ ta reh reh wach i qatinamitaal eh i qakʼachariik chi qunchelaal jenaj wach inqanimaj eh qojkʼachariik jeʼ rukabʼ irukʼuhtaaj i Santo Laj Huuj. Chawil taq i Salmo 25:​14 eh 1 Pedro 2:​17, eh tiqʼoroq taq chi riij:

• Jeʼ rukabʼ irukʼuhtaaj taqeh texto wilih, ¿chajariik taqeh kooch inqakʼul noq inqaqahsaj qahaaʼ?

 KʼOLOQ PAN AKʼUX

Reʼ Jesús xukʼuhtaaj chi, mi inqaaj chi hoj ajnimaneel ko ruman chi ne inqaqahsaj qahaaʼ. Eh ko ruman chi naqakowem i qakojbʼal ruukʼ i Jehová eh na woʼ qakʼaman naah taqeh rukʼuhbʼaal eh naqaqʼahsam reh i qakʼachariik.

Reʼ xkahnik pan akʼux

• ¿Nikʼwach i qahsanik haʼ irukʼuhtaaj i Santo Laj Huuj? eh ¿Chaaj woʼ reet ko ruman?

• ¿Chajariik iraaj ruqʼorom noq inqaqʼahsaj i qakʼachariik reh i Jehová eh inqaqahsaj qahaaʼ?

• ¿Chajariik i peet narubʼanam jenoʼ kʼachareel reh chi ne iruqʼahsaj i rukʼachariik reh i Jehová eh ne iruqahsaj ruhaaʼ?