Reʼ Jehová iraaj chi ne inqanabʼeej wach i rufamilia reʼ wilkeebʼ pan taxaaj. Pan taxaaj wilkeebʼ taqeh ángel, reʼ taqeh ángel wilih rakʼuun i Dios (Job 38:7). ¿Chajariik iruqʼor i Santo Laj Huuj chi kiij taqeh ángel? ¿Chajariik inkibʼan taqeh ángel? ¿Chuʼnchel na taqeh ángel rufamilia i Dios?

1. ¿Ajwach taqeh ángel iruqʼor i Santo Laj Huuj?

Noq ko majaaʼ naq rutzʼuhkrisam i akʼal, reʼ Jehová rutzʼuhkrisam naq chik taqeh ángel. Reʼ taqeh ángel uxlabʼal taqeh maʼ inilarik ta kiwach eh kʼacharik inkibʼan pan taxaaj jeʼ rukabʼ i Jehová (Hebreos 1:​14). Kʼih taqeh ángel wilkeebʼ eh maʼ jenaj ta kiwach (Apocalipsis 5:​11). Reʼ taqeh ángel inkibʼan ahaʼ wilik iruqʼor i Jehová eh inkiyeew kikʼux chi runimjiik (Salmo 103:​20). Najtir cho qʼiij, reʼ Jehová xutaqʼaaʼ taqeh ángel reh chi ne inkiqʼor i ruqʼorbʼal eh ne inkikoʼleej i rutinamiit. Pan qaqʼijil reʼ taqeh ángel inkitobʼeej taqeh ajnimaneel reh chi ne inkireq taqeh kʼachareel reʼ inkaaj kinabʼeem chi riij i Dios.

2. ¿Ajwach i ajYahm eh taqeh maʼ atoobʼ laj uxlabʼal?

Juʼjun taqeh ángel xkikanaaʼ runimjiik i Jehová. Reʼ peet xuqʼehtaaj riibʼ chuwach i Jehová reʼ i «aj Yahm, reʼ insubʼwik keh chuʼnchel i tinamit wach akʼal» (Apocalipsis 12:9). Reʼ ajYahm iraaj naq chi ne inwihʼik rajaawriik chi kinaah taqeh tokoom, jeʼ reʼ noq xubʼan chi reʼ taqeh peet kʼachareel ne inkiqʼehtaaj kiibʼ chuwach i Dios jeʼ rukabʼ xubʼan i reh. Noq xikʼik taqeh qʼiij xubʼan chi juʼjun taqeh ángel xkiqʼehtaaj woʼ kiibʼ. Reʼ taqeh ángel xkiqʼehtaaj kiibʼ wilih inkibʼihnaleej maʼ atoobʼ laj uxlabʼal. Reʼ Jehová xresaj taqeh cho pan taxaaj eh xukut taqeh cho wach akʼal eh narusacham kiwach (chawil Apocalipsis 12:​9, 12).

3. ¿Nikʼwach i jotʼooj irubʼan i ajYahm eh taqeh maʼ atoobʼ laj uxlabʼal?

Reʼ ajYahm eh taqeh i maʼ atoobʼ laj uxlabʼal inkijotʼ taqeh kʼachareel ruukʼ i qʼijinik, reʼ i bʼanooj wilih irubʼan chi reʼ taqeh kʼachareel ne kiqʼorik ruukʼ taqeh i maʼ atoobʼ laj uxlabʼal. Jeʼ rukabʼ noq juʼjun taqeh kʼachareel ne inkil eh ne inkiqʼor aweh chi riij apohal, eh juʼjun taqeh kʼachareel kiʼooj ruukʼ taqeh ajtzʼirool chʼumiil, ruukʼ taqeh ajqʼiij, ruukʼ taqeh ajilool reh i naʼakʼulum, ruukʼ taqeh ajiqʼomaneel, eh ruukʼ taqeh ajwar. Wilik taqeh kʼachareel inkibʼan chi ne inakoj wach chi reʼ keh kiqʼorik ruukʼ taqeh kamnaq. Xa reʼ laʼ reʼ Jehová iruqʼor qeh: Maʼ na ta awojiik chi rusikʼariik anaʼojbʼal «ruukʼ inqʼorinik reh i maʼ tobʼlaj uxlabʼal, eh ni xata ruukʼ i aj qʼiij» (Levítico 19:​31). Reʼ Jehová iraaj chi ne inqakoʼleej qiibʼ chuwach i ajYahm eh chuwach taqeh maʼ atoobʼ laj uxlabʼal ruum chi ajixowaal taqeh eh inkaaj kibʼanam qeh i tiʼ.

 CHATZʼIR RIIJ I KʼAHCHIʼ ATIJEM

6. Maʼ akanaaʼ awiibʼ chuwach i ajYahm eh chuwach taqeh maʼ atoobʼ laj uxlabʼal

Reʼ ajYahm wilik rajaawriik chi kinaah taqeh maʼ atoobʼ laj uxlabʼal. Xa reʼ laʼ reʼ taqeh ángel korik wach kikʼux, reʼ arcángel Miguel jenaj chik rubʼihnaal i Jesús wilik rajaawriik chi kinaah ¿Ajwach i xti wilik rajaawriik, reʼ ajYahm oon reʼ Miguel? Chawil taq i Apocalipsis 12:​7-9 eh tiqʼoroq taq chi riij:

• ¿Ajwach i xti wilik rajaawriik: Reʼ Miguel ruchʼihiil taqeh ruʼángel oon reʼ ajYahm ruchʼihiil taqeh maʼ atoobʼ laj uxlabʼal?

• ¿Inaqʼor na chi reʼ taqeh rajtahqaneel i Jesús kiyoʼjiik ruum i ajYahm eh taqeh maʼ atoobʼ laj uxlabʼal?

Reʼ hat ne rubʼan chi ne tiʼelik korik chuwach i ajYahm eh chuwach taqeh maʼ atoobʼ laj uxlabʼal. Chawil taq i Santiago 4:7 eh tiqʼoroq taq chi riij:

• ¿Nikʼwach ne inakoʼleej awiibʼ chuwach i ajYahm eh chuwach taqeh maʼ atoobʼ laj uxlabʼal?

 KʼOLOQ PAN AKʼUX

Reʼ taqeh ángel korik wach kikʼux qojkitobʼeej. Reʼ ajYahm eh taqeh maʼ atoobʼ laj uxlabʼal inkixowaaj wach i Jehová, eh inkikoj i qʼijinik reh rujotʼariik taqeh kʼachareel.

Reʼ xkahnik pan akʼux

• ¿Chajariik inkibʼan taqeh ángel korik wach kikʼux reh chi reʼ taqeh kʼachareel ne inkinabʼeej wach i Jehová?

• ¿Ajwach i ajYahm eh taqeh maʼ atoobʼ laj uxlabʼal?

• ¿Chaaj woʼ reet maʼ holohik ta chaweh i qʼijinik?