Noq inkʼuljik jenoʼ tiʼ kʼaxik kʼih i kʼachareel inkaaj kinabʼeem «¿Chaaj woʼ reet inkʼuljik?». Insuqbʼik qakʼux runabʼjiik chi reʼ Santo Laj Huuj iruqʼor qeh chaaj woʼ reet.

1. ¿Chajariik xubʼan i ajYahm reh chi reʼ i mahk xokik wach akʼal?

Reʼ ajYahm eh Subʼuul xuqʼehtaaj riibʼ chuwach i Dios. Ruum chi reʼ reh iraaj naq chi ne inwihʼik rajaawriik chi kinaah taqeh kʼachareel, xubʼan chi reʼ Adán eh i Eva xkiqʼehtaaj woʼ kiibʼ chuwach i Dios noq xuchuk qʼorik reh i Eva (Génesis 3:​1-5). Xuqʼor reh i Eva chi reʼ Jehová maʼ iruyeew ta naq qʼabʼ reh, chi ne irusuqkileej i rukʼachariik. Ruukʼ i reʼ kʼahchiʼ naq ruqʼorom chi reʼ taqeh kʼachareel ne naq inkisuqkileej i kikʼachariik mi xkiqʼehtaaj kiibʼ chuwach i Dios. Noq reʼ ajYahm xuqʼor reh i Eva chi maʼ na ta naq rukimiik, reʼreʼ i peet chukuj qʼorik xuqʼor. Ruum aj reʼ, reʼ Santo Laj Huuj iruqʼor chi reʼ reh i «chukul qʼorik, reʼ reh i rajaaw chukuj qʼorik» (Juan 8:​44).

2. ¿Chajariik xkichih i Adán eh i Eva pan kikʼachariik?

Reʼ Jehová qʼeʼ naq atoobʼ ruukʼ i Adán eh i Eva. Xuqʼor keh chi ne naq inkikʼux chuʼnchel taqeh wach i cheeʼ reʼ wilkeebʼ pan holohik yeʼaabʼ rubʼihnaal Edén, eh xa jenaj naq i cheeʼ maʼ na ta naq kikʼuxum i wach (Génesis 2:​15-​17). Atoobʼ ta jeʼ reʼ xqʼorarik keh, reʼ keh xkikʼux i wach i cheeʼ reʼ i maʼ na ta naq kikʼuxum. Reʼ Eva «xuchʼuq i wach i cheeʼ reʼ reʼ xukʼux i koq». Eh chi riij i reʼ, reʼ Adán «xukʼux woʼ i koq» (Génesis 3:6). Jeʼ reʼ noq kikabʼcheel maʼ xkinimaj ta i Dios. Ruum chi reʼ Adán eh i Eva manlik naq wach i kikʼachariik reʼ naq i holohik inchol chi ne inkibʼan. Xa reʼ laʼ, noq reʼ keh maʼ xkaaj ta kinimam i Dios, ximahkunik eh maʼ xkaaj ta chi reʼ i Dios ne intaqʼanik chi kinaah. Eh reʼ xkibʼan wilih xukʼam cho tiʼ kʼaxik chi kinaah (Génesis 3:​16-​19).

3. Ruum chi xkiqʼehtaaj kiibʼ i Adán eh i Eva, ¿chajariik i xokik cho wach akʼal?

Noq reʼ Adán eh i Eva ximahkunik xkiqʼebʼ i kʼacharik manlik wach eh ruum aj reʼ, na naq kirijbʼiik, kiyowabʼjiik eh kikimiik eh reʼ kʼacharik wilih xkikʼsaj qeh. Reʼ Santo Laj Huuj iruqʼor chi riij i Adán: «Eh xa ruum i jinaj chi peet winaq, Adán rubʼihnaal, xokik i mahk wach akʼal. Reʼ mahk xa xutiq chik cho riibʼ kuukʼ i tinamit, eh ruum i reʼ, xtohqʼik i kimik, jeʼ reʼ noq chuʼnchel chik kikimik, ruum chuʼnchel ximahkunik» (Romanos 5:​12).

Jeʼ reʼ noq, ¿chaaj woʼ reet qojikʼik pan tiʼ kʼaxik? Ruum chi wilik pech inqachih i maʼ holohik ta oon ruum chi reʼ taqeh kʼachareel inkichih i maʼ holohik ta. Eh wilik woʼ pech ruum chi maʼ qehtʼal ta jaruuj ne inchalik i tiʼ kʼaxik chi qanaah (chawil Eclesiastés 9:​11).

 CHATZʼIR RIIJ I KʼAHCHIʼ ATIJEM

4. Maʼ reʼ ta rumahk i Dios i tiʼ kʼaxik inqakʼul

Kʼih i kʼachareel inkikapaaj chi reʼ Dios intaqʼanik nah akʼal. ¿Xa reʼ laʼ, korik na inkiqʼor? Chawil taq i VIDEO.

Chawil taq i Santiago 1:​13 eh 1 Juan 5:​19, eh tiqʼoroq taq chi riij:

• ¿Rumahk na i Dios i tiʼ kʼaxik eh i mahk wilik wach akʼal?

5. Reʼ irukʼam cho i rajaawriik i ajYahm wach akʼal

1. Reʼ Adán eh i Eva manlik naq wach i kikʼachariik maʼ ajmahk ta naq taqeh eh holohik naq i kikʼachariik pan holohik yeʼaabʼ, xa reʼ laʼ xkiqʼehtaaj kiibʼ chuwach i Dios eh xkinimaj i ajYahm.

2.   Noq reʼ Adán eh i Eva kiqʼehtaam chik kiibʼ chuwach i Dios, xnunjik i mahk wach akʼal, i tiʼ kʼaxik eh i kimik.

3. Reʼ Jehová narusacham wach i mahk, i tiʼ kʼaxik eh i kimik. Naruponiik i qʼiij chi reʼ taqeh kʼachareel nakikʼachariik pan holohik yeʼaabʼ eh chi manlik chik wach i kikʼachariik.

6. Reʼ Jehová intiʼbʼik rukʼux noq qojikʼik pan tiʼ kʼaxik

¿Maʼxta na iraaj reh i Dios noq qojikʼik pan kʼaxkilal? Chakoj rehtaal xkitzʼihbʼaaj i rey David eh i apóstol Pedro. Chawil taq i Salmo 31:7 eh 1 Pedro 5:7, eh tiqʼoroq taq chi riij:

• ¿Nikʼwach inawikʼraaj awiibʼ chi reʼ Jehová iril i kʼaxkilal qojikʼik wiiʼ eh chiʼ intiʼbʼik rukʼux?

 KʼOLOQ PAN AKʼUX

Ruum i ajYahm eh taqeh peet kʼachareel xnunjik i mahk wach akʼal. Reʼ Jehová intiʼbʼik rukʼux noq qojikʼik pan tiʼ kʼaxik, ruum aj reʼ maʼ najt ta chik iraaj chi narusacham wach i tiʼ kʼaxik.

Reʼ xkahnik pan akʼux

• ¿Ahaʼ wilik i chukuj qʼorik xuqʼor i ajYahm reh i Eva?

• Ruum chi xkiqʼehtaaj kiibʼ i Adán eh i Eva, ¿chajariik i xokik cho wach akʼal?

• ¿Chaaj woʼ reet qehtʼal chi reʼ Jehová intiʼbʼik rukʼux noq qojikʼik pan tiʼ kʼaxik?