Reʼ taqeh peet kʼachareel Adán eh i Eva maʼ xkinimaj ta i Dios. Ruum aj reʼ, reʼ hoj qojmahkunik, qojʼikʼik pan tiʼ kʼaxik eh qojkimik. a Xa reʼ laʼ wilik quyʼinik. Reʼ Jehová xojrukoʼleej pan qʼabʼ i mahk eh i kimik noq xutaqʼaaʼ cho i rakʼuun Jesucristo. Reʼ Santo Laj Huuj irukʼuhtaaj chi ruukʼ i rukimiik i Jesús xuyeew jenaj koʼlembʼal. Reʼ koʼlembʼal jeʼ rukabʼ i tumiin inyeʼarik chi jilow i rukʼachariik jenoʼ kʼachareel. Eh reʼ Jesús xuyeew i rukʼachariik manlik wach reh rutojariik i qamahk (chawil Mateo 20:​28). Reh chi ne naq inwihʼik qeh i manlik kʼacharik reʼ xuqʼebʼ i Adán eh i Eva, reʼ Jesús xuyeew i rukʼachariik chi qiij. Ruukʼ i wilih xukʼuhtaaj qeh i rukʼaxooj i Jehová eh jeʼ woʼ i Jesús. Reʼ tijinik wilih ne tirutobʼeej reh chi ne inkʼihik akʼaxooj chi riij i rukimiik i Jesús.

1. ¿Nikʼwach qojrutobʼeej yuʼnaak chi reʼ Jesús xkimik chi qiij?

Ruum chi hoj ajmahk inqabʼan i maʼ imponik ta chuwach i Jehová, xa reʼ laʼ, ne irubʼan chi hoj ramigo wilaʼ xqayotʼ qakʼux chi riij i qamahk eh ne inqapahqaaj kuybʼal qamahk reh i Jehová pan rubʼihnaal i Jesús. Eh chi naqachopom qakʼux reh chi maʼ ne ta chik inqabʼan i mahk reʼ inqabʼan naq (1 Juan 2:1). Reʼ Santo Laj Huuj iruqʼor: «Ruum reʼ Jesucristo reh, xa junriim xukʼul i tiʼlaj kimik chi riij taqe qamahk. Reʼ reh maʼ xta woʼ naq ru mahk xa reʼ laʼ xukʼul i tiʼ kʼaxik quum i hoj, i hoj aj mahk, reh chi xojrukʼam panotobʼil ruukʼ i Dios» (1 Pedro 3:​18).

2. ¿Chajariik taqeh kooch naqakʼulum ruum chi xkimik i Jesús chi qiij?

Reʼ Jehová xutaqʼaaʼ cho i rakʼuun reh chi xuyeew i rukʼachariik chi qiij i hoj reh chi chuʼnchel i nakikojom kikʼux ruukʼ i Jesús, «maʼ naa ta rusahchiik kiwach, naa laʼ ruwihiik kikʼachariik chi juneliik» (Juan 3:​16). Intyoox reh i xubʼan i Jesús, maʼ najt ta chik iraaj chi reʼ Jehová narusacham wach taqeh kʼaxkilal xchalik noq reʼ Adán maʼ xnimanik ta. Reʼ wilih iraaj ruqʼorom chi, wilaʼ reʼ hoj xqakoj qakʼux chi reʼ Jesús xuyeew i rukʼachariik chi mayiij chi qiij i hoj, ne qojkʼachariik chi juneliik ayuʼ wach akʼal noq xa holohik chik (Isaías 65:​21-​23).

 CHATZʼIR RIIJ I KʼAHCHIʼ ATIJEM

3. Reʼ rukimiik i Jesús irubʼan chi ne qojelik riʼsil rajaawriik i mahk eh i kimik

1. Reʼ Adán manlik naq wach i rukʼachariik eh noq maʼ xunimaj ta i Dios xubʼan chi reʼ taqeh kʼachareel ne inkehchaaj i mahk eh i kimik.

2. Reʼ Jesús manlik naq wach i rukʼachariik eh ruum chi xunimaj i Dios xubʼan chi reʼ taqeh kʼachareel ne inwihʼik kikʼachariik chi juneliik eh manlik wach.

4. Reʼ i rukimiik i Jesús ne irutobʼeej taqeh kʼachareel chi jun suut i akʼal

 5. Reʼ koʼlembʼal jenaj kooch xuyeew aweh i Jehová

Reʼ taqeh ramigo i Jehová kehtʼal chi reʼ koʼlembʼal jenaj kikooch. Chawil jenaj ehtalil, chawil taq i Gálatas 2:​20 eh tiqʼoroq taq chi riij:

• ¿Chajariik xuqʼor i apóstol Pablo chi riij i rukimiik i Jesús?

Noq reʼ Adán xmahkunik reʼ reh eh taqeh riih rumaam xkehchaaj i kimik, xa reʼ laʼ reʼ Jehová xutaqʼaaʼ cho i rakʼuun ayuʼ wach akʼal reh chi xkimik chawiij eh reʼreʼ ne irubʼan chi reʼ hat ne tikʼachariik chi juneliik.

Noq kʼahchiʼ awilom taqeh texto, chakapaaj chajariik xrikʼraaj i Jehová noq xril chi reʼ i rakʼuun kʼahchiʼ naq rikʼiik pan tiʼ kʼaxik. Chawil taq i Juan 19:​1-7 eh 16-​18, eh tiqʼoroq taq chi riij:

• ¿Chajariik xawikʼraaj noq xawil i xukʼul i Jesús chawiij i hat?

• ¿Chajariik inakapaaj chi riij i xubʼan i Jehová chawiij?

 KʼOLOQ PAN AKʼUX

Intyoox reh i rukimiik i Jesús, reʼ Jehová irukuy qamahk eh ne iruyeew qakʼachariik chi juneliik.

Reʼ xkahnik pan akʼux

• ¿Chaaj woʼ reet xkimik i Jesús?

• ¿Nikʼwach xubʼan chi reʼ i rukʼachariik i Jesús «kikoʼlbʼaal chuʼnchel i tinamit»?

• ¿Nikʼwach ne tirutobʼeej i hat i rukimiik i Jesús?