Chakapaaj chi riij i wilih: Reʼ Heather eh reʼ Mike kiʼibʼ chik poh inkikʼam chi kʼahchiʼ kinabʼeem kiibʼ, xa reʼ laʼ, reʼ Heather irikʼraaj chi najtir chik kinabʼeem kiibʼ. Kiʼikʼik qʼiij chi rutaqʼabʼjiik taqeh mensaje eh kiqʼorik pan teléfono, eh kehtʼal chik chajarik inkikapaaj. Xa reʼ laʼ, reʼ Mike maʼ xa reʼ ta chik qʼorik iraaj.

Reʼ Mike eh reʼ Heather xa inkichop i kiqʼabʼ eh wilik pech inkitzʼubʼ kiibʼ. Reʼ Heather maʼ raaj ta rubʼanam i kʼahchiʼ rukapaam i Mike, xa reʼ laʼ maʼ raaj ta woʼ chi ne inkanabʼjik ruum i rumeetzʼ. Xa reʼ woʼ reh irubʼan chi suq rukʼux. Reʼ Heather irukapaaj: «Reʼ Mike eh reʼ hin inqaaj qiibʼ.»

Ne ta naq chik irubʼan chi ne inwihʼik ameetzʼ eh hat ta naq i Heather, ¿chajarik naq ne nabʼan?

Mi wilkaat chi naah jenaj cheeʼ eh inakut awiibʼ reh xikʼinik jeʼ rukabʼ inkibʼan taqeh tzʼikin, tiʼ naakʼulum. Jeʼ woʼ reʼ naʼakʼulum mi maʼ inanimaj i rukʼuhbʼaal i Dios. Jeʼ rukabʼ chi maʼ na ta qabʼanam i kʼoyomal, iraaj ruqʼorom chi maʼ na ta qayohkik ruukʼ jenoʼ kʼachareel noq komajaʼ inqabʼan kaxaro (1 Tesalonicenses 4:3).

¿Chajarik ne inqakʼul mi maʼ inqanimaj i kʼuhbʼaal wilih? Reʼ Santo Laj Huuj iruqʼor: «Raaj awach imbʼanik reh i kʼoyomal, reʼ i rutiʼjolal i ruyeew pamahk» (1 Corintios 6:18). ¿Chajarik iraaj ruqʼorom i wilih?

 Noq xkipahqaaj keh juʼjun taqeh kʼijool xiyohkik ruukʼ jenoʼ kʼachareel eh komajaʼ kibʼanam kaxaro, xkikoj rehtʼaal chi xkikʼul taqeh tiʼ kʼaxik wilih:

• XTIBʼIK KIKʼUX. Reʼ taqeh kʼijool xiyohkik ruukʼ jenoʼ kʼachareel noq komajaʼ kibʼanam kaxaro xkiqʼor chi xtibʼik kikʼux ruukʼ xkibʼan.

• MAʼ AJWACH TA CHIK UUKʼ INKIKOJ KIKʼUX. Noq kibʼanam chik i wilih, kʼih inkipahqaaj ajwach chik uukʼ xyohkik i numeetzʼ.

• MAʼ SUQ TA CHIK KIKʼUX. Kʼih taqeh qʼahxoq, inkaaj wihʼik ruukʼ jenoʼ winaq ne inkoʼlinik keh eh maʼ reʼ ta ruukʼ jenoʼ winaq xa iraaj yohkik kuukʼ. Eh kʼih taqeh kʼijool maʼ inkikʼax ta wach taqeh qʼahxoq reʼ i xareʼyuʼ ne inkaaj yohkik kuukʼ.

• Reʼ inqatijej: Mi tiyohkik ruukʼ jenoʼ kʼachareel noq ko majaʼ inabʼan kaxaro ruukʼ, inakʼuhtaaj chi maʼ looqʼ ta chaweh akʼachariik (Romanos 1:24). Reʼ atiʼjolal qʼeʼ looqʼ. ¡Maʼ chʼuwaʼreej wach!

Chakowej akʼux eh matyohkik ruukʼ jenoʼ kʼachareel mi ko majaʼ inabʼan kaxaro (1 Tesalonicenses 4:3). Noq ne nabʼan kaxaro ne rubʼan chi ne tiwihʼik ruukʼ. Eh chi jeʼre, ne nareq rusuqkiil akʼachariik eh maʼ ne ta intiʼbʼik akʼux. Reʼ wilih inkikʼul i kiyohkik ruukʼ jenoʼ kʼachareel noq ko majaʼ inkibʼan kaxaro (Proverbios 7:22, 23; 1 Corintios 7:3).

• Mi jenoʼ iraaj awach, ¿maj korik chi ne iraaj chi suq akʼux?

• Mi jenoʼ pan korik iraaj awach, ¿ne na irupahqaaj aweh chi ne nabʼan i maʼ imponik ta chuwach i Dios? (Hebreos 13:4).