Chakapaaj chi riij i wilih: Reʼ Karen wilik pan jenaj ninqʼiij eh irubʼiraj chi kʼahchiʼ kiqʼoʼreem:

Noq xrilow chi riij, xrilow chi pan ruqʼabʼ i ramiga Jessica wilik kiʼibʼ cerveza. Iruyeew jenaj reh eh iruqʼor reh: «Hat chik nim. Ne rubʼan chi ne nasuqkileej akʼachariik».

Reʼ Karen maʼ raaj ta rukʼem i cerveza ruum chi ko maʼxta ruhabʼul (ruhabʼil), xa reʼ laʼ maʼ raaj ta chi reʼ ramiga ne rukapaaj chi reʼ reh maʼ rusuqkileej taj i rukʼachariik. Reʼ Jessica holohik i runaʼojbʼal. Mi reʼ reh irukʼej i cerveza, maʼ mahk taj. Irukapaaj «Xa jenaj chi cerveza, maʼ jeʼ ta rukabʼ i droga».

Hat ta naq i Karen, ¿chajarik naq ne nabʼan?

Reh chi ne nabʼan i holohik koruman chi ne nanabʼeej ajwach i hat. Mi awehtʼal ajwach i hat iraaj ruqʼorom chi awehtʼal chajarik i holohik naʼojbʼal wilik aweh. Runabʼjiik i wilih tirukoʼleej eh iruyeew awansil reh chi reʼ hat ne nachih rubʼanariik i holohik eh maʼ reʼ ta tokoom ne iruqʼor aweh chajarik ne nabʼan (1 Corintios 9:26, 27).

¿Nikʼwach ne nareq i ansil wilih? Peet qil kiʼibʼ ixibʼ pahqanik.

Mi awehtʼal chajarik tichol rubʼanariik on chajarik i holohik naʼojbʼal wilik aweh, ne nakoj akʼux ruukʼ i nabʼan.

JENAJ EHTALIL WILIK PAN SANTO LAJ HUUJ: Reʼ apóstol Pablo xutzʼihbʼaaj: «Atoobʼ ta maʼ kinchol qʼorik chi korik, reʼ hin kʼih wehtʼal chikiwach i keh» (2 Corintios 11:6, TNM). Ruum chi kʼih naq rehtʼal chi riij i Santo Laj Huuj, maʼ xubʼan ta kiʼibʼ rukʼux noq maʼ holohik ta xiqʼorik chi riij eh maʼ xukanaʼ ta chi reʼ taqeh qʼorik wilih ne iruqahsaj rukʼux (2 Corintios 10:10; 11:5).

CHAKAPAAJ CHAWIIJ I HAT: Chakapaaj chajarik tichol rubʼanariik.

Chatzʼihbʼaaj jenoʼ holohik naʼojbʼal wilik aweh jeʼ rukabʼ mi hat chaqʼlam, mi inkikoj kikʼux awuukʼ on maʼ tichahmik taj.

Jeʼ rukabʼ noq jenoʼ cadena inkʼup on (inqʼup) ahaʼ wiiʼ maʼ kow taj, jeʼ woʼ reʼ i hat, ne insahchik pan akʼux ajwach i hat mi xa reʼ woʼ chi riij i kʼaxik chaweh rubʼanariik inakapaaj.

JENAJ EHTALIL WILIK PAN SANTO LAJ HUUJ: Reʼ Pablo rehtʼal naq i kʼaxik chi reh, ruum xutzʼihbʼaaj: «Eh xti mponik woʼ naq rusuqkiil pan wánima i ruqʼor i rukʼuhbʼaal i Dios. Xa reʼ laʼ, reʼ hin inwikʼraaj chi wilik inqʼilwik weh chi maʼ nubʼan ta naq cho rukapebʼjiik i holohik chi bʼanarik. Reʼ inqʼilwik cho weh reʼ reʼ, reʼ i mahk wilik naq cho pan wánima, i jeʼ naq hin ruyeʼem prexo» (Romanos 7:22, 23).

CHAKAPAAJ CHAWIIJ I HAT: ¿Chajarik i kʼaxik chaweh inawaaj ajalam?

¿Mi ne naq inapahqaaj reh jenoʼ taxi chi ne tirubʼehsaj xa pan jenaj yeʼaabʼ korehtaal inkʼuhlik i rugasolina? ¿Maj korik chi maʼ ne taj? Kʼih ne natoj.

¿Chajarik inqatijej chi riij i wilih? Mi awehtʼal chajarik naabʼanam pan akʼachariik, naawehtʼaliim ahaʼ nawaaj ponik eh nikʼwach i ponik ar.

JENAJ EHTALIL WILIK PAN SANTO LAJ HUUJ: Reʼ Pablo xutzʼihbʼaaj: «Eh reʼ hin, maʼ nee ta naq kinajiminik chi maʼ wehtʼal taj ahaʼ ojik i nubʼan wiiʼ» (1 Corintios 9:26). Reʼ Pablo rehtʼal naq chajarik iraaj rureqem pan rukʼachariik eh xukoj rukʼux chi rureqariik (Filipenses 3:12-14).

CHAKAPAAJ CHAWIIJ I HAT: Chatzʼihbʼaaj ixibʼ naʼojbʼal i nawaaj abʼanam chuwach i haabʼ wilih.

Mi maʼ awehtʼal chajarik inanimaj, hat jeʼ rukabʼ jenaj kʼachareel maʼ rehtʼal ta ahaʼ ojik irubʼan eh naabʼanam inkibʼan taqeh awamigo. Jeʼ rukabʼ i camaleón irujal i rucolor noq inikʼik pan reh reh wach yeʼaabʼ. Ajwach irubʼan i wilih maʼ rehtʼal ta ajwach i reh.

Jeʼ reʼ noq, mi awehtʼal chajarik naabʼanam atoobʼ ta maʼ jenaj ta wach ruukʼ inkibʼan taqeh tokoom, maʼ na ta rusahchik pan akʼux ajwach i hat.

JENAJ EHTALIL WILIK PAN SANTO LAJ HUUJ: Mareh reʼ Daniel ko kʼijool naq noq ixkichʼaq ruukʼ i rufamilia. Atoobʼ ta jeʼ wilih xikʼul, «xuqʼor parukʼux» chi narunimam i rukʼuhbʼaal i Dios (Daniel 1:8). Ma xsahchik ta pan rukʼux ajwach i reh jeʼ woʼ chajarik i runimaj.

CHAKAPAAJ CHAWIIJ I HAT: ¿Chajarik inanimaj? Jeʼ rukabʼ: ¿Mi nanimaj chi wilik Dios? ¿Chaj woʼ reet? ¿Chaj woʼ reet inanimaj chi wilik?

¿Inakapaaj na chi reʼ taqeh naʼojbʼal iruyeew i Dios tikitobʼeej? ¿Chaj woʼ reet inanimaj i wilih?

Jeʼ reʼ noq, ¿mi nawaaj abʼanam jeʼ rukabʼ i ruxaq cheeʼ irukʼam jeh i teew on jenaj cheeʼ irukuy i kow laj jabʼ? Mi nawaaj abʼanam jeʼ rukabʼ i cheeʼ reʼreʼ, chakowbʼisaj akʼux reh chi maʼ ne ta insahchik pan akʼux chajarik inanimaj. Reʼ wilih ne tirutobʼeej chi rureqariik chi riij i pahqanik wilih: ¿Pan korik ajwach i hin?