Chakapaaj chi riij i wilih: Reʼ David inooj pan rucarro eh imponik pan jenaj yeʼaabʼ maʼ rehtʼal ta wach. Noq irilow i rubʼihnaal taqeh yeʼaabʼ eh taqeh paat, irukoj rehtaal chi maʼ ar ta naq iraaj ponik. Xsahchik eh maʼ xukoj ta rehtaal noq xujal i rubʼeeh.

Hat ta naq i David, ¿chajarik naq ne nabʼan?

Ne rubʼan chi ne nabʼan i wilih:

1. Ne napahqaaj reh jenoʼ kristyaano chi ne tirukʼam pan yeʼaabʼ reʼreʼ.

2. Ne nawil jenoʼ mapa on jenoʼ GPS.

3. Maʼ ne ta tipaʼlojik korehtaal ne nareq i bʼeeh.

Maj korik chi maʼ ne ta inqachih i opción C.

Reʼ opción B holohik chuwach i peet: mi wilik awuukʼ jenaj mapa on jenaj GPS, reʼ wilih ne tirutobʼeej reh rureqarik abʼeeh.

Reʼ Santo Laj Huuj ne tirutobʼeej.

Reʼ huuj wilih wilik kuukʼ chuʼnchel taqeh kristyaano:

• Ne iruqʼor aweh chajarik naabʼanam noq tiʼikʼik pan tiʼ kʼaxik.

• Ne tirutobʼeej reh chi ne nanabʼeej ajwach i hat eh reh chi holohik anaʼojbʼal.

• Ne irukʼuhtaaj aweh nikʼwach ne tikʼachariik chi holohik.

Noq inqatijej qʼorik, inqatikʼaʼ pahqanik:

• ¿Chaj woʼ reet rax i taxaaj?

• ¿Ruukʼ chajarik xikorjik wiiʼ taqeh chʼumiil?

Chi riij i reʼ inqatoqʼaʼ pahqanik chi riij i inkʼularik wach akʼal:

• ¿Chajreet noq inqakʼul i tiʼ kʼaxik?

• ¿Chajreet noq qojkimik?

¿Mi awehtʼal naq chi reʼ Santo Laj Huuj inqʼorik chi riij taqeh pahqanik wilih?

Kʼih inkiqʼor chi chukuj qʼorik wilik chupaam i Santo Laj Huuj, jenaj huuj maʼ inkamanik ta chik eh kʼaxik rureqarik chi riij. ¿Korik naak i wilih? ¿Mi korik ta woʼ inkiqʼor i tinamit chi riij i Santo Laj Huuj? ¿Mareh reʼ i kibʼiram maʼ korik taj?

Wilik inkikapaaj chi reʼ Santo Laj Huuj iruqʼor chi reʼ i Dios intaqʼanik naah akʼal. ¿Korik ta woʼ i wilih? Reʼ akʼal wilih yojimaj wach. Xa ahaʼ wilik i kʼaxkilaal eh tiʼkiil kʼuxliis, yabʼilaal eh kimik, nebʼaʼil eh chuʼnchel yojooj wach. Reʼ Dios qojraaj, ¿rumahk na chuʼnchel i wilih?

¿Mi nawaaj anabʼeem ajwach wilik rajaawriik chi naah i wach akʼal? Mareh ne rusach akʼux i ruqʼor i Santo Laj Huuj.

Mareh xakoj rehtaal chi reʼ taqeh naʼojbʼal wilik pan huuj wilih isamaj taqeh pan Santo Laj Huuj. Reʼ taqeh testigos reh Jehová kehtʼal chi ne rubʼan chi ne inkikoj kikʼux ruukʼ i Santo Laj Huuj, ruum chi «Chuʼnchel i tzʼihbʼamaj pan santo laj huuj reʼ i Dios xyeʼwik chaloq ruukʼ i Ruxlabʼal. Inkamanik reh kʼuhbʼalinik, reh qʼilooj, reh lochʼoj nahis, reh kojooj naʼojbʼal» (2 Timoteo 3:16, 17). Chawil paam i huuj wilih. Atoobʼ ta najtir xtzʼihbʼjik, inkamanik pan qaqʼijil.