Chakapaaj chi riij i wilih: Reʼ Brian inchalik ruyoʼjik noq kiʼibʼ i ruchʼihil inkijil ikoq kiibʼ ruukʼ. Reʼ xamano wilih kiʼibʼ chik pech inkiqʼor reh chi nakiyeʼem rusiikʼ. Eh roox pech chik ruukʼ i wilih.

Eh jenaj ruchʼihil iruqʼor woʼ chik reh:

Irisaj chaloq jenaj siikʼ eh iruyeew reh i Brian.

Noq reʼ Brian irilow i siikʼ pan qʼabʼ i ruchʼihil, qʼeʼ inyoʼjik.

Hat ta naq i Brian, ¿chajarik naq ne nabʼan?

¿Mi kehtʼal i kʼahchiʼ kibʼanam taqeh i ruchʼihil i Brian? ¿Mi inakapaaj chi pan kanima xelik inkaaj kibʼanam? Mareh maʼchih. Mareh xa kʼahchiʼ kibʼanam chajarik inkibʼan taqeh tokoom reh wihʼik kuukʼ. Ruum inkikanaʼ chi reʼ taqeh tokoom ne inkiqʼor keh chajarik nakibʼanam.

Mi nakʼul i wilih, ¿mi ne naq imponik chawach rubʼanariik i holohik eh rukuyariik noq kʼahchiʼ kaat kiminim?

1. CHAKOWBʼISAJ AWIIBʼ

   Reʼ Santo Laj Huuj iruqʼor: «Reʼ i wilik runaʼojbʼal i rukoj rehtaal ahaʼ wilik i yohbʼaal, i rukotej riij. Eh reʼ i maʼ xta runaʼojbʼal, maʼ rukoj ta rehtaal, ko qʼehbʼinaq chik ar noq irikʼraaj» (Proverbios 22:3).

   Wilik pech, inqakoj rehtaal noq inchalik jenoʼ kʼaxkilaal. Chakapaaj chi bʼehik inabʼan eh pan bʼeeh inawilow juntzʼuhbʼ chi kʼijool siikʼ inkibʼan. Mi inakapaaj chajarik i kʼaxkilaal naakʼulum, reʼ wilih ne tirutobʼeej reh chi ne nanabʼeej chajarik naabʼanam.

2. CHAKAPAAJ

   Reʼ Santo Laj Huuj iruqʼor: «Chakʼuhtaaj taq chi saq taq wach akapebʼaal» (1 Pedro 3:16).

   Chakapaaj: «¿Nikʼwach ne inwikʼraaj wiibʼ mi inubʼan chajarik inkibʼan taqeh tokoom?». Mareh reʼ taqeh awuchʼihil pan escuela ne inkaaj wihʼik awuukʼ, mareh kiʼibʼ ixibʼ oq qʼiij. Xa reʼ laʼ, ¿chi riij i reʼ nikʼwach ne nawikʼraaj awiibʼ? ¿Mi inawaaj chi ne insahchik pan akʼux ajwach i hat xa reh wihʼik kuukʼ taqeh awuchʼihil? (Éxodo 23:2).

3. CHASIKʼ CHI KORIK CHAJARIK NAABʼANAM

   Reʼ Santo Laj Huuj i ruqʼor: «Reʼ wilik runaʼojbʼal, inyoʼjik chubʼaan yiibʼ wach» (Proverbios 14:16).

   Chi qunchelaal naqasikʼim chajarik naqabʼanam pan qakʼachariik eh naqatojom riij chajarik inqabʼan. Reʼ Santo Laj Huuj inqʼorik chi riij taqeh winaq xkichih rubʼanariik i holohik, jeʼ rukabʼ i José, i Job eh i Jesús. Inqʼorik woʼ chi riij taqeh winaq xkichih rubʼanariik i maʼ holohik taj, jeʼ rukabʼ i Caín, Esaú eh i Judas. ¿Chajarik naabʼanam i hat?

Reʼ Santo Laj Huuj iruqʼor chi «korik-oq wach akʼux» (Salmo 37:3). ¿Mi akapaam chik chajarik naakʼulum eh chajarik naabʼanam? Ruqʼorariik chajarik inakapaaj maʼ kʼaxik ta chik chaweh eh ne woʼ iruyeew rusuqkiil akʼux.

Matkapebʼenik, maʼ koruman ta chi kʼih ne naqʼor keh taqeh awuchʼihil. Xa manlik ruukʼ ruqʼorariik, maʼ inwaaj taj. Ne woʼ irubʼan chi ne nakʼuhtaaj keh chi maʼ na ta ajalam chajarik inakapaaj. Ne rubʼan chi ne naqʼor:

• «Reʼ hin maʼ inwaaj taj».

• «Reʼ hin maʼ inubʼan ta i wilih».

• «Awehtʼal chik chajarik inukapaaj».

Koruman chi xareʼyuʼ ne naqʼor chajarik inakapaaj eh maʼ ne ta tiyoʼjik. Mi nabʼan i wilih maʼ ne ta chik tikijotʼ.

Mareh reʼ taqeh awuchʼihil ne inkibʼan chi ne tikʼixik. Mareh ne inkiqʼor aweh: «¿Tiyoʼjik naak?» Reʼ inkaaj chi reʼ taqeh tokoom ne inkibʼan i maʼ holohik ta, inkikoj taqeh i qʼorik wilih. ¿Chajarik ne nabʼan? Ne rubʼan chi ne nabʼan i wilih:

• Xa chabʼiraj taqeh. Ne rubʼan chi ne naqʼor i wilih: «Korik, maʼ ne ta inubʼan». Chi riij i reʼ chaqʼor chaj woʼ reet maʼ nabʼan taj.

• Chaqʼor chaj woʼ reet maʼ nabʼan taj eh ne woʼ rubʼan chi ne naqʼor: «Jenaj kʼachareel wilik runaʼojbʼal jeʼ rukabʼ i hat maʼ ne ta naq irubʼan i siikʼ».

Mi maʼ inkikanaʼ ajotʼarik, hiy. Kʼoloq pan akʼux: mi tikahnik chi kibʼirjiik maʼ ne ta inkikanaʼ ajotʼarik. Mi xabʼan i wilih, inakʼuhtaaj chi wilik anaʼojbʼal.

Qehtʼaliim oq i wilih: xa na woʼ kaat kiminim chi rubʼanariik i maʼ holohik taj. Xa reʼ laʼ, reʼ hat naachihim chajarik naabʼanam, naaqʼorom i nakapaaj eh maʼ na ta akanaam chi ne tikijotʼ. Maj pan aqʼabʼ wilik chajarik naabʼanam (Josué 24:15).