PAHQANIK 3
¿Nikʼwach ne kinqʼorik ruukʼ taqeh wajaaw?
¿CHAJARIK NAQ NE NABʼAN I HAT?
Chakapaaj i wilih: pan miércoles xqʼeq, reʼ Geoff i wilik reh 17 haabʼ, rukohlaam chik taqeh rutzʼihbʼ eh iraaj hiʼlik. Intzuhnik eh iruqop i tele.
Xa reʼ la, reʼ rajaaw imponik eh irutzʼehtaaj chi kow.
«¡Geoffrey! ¿Chajarik inabʼan ayuʼ? ¿Maʼ xnuqʼor ta na aweh chi naatobʼeem achaaqʼ reh rubʼanariik i rutzʼihbʼ? ¡Maʼ jaruuj inabʼan inqʼorarik aweh!».
«Xa je woʼ reʼ inaqʼor », iruqʼor i Geoff chi qʼun.
Reʼ rajaaw iruqʼor reh: «¿chajarik xaqʼor?».
«Maʼxtaj, papá», iruqʼor pan kʼaah.
Reʼ rajaaw qʼeʼ inkaqrik. «¡Reʼ hin maʼ na ta kinaqʼoʼreem chi jeʼ reʼ!», iruqʼor reh.
Hat ta naq i Geoff, ¿chajarik naq ne nabʼan reh chi maʼ ne ta inkʼuljik i wilih?
CHAKAPAAJ I WILIH
Mi kʼahchiʼ abʼehsam jenaj carro eh inawilow chi tzʼaplik i bʼeeh, inasikʼ tokoom bʼeeh. Jeʼ woʼ reʼ ne nabʼan i hat, ne rubʼan chi ne nasikʼ nikʼwach qʼorik ruukʼ taqeh awajaaw.
JENAJ EHTALIL:
«Kʼaxik i qʼorik ruukʼ i wajaaw —iruqʼor i Leah—. Wilik pech qʼorik inubʼan ruukʼ, eh iruqʼor: ¿chajarik xaqʼor?».
CHAJARIK NE RUBʼAN I LEAH
-
Ne ruqʼoreej chi kow i rajaaw.
Reʼ Leah iruqʼor reh i rajaaw: «¡Kinabʼiraj! ¡inwaaj qʼorik awuukʼ!».
-
Maʼ ne ta chik inqʼorik chi riij i wilih.
Reʼ Leah maʼ raaj ta chik qʼorik ruukʼ i rajaaw chi riij i kʼaxkilaal.
-
Rusikʼ tokoom chik qʼiij reh qʼorik ruukʼ i rajaaw.
Reʼ Leah inqʼorik ruukʼ i rajaaw on irutzʼihbʼaaj jenaj carta reh qʼorik chi riij i rukʼaxkilaal.
¿Chajarik inakapaaj chi ne ruchih i Leah?
CHAKAPAAJ CHI RIIJ I WILIH: Reʼ rajaaw i Leah tokoom kʼahchiʼ naq rukapaam eh maʼ xukoj ta rehtaal chi kʼahchiʼ naq kiqʼoʼreem. Mi reʼ Leah iruchih i opción A eh kow iruqʼoreej i rajaaw, mareh reʼ rajaaw maʼ ne ta rureq chi riij chajreet jeʼ reʼ xubʼan. Mareh, reʼ rajaaw maʼ ne ta irubʼiraj. Eh maʼ ne ta woʼ irukʼuhtaaj chi irukʼax i rajaaw (Efesios 6:2). Mi rubʼan i wilih, maʼ suq ta kikʼux ne kikahnik.
Atoobʼ ta wilik kʼaxkilaal pan bʼeeh, ne rubʼan chi ne nasikʼ tokoom chik bʼeeh reh qʼorik ruukʼ atuut awajaaw.
Atoobʼ ta reʼ opción B maʼ kʼaxik taj, maʼ irukʼuhtaaj ta chi wilik runaʼojbʼal. ¿Chaj woʼ reet? Mi raaj chi ne inkitobʼeej ruukʼ i rukʼaxkilaal, koruman chi reʼ Leah ne iruqʼoreej i rajaaw. Eh koruman chi reʼ rajaaw ne runabʼeej chajarik irukʼul. Mi maʼ inqʼorik, maʼ ne ta woʼ intobʼjiik.
Mi reʼ Leah iruchih i opción C, iruyeew qʼabʼ chi ne inkitobʼeej. Eh irusikʼ jenoʼ chik qʼiij reh qʼorik ruukʼ. Eh mi irutzʼihbʼaaj jenoʼ carta reh i rajaaw, mareh ne insuqbʼik rukʼux.
Rutzʼihbʼjiik jenaj carta ne irutobʼeej i Leah reh ruqʼorarik reh i rajaaw chajarik naq iraaj qʼorom reh. Noq reʼ rajaaw i Leah ne rilow i carta, ne rureq chi riij chajarik irukʼul. Reʼ opción C ne intobʼinik reh i Leah jeʼ woʼ i rajaaw. Atoobʼ ta ne inqʼorik ruukʼ on ne rutzʼihbʼaaj reh jenaj carta, reʼ opción wilih jenaj wach ruukʼ iruqʼor i naʼojbʼal wilih: «Jeʼ reʼ noq, inchol qasikʼim chuʼnchel inkʼamwik qeh pansuqkiil kʼuxliis» (Romanos 14:19).
¿Chajarik chik ne rubʼan i Leah?
Chakapaaj chajarik chik ne rubʼan i Leah, eh chatzʼihbʼaaj chajarik ne inkʼuljiik mi xubʼan i wilih.
TIQʼOROQ CHI KORIK
Kʼoloq pan akʼux: wilik pech reʼ atuut awajaaw tokoom ne inkireq chi riij chajarik i xaqʼor.
JENAJ EHTALIL:
Noq reʼ taqeh awajaaw inkipahqaaj aweh chaj woʼ reet kʼaah inabʼan. Reʼ hat inaqʼor keh: «Maʼ inwaaj ta qʼorik».
Mareh ne inkikapaaj chi reʼ xawaaj aqʼorom reʼ wilih: «Maʼ nukoj ta chik nukʼux ruukʼ i nutuut wajaaw. Xa kuukʼ taqeh wamigo nanuqʼorik chi riij taqeh nukʼaxkilaal».
Chakapaaj chi kʼahchiʼ awikʼik pan jenaj kʼaxkilaal eh reʼ awajaaw iraaj kat rutobʼeem, xa reʼ laʼ, reʼ hat inaqʼor: «Maʼ yeew pena, reʼ hin wehtʼal nikʼwach ne kinelik chupaam i kʼaxkilaal wilih».
-
¿Chajarik ne inkikapaaj taqeh awajaaw ruukʼ i xaqʼor?
-
¿Chajarik naq ne naqʼor?
Puede que también le interese
EHTALIL WACH PIZARRÓN
Nikʼwach qʼorik ruukʼ atuut awajaaw
¿Kʼaxik na chaweh qʼorik ruukʼ atuut awajaaw? ¿Nikʼwach ne inaqʼor keh i kʼahchiʼ awikʼraam?
