«Reʼ Dios [...] naa rujuxwiik reh chuʼnchel i riis naqʼ kiwach. Eh maʼ naa ta chik rilariik wach i kimik, ni xata oqʼik, ni xata tiʼkiil kʼuxliis. [...], ruum chuʼnchel i wilik naq cho najtir xsahchik kiwach» (Apocalipsis [Revelación] 21:3, 4, Santo Laj Huuj, Sociedad Bíblica de Guatemala).

Naruwihʼik qakamaj chi holohik eh naqareqem rusuqkiil (Isaías 65:21-23).

Maʼ na ta chik qakʼulum tiʼ kʼaxik eh i yabʼilaal (Isaías 25:8; 33:24).

Naqakʼachariik pan suqkiil kʼuxliis pan qapaat eh kuukʼ taqeh qamigo chi junelik (Salmo 37:11, 29).

Hooʼ, qil kiʼibʼ ehtalil:

• Reʼ Dios inchol rubʼanarik chuʼnchel iruqʼor. Pan Santo Laj Huuj xa reʼ woʼ i Dios inqʼorarik reh «qʼeʼ nim awajaawriik», ruum chi reʼ rajaawriik maʼ inpajarik taj (Apocalipsis 15:3). Noq iruqʼor chi narujalam i wach akʼal eh holohik chik narubʼanam, ne rubʼan chi ne inqakoj qakʼux ruukʼ chi jeʼ reʼ narukʼulariik. Jeʼ rukabʼ iruqʼor i Santo Laj Huuj: «Chi reh i Dios maʼ kʼaxik ta [...] chi bʼanarik [chuʼnchel]» (Mateo 19:26).

• Reʼ Dios iraaj rubʼanam chuʼnchel ahaʼ wilik i ruqʼorom. Qil jenaj ehtalil: reʼ Santo Laj Huuj iruqʼor chi reʼ Jehová iraaj ruyeʼem ruukʼ chuʼnchel rukʼux kikʼachariik taqeh i xikimik chik (Job 14:14, 15).

  Iruqʼor woʼ chi reʼ Jesús, Rakʼuun i Dios, xroqʼomaaj taqeh yowaabʼ ruum chi reʼreʼ xraaj rubʼanam (Marcos 1:40, 41). Reʼ Jesús xukʼuhtaaj ruukʼ i rubʼanooj chajarik iraaj i Rajaaw noq xutobʼeej taqeh nebʼaʼ (Juan 14:9).

  Ruukʼ i wilih inqakoj qakʼux chi reʼ Jehová eh i Jesús inkaaj chi ne inwihʼik jenaj qakʼachariik chi holohik (Salmo 72:12-14; 145:16; 2 Pedro 3:9).