Reʼ kuyuuj mahk irubʼan chi maʼ ne ta inqamol pan qanima i kʼaxkilaal eh i josqʼil. Reʼ wilih maʼ raaj ta ruqʼorom chi maʼxta xkʼuljik on maʼ inqaaj ta qʼorik chi riij i wilih.

NAʼOJBʼAL REH I SANTO LAJ HUUJ: «Makanaʼ taq i kuyuuj iibʼ taq chawach eh juneliik chakuy taq amahk, atoobʼ ta wilik taq akʼaxkilaal» (Colosenses 3:13, TNM).

«Noq inawaaj wach awuchʼihiil maʼ naawil taj i maʼ holohik taj irubʼan, inawil laʼ i holohik laj naʼojbʼal irubʼan» (Aaron).

Rumolariik i kʼaah ne rubʼan chi ne tiyowabʼjiik eh ne ruyoj wach akaxarohiil.

«Junriim, reʼ nubʼahiil xupahqaaj rukuybʼaal mahk ruum i xubʼan weh. Atoobʼ ta xnukʼaxkileej, xnukʼuy rumahk. Reʼ i maʼ insahchik ta pan nukʼux reʼ chi maʼ xareʼyuʼ ta xnukuy rumahk. Jeʼ reʼ maʼ xikʼik ta naq pan kʼaxkilaal i qakaxaro» (Julia).

CHAKAPAAJ

Chakapaaj chi riij i wilih noq ne tiʼikʼik pan kʼaxkilaal ruukʼ awuchʼihiil:

• ¿Tiʼ na inawikʼraaj chuʼnchel inkibʼan eh inkiqʼor aweh?

• ¿Xti koruman na chaweh chi ne inkipahqaaj kuybʼaal mahk aweh, on xareʼyuʼ insahchik pan akʼux?

TIQʼOROQ RUUKʼ AWUCHʼIHIIL

• ¿Inqakanaʼ na chi ne nikʼik taqeh qʼiij reh rukuyariik qamahk?

• ¿Chajarik ne inqabʼan reh chi xareʼyuʼ ne inqakuy qamahk?

JUʼJUN NAʼOJBʼAL

• Noq reʼ awuchʼihiil iruqʼor eh irubʼan i maʼ holohik ta aweh, makapaaj chi xa xraaj rubʼanam.

• Cha hat oq chaqʼlam ruukʼ awuchʼihiil, kʼoloq pan akʼux «Reʼ hoj chiquncheel xa reh reh wach qoh qʼehbʼik wiiʼ» (Santiago 3:2).

«Noq qakabʼcheel wilik qamahk maʼ kʼaxik ta rukuyariik. Xa reʼ laʼ qʼeʼ kʼaxik noq inqakapaaj chi xa jenaj wilik rumahk. Noq inkipahqaaj kuybʼal mahk qeh koruman chi xa hoj-oq lochʼik reh chi ne inqakuy i mahk» (Kimberly).

NAʼOJBʼAL REH I SANTO LAJ HUUJ: «Matchahmik chi rukorsjiik wach akʼaxkilaal» (Mateo 5:25, TNM).