KEH TAQEH KAXARO
1. Reʼ inyeʼwik rukowiil i kaxarohiil
¿CHAJARIK IRAAJ RUQʼOROM?
Reʼ taqeh kaxaro reʼ inkiyeew rukowiil i kikaxarohiil maʼ inkichʼaq ta kiibʼ eh reʼ wilih irubʼan chi suq kikʼux. Kikabʼcheel kehtʼal, chi atoobʼ ta ne inwihʼik kʼaxkilaal maʼ jaruuj ne inkikanaaʼ kiibʼ.
Juʼjun taqeh kaxaro kʼahchiʼ kikuyum wihʼik pan kabʼcheel ruum i kifamilia eh kamigo. Xa reʼ laʼ, holohik naq chi pan kikaxaro ne inwihʼik i kʼaxooj eh i nimanik iibʼ.
NAʼOJBʼAL REH I SANTO LAJ HUUJ: «Jeʼ woʼ reʼ i bʼahiilbʼees, maʼ rukʼul ta chi nee rukanaaʼ i rehkʼeen» (1 Corintios 7:11).
«Reʼ rukowiil i kaxarohiil irubʼan chi, maʼ ne ta tikaqrik xareʼyuʼ. Eh chi maʼ ne ta inakʼaxkileej rukuyariik i mahk eh rupahqaljiik kuybʼal amahk, eh maʼ ne ta taq inakanaaʼ chi reʼ taqeh kʼaxkilaal, ne ruchʼaaq taq awach» (Micah).
¿CHAJ WOʼ REET KORUMAN?
Mi reʼ taqeh kaxaro maʼ inkiyeew ta rukowiil i kikaxarohiil, noq ne kiʼikʼik pan kʼaxkilaal mareh ne inkikapaaj ¿chaj woʼ reet xnubʼan kaxaro ruukʼ? Mareh ne inkisikʼ ruwiiʼ reh ruchʼaqarik kiibʼ.
«Kʼih inkibʼan kaxaro xa reʼ laʼ inkikapaaj chi ne inkichʼaq kiibʼ mi wilik jenoʼ kʼaxkilaal. Wilaʼ xabʼan kaxaro eh inakapaaj chi ne nachaqʼ awiibʼ mi reʼ hat inawaaj, iraaj ruqʼorom chi maʼxta xabʼan reh rukowsjiik akaxarohiil» (Jean).
¿CHAJARIK NE NABʼAN?
CHAKAPAAJ
¿Chajarik inabʼan noq tikaqrik ruukʼ awuchʼihiil?
¿Inakapaaj na chaj woʼ reet xabʼan kaxaro?
¿Inakapaaj na nikʼwach naq akʼachariik mi wilkaat ruukʼ tokoom?
¿Inaqʼor na reh awuchʼihiil «nakaat nukanaam» «nanujalam awach» «nanusikʼim jenoʼ holohik i runaʼojbʼal»?
Wilaʼ xaqʼor chi jeʼ wilih ruukʼ taqeh juʼjun chi pahqanik wilih, koruman chi ne nayeew rukowiil akaxarohiil.
TIQʼOROQ RUUKʼ AWUCHʼIHIIL
¿Maʼxta na chik rukowiil i qakaxarohiil? Mi jeʼ reʼ, ¿chaj woʼ reet?
¿Chajarik ne inqabʼan reh chi kow i qakʼaxarohiil?
JUʼJUN NAʼOJBʼAL
Chatzʼihbʼaaj jenoʼ huuj ahaʼ wiiʼ naqʼor chi nawaaj wach awuchʼihiil.
Wihʼoq awuukʼ jenoʼ rufoto awuchʼihiil.
Chaqʼoreej iqal iqal awuchʼihiil, jeʼ rukabʼ noq wilkaat pan kamanik on noq xa ahaʼ paʼ wilkaat.
NAʼOJBʼAL REH I SANTO LAJ HUUJ: «Maʼ jinoʼq naa ruchʼaqwiik kiwach i rukʼulaam wach i Dios, inki» (Mateo 19:6).
