KEH TAQEH KʼIJOOL
12. Chatzʼihbʼaaj taqeh i inawaaj abʼanam
¿CHAJARIK IRAAJ RUQʼOROM?
Reʼ inawaaj abʼanam maʼ xa ta naakapaam. Reh chi ne nooj eloq wach i inawaaj abʼanam koruman chi naatzʼihbʼaam, naasikʼim anaʼojbʼal eh naakamanik chi kow.
Reʼ inawaaj abʼanam mareh ne rukʼam qʼiij, poh on haabʼ reh rubaʼanariik. Reʼ inawaaj abʼanam reʼ awehtʼal chi ne rukʼam haabʼ, koruman chi ne natijej naʼojbʼal reh rubʼanariik i kokʼ taq kamanik.
¿CHAJ WOʼ REET KORUMAN?
Noq inareq inawaaj abʼanam irubʼan chi inakoj akʼux awuukʼ, ne rukowej taqeh awamigohiil eh ne rubʼan chi suq akʼux.
Maʼ ne ta chik tiyoʼjik. Mi xabʼan jenoʼ kamanik reʼ inchahmik kiʼibʼ ixibʼ poh ne chik inawaaj abʼanam reʼ kichahmik haabʼ. Ne tichol rikʼsjiik taqeh kʼaxkilaal reʼ ne inchalik pan akʼachariik jeʼ rukabʼ noq ne tikimin chi rubʼanariik i maʼ holohik ta.
Chakowej awamigohiil ruukʼ taqeh tokoom. Chiqunchelaal inqakʼax wach wihʼik ruukʼ taqeh kʼachareel reʼ kehtʼal chajarik inkaaj eh inkikoj kikʼux chi rureqariik. Maʼxta chik jenoʼ ruwiiʼ reh rukowsjiik awamigohiil jeʼ rukabʼ noq tikamanik ruukʼ tokoom reh rureqariik i inawaaj taq abʼanam.
Ne inwihʼik rusuqkiil akʼux. Noq ne natzʼihbʼaaj i inawaaj abʼanam eh ne nakoj akʼux chi rureqariik suq akʼux.
«Qʼeʼ inukʼax wach rutzʼihbʼjiik taqeh inwaaj nubʼanam ruum chi jeʼ reʼ lahtzʼ nuwach. Eh irubʼan chi wilik inwuyʼeej pan nukʼachariik. Noq ne inkʼulik cho pan nukʼux ne inuqʼor: ¡Qʼeʼ holohik i xnubʼan!» (Christopher).
NAʼOJBʼAL REH I SANTO LAJ HUUJ: «Eh awach i rilow chi xkʼuloq i teew maʼ rubʼan taj i tik. Awach i rilow chi xkʼuloq i suutzʼ maʼ rumol taj wach i rutik» (Eclesiastés 11:4).
¿CHAJARIK NE NABʼAN?
Reh chi ne nabʼan i kʼahchiʼ akapaam rubʼaan chakʼam riij taqeh wilih.
Chachih i inawaaj abʼanam. Chatzʼihbʼaaj chuʼnchel taqeh inawaaj abʼanam eh chawil haj wilik i nabʼanam chi peet.
Chakorsaj wach i inawaaj abʼanam. Juʼjun naʼojbʼal reh i inawaaj abʼanam:
Chatzʼihbʼaaj i qʼiij reh rubʼanariik i inawaaj abʼanam.
Chatzʼihbʼaaj juʼjun naʼojbʼal naatijem.
Chakapaaj chi riij taqeh kʼaxkilaal ne inchalik eh nikʼwach ne tiʼelik chupaam.
Maacham awiibʼ. Maʼ koruman ta chi ne tichol rubʼanariik chuʼnchel. Chakapaaj ahaʼ wilik i peet inawaaj abʼanam reh chi ne nooj eloq wach i xakapaaj rubʼanariik. Noq ikʼinaq chik kiʼibʼ ixibʼ poh chatzʼir riij chajarik i xabʼan.
NAʼOJBʼAL REH I SANTO LAJ HUUJ: «Reʼ taqe inkorjik wach chi kapebʼimaj riij chi korik, wilik i rukʼam chaloq» (Proverbios 21:5).
