Reʼ taqeh kaxaro noq kikamanik pan kibʼaal jeʼ rukabʼ i ajbʼehsan chʼihchʼ eh i ruchʼihiil inkitobʼeej kiibʼ. Xa maʼ chi kiij ta inkikapaaj, inkikapaaj laʼ i koruman pan kikaxaro, jeʼ woʼ noq inwihʼik kʼaxkilaal.

NAʼOJBʼAL REH I SANTO LAJ HUUJ: «Jeʼ reʼ noq, maʼ kiʼibʼ ta chik taqe xa jinaj laʼ chik taqe» (Mateo 19:6).

«Kikabʼcheel nakitobʼeem kiibʼ reh chi holohik i kikaxarohiil» (Christopher).

Wilaʼ reʼ taqeh kaxaro maʼ inkitobʼeej ta kiibʼ pan kabʼcheel inwihʼik kikʼaxkilaal, eh jeʼ reʼ noq, noq maʼ nim ta wach i kikʼaxkilaal inooj kuxoq chi nim eh kikaqrik chikiwach.

«Reʼ kamanik pan kabʼcheel qʼeʼ koruman pan kaxarohiil. Wi reʼ nubʼahiil eh reʼ hin wi ta qojkamanik pan kabʼcheel, maʼ suq ta naq i kʼacharik ne inqabʼan: xa jeʼ naq qakabʼ kiʼibʼ chi kʼachareel patinik inkibʼan ar, xa reʼ laʼ, noq kiqʼorik chi riij i ajwaal wach, maʼxta inkikorsaj wach» (Alexandra).

CHAKAPAAJ

• ¿Inakapaaj na chi reʼ atojbʼaal xa aweh chawutkeel?

• ¿Inakapaaj na chi suq wilkaat noq maʼxta awuukʼ awuchʼihiil?

• ¿Maʼ qʼeʼ ta na inaqʼoreej taqeh irufamilia awuchʼihiil, atoobʼ ta reʼ keh suq kiqʼorik?

TIQʼOROQ RUUKʼ AWUCHʼIHIIL

• ¿Chajarik i holohik laj kamanik inqabʼan pan qakaxaro?

• ¿Chajarik i koruman chi ne inqakorsaj wach?

• ¿Chajarik chik ne inqabʼan reh kamanik chi korik qakabʼcheel?

JUʼJUN NAʼOJBʼAL

• Chakapaaj chi reʼ kaxarohiil jeʼ rukabʼ i kʼoʼnik pelota. ¿Chajarik taq ne nabʼan reh chi ne taq tikʼoʼnik akabʼcheel?

• Makapaaj chi awutkeel nakʼamam i pelota, na laʼ taq akʼamam akabʼcheel.

«Maʼxta qʼorik ajwach wilik razoon reh. Ruum chi reʼ ajwaal wach reʼ chi ne inwihʼik i tuqkilaal eh chi jenaj wach i kapebʼaal pan kaxaro» (Ethan).

NAʼOJBʼAL REH I SANTO LAJ HUUJ: «Moʼ-oq awach taq aweh ineerusikʼ kʼaxbʼal riibʼ xa reh chi rutkeel, koruman laʼ woʼ hoq chi neerusikʼ i kʼaxbʼal keh i tokoom» (Filipenses 2:3, 4).