Reʼ kʼachareel kow inkamanik maʼ inyoʼjik ta ruum i kamanik. Imponik laʼ chuwach eh irutobʼeej taqeh tokoom. Atoobʼ ta reʼ rukamaj maʼ qʼeʼ ta holohik on maʼ nim ta wach.

Jeʼ rukabʼ inqil reʼ kʼacharik kow chik wach. Eh yuʼnaak ajwach imponik chuwach i kamanik atoobʼ chi reh, ruum chi kʼih taqeh kʼachareel maʼ imponik ta chik chi kiwach i kamanik (Eclesiastés 3:13).

«Noq kinkamanik chi kow suq inwikʼraaj wiibʼ. Ruum qʼeʼ imponik chi nuwach i kamanik. Eh noq ne inkil chi kinkamanik holohik ne kiqʼorik chi wiij» (Reyon).

NAʼOJBʼAL REH I SANTO LAJ HUUJ: «Chuʼnchel i kamanik wilik i rukʼam chaloq» (Proverbios 14:23).

Reʼ taqeh naʼojbʼal naqilom wach ne tirutobʼeej reh chi ne imponik chawach i kamanik.

Chatijej nikʼwach rubʼanariik chi korik akamaj. Chakoj akʼux reh rubʼanariik chi holohik akamaj, jeʼ rukabʼ noq wilkaat pan apaat, pan tijinbʼal on pan jenoʼ chik kamajik. Wilaʼ tichol chik rubʼanarik jenoʼ akamaj, chasik ruwiiʼ reh chi xareʼyuʼ ne nakohlaaj. Noq ne nawil chi tichol chik rubʼan ne insuqbʼik akʼux.

NAʼOJBʼAL REH I SANTO LAJ HUUJ: «Awach i rubʼan chi korik i rukamaj, pankikamaj taqe i reey naa ruwihiik, maʼ reʼ ta parukamaj jinoʼq i xamaʼ xta rajaawriik» (Proverbios 22:29).

Chakapaaj taqeh tokoom. Noq reʼ hat inabʼan chuʼnchel inkiqʼor aweh eh maʼ ko ta ruman inkiqʼor woʼ chik aweh inatobʼeej taqeh tokoom. Jeʼ rukabʼ noq titobʼinik chi rumisjik paam apaat irubʼan chi inaqahsaj wach i kikamaj taqeh afamilia.

NAʼOJBʼAL REH I SANTO LAJ HUUJ: «Xikʼ naah i rusuqkiil qakʼux noq inqabʼan i yeʼooj chuwach i rukʼulariik» (Hechos 20:35, TNM).

Chabʼan kamanik, xa maʼ reʼ ta i inkipahqaaj aweh. Mabʼan xa reʼ i inkipahqaaj aweh chi bʼanarik. Jeʼ reʼ ne nakʼuhtaaj chi reʼ hat tichol rukʼamarik akʼachariik. Korik, mareh kʼih naakamanik, xa reʼ laʼ ruum chi imponik chawach maʼ ruum ta chi xa tikimin chi kamanik (Mateo 5:41).

NAʼOJBʼAL REH I SANTO LAJ HUUJ: «Reh chi reʼ otobʼil neena aʼn weh maʼ xata hat minooj chupaam, xa panakʼux laʼ naa ruchaliik» (Filemón 14).

Chapaj nikʼ kʼihaal naakamanik. Reʼ kamanik chi kow maʼ raaj ta ruqʼorom chi nakansam awiibʼ chi kamanik. Koruman chi ne napaaj nikʼ kʼihaal naakamanik, reh chi ne nasuqkileej akamaj eh ne woʼ nasuqkileej i hiʼlik.

NAʼOJBʼAL REH I SANTO LAJ HUUJ: «Qʼeʼ atoobʼ i hiʼlik chuwach i ikʼik qʼiij chi kamanik reh rusikʼariik i maʼxta kamaj, reʼ wilih jeʼ rukabʼ ruchopariik i teew» (Eclesiastés 4:6, TNM).